ໃນວັນທີ 5 ກຸມພາ 2021 ໃນໂຊຊຽວມີເດຍໄດ້ພາກັນຕິດແຮສແທັກ #AsiansAreHuman ແລະ #JusticeForVicha ເພື່ອຮຽກຮ້ອງຄວາມຍຸຕິທຳ ແລະ ຄວາມເທົ່າທຽມດ້ານສິດທິມະນຸດ ຫຼັງຈາກທີ່ພໍ່ຕູ້ ວິຊາ ຣັດຕະນະພັກດີ ຄົນໄທ ອາຍຸ 84 ປີ ຖືກຍູ້ລົ້ມອາການບາດເຈັບສາຫັດ ແລະ ເສຍຊີວິດໃນເວລາຕໍ່ມາ, ໂດຍໃນ Twitter ມີຍອດຣີທະວິດເກືອບ 2 ແສນຄັ້ງ.
![](https://laox.la/wp-content/uploads/2021/02/image-93.png)
ເຫດເກີດທີ່ບໍລິເວນຫົນທາງແອນຊາ ວິສຕາ ລັດຄາລິຟໍເນຍ ສະຫະລັດອາເມຣິກາ. ໃນຂະນະທີ່ພໍ່ຕູ້ວິຊາ ກຳລັງອອກກຳລັງກາຍໃນຕອນເຊົ້າເປັນເລື່ອງປົກກະຕິທີ່ໜ້າບ້ານ ຕອນນັ້ນເອງມີຜູ່ຊາຍໂຕໃຫຍ່ຜິວສີແລ່ນມາຢ່າງໄວ ແລະ ຕຳເອົາພໍ່ຕູ້ຈົນລົ້ມລົງຢ່າງແຮງ ກ່ອນທີ່ຜູ່ຊາຍຄົນນັ້ນຈະຍ່າງໜີໄປແບບບໍ່ມີຫຍັງເກີດຂຶ້ນ.
ພໍ່ຕູ້ວິຊາໄດ້ຮັບບາດເຈັບສາຫັດ ຖືກນຳໂຕສົ່ງໂຮງໝໍ ແລະ ເສຍຊິວິດລົງໃນອີກ 2 ມື້ຕໍ່ມາ. ກ້ອງວົງຈອນປິດຂອງເພື່ອນບ້ານສາມາດຈັບພາບນາທີທີ່ພໍ່ຕູ້ຖືກທຳຮ້າຍໄວ້ໄດ້ ແລະ ເບິ່ງຄືວ່າຜູ່ຊາຍຄົນນັ້ນຕັ້ງໃຈຕຳແບບບໍ່ມີສາເຫດ ແຖມຍັງບໍ່ຮູ້ສຶກຜິດຫຍັງ.
https://twitter.com/dionlimtv/status/1356098895604895745?s=21&fbclid=IwAR0uhTGmTQ40HQM6NiryOfIlGV9tVvM69AW7XAcbj9YtDqLIpNRA3ikM4iI
ວິດີໂອດັ່ງກ່າວໄດ້ກາຍເປັນກະແສທົ່ວໂລກ ທຸກຄົນໄດ້ຕົກໃຈກັບເຫດການທີ່ເກີດຂຶ້ນ ພາກັນປະນາມຜູ່ກໍ່ເຫດ ແລະ ສະແດງຄວາມເສຍໃຈກັບຄອບຄົວ ລວມເຖິງເຈົ້າເມືອງຊານຟຣານຊິສໂກເອງກໍອອກຖະແຫຼງການປະນາມຜູ່ກໍ່ເຫດເຊັ່ນກັນ.
![](https://laox.la/wp-content/uploads/2021/02/image-94.png)
ຕໍ່ມາຕຳຫຼວດໄດ້ຈັບຜູ່ກໍ່ເຫດໄດ້ ຊື່ວ່າ “ອອງຕວນ ວັດສັນ” (Antoine Watson) ອາຍຸ 19 ປີ ແລະ ໝູ່ຍິງຄົນສະໜິດ “ເມລາເຊຍ ກູ” (Maylasia Goo) ອາຍຸ 20 ປີ ທີ່ຄາດວ່າເປັນຜູ່ສົມຮູ້ຮ່ວມຄິດ ເນື່ອງຈາກເປັນຄົນພາອອງຕວນຫຼົບໜີ.
![](https://laox.la/wp-content/uploads/2021/02/image-95.png)
ຄິມ ລໍສັນ (Kim Lawson) ລູກສາວຂອງພໍ່ຕູ້ວິຊາ ພະຍາຍາມບົ່ງຊີ້ວ່າ ເຫດການດັ່ງກ່າວແມ່ນມາຈາກການຈຳແນກເຊື້ອຊາດ ທັງພໍ່ ແລະ ອອງຕວນບໍ່ຮູ້ຈັກກັນມາກ່ອນ ບໍ່ມີການໂອ້ລົມຫຍັງກັນ ຈຶ່ງຂໍໃຫ້ສານລົງໂທດອອງຕວນສະຖານໜັກ. ເອຣິກ ລໍສັນ (Eric Lawson) ລູກເຂີຍຂອງພໍ່ຕູ້ບອກວ່າ ຄອບຄົວຂອງພວກເຂົາຖືກຄຸກຄາມດ້ວຍຄຳເວົ້າທີ່ສະແດງເຖິງການແບ່ງແຍກເຊື້ອຊາດມາຕະຫຼອດ ໂດຍສະເພາະຊ່ວງໂຄວິດທີ່ຄົນເອເຊຍຖືກເບິ່ງວ່າເປັນຕົ້ນເຫດຂອງເຊື້ອໄວຣັສ ເຮັດໃຫ້ຄຳເວົ້າຍິ່ງທະວີຄວາມຮຸນແຮງຂຶ້ນ ແລະ ກາຍເປັນການຄຸກຄາມ.
ຄົນເອເຊຍທີ່ຢູ່ທົ່ວທຸກມຸມໂລກເຫັນວ່າ ການກະທຳຄັ້ງນີ້ເປັນສິ່ງທີ່ໂຫດຮ້າຍຫຼາຍ ແລະ ມັນຍັງສະທ້ອນເຖິງຄວາມກຽດຊັງ ແລະ ບັນຫາການແບ່ງແຍກເຊື້ອຊາດຢ່າງຊັດເຈນ ຈຶ່ງເກີດເປັນ #AsiansAreHuman ທີ່ທວງຄວາມຍຸຕິທຳໃຫ້ຄົນເອເຊຍ ຄ້າຍຄືກັບເຫດການ Black Lives Matter ກໍລະນີຂອງ ຈອດຈ໌ ຟຣອຍ ໃນປີ 2020 ທີ່ທວງຄວາມຍຸຕິທຳໃຫ້ກັບຄົນດຳໃນໂລກອອນໄລນ໌.
ໂຈນາທານ ດີ ຊາງ (Jonathan D. Chang) ສິນລະປິນຊາວເອເຊຍທີ່ອາໄສຢູ່ລອສແອງເຈີລິສ ໄດ້ແຕ້ມຮູບພໍ່ຕູ້ວິຊາເພື່ອສະແດງຄວາມໄວ້ອາໄລ ແລະ ມີຄົນຈຳນວນຫຼາຍທີ່ປ່ຽນຮູບປະຈຳຕົວໃນໂຊຊຽວມີເດຍເປັນຮູບນີ້.
![](https://laox.la/wp-content/uploads/2021/02/image-96.png)
ໂຊຊຽວມີເດຍລຸກເປັນໄຟ ເມື່ອມີຄົນຕິດແຮສແທັກ #AsiansAreHuman ແລະ ມີຄົນແຊຣ໌ເຫດການທີ່ບໍ່ຍຸຕິທຳກັບຄົນເອເຊຍຫຼາຍໆກໍລະນີ, ມີການຮຽກຮ້ອງຄວາມຍຸຕິທຳໃຫ້ແກ່ບັນດາຄົນເຫຼົ່ານັ້ນ, ຫຼັງຈາກນັ້ນ ກໍໄດ້ມີບັນດາຄົນດັງທັງໃນປະເທດໄທ ແລະ ຕ່າງປະເທດ ອອກມາຮຽກຮ້ອງຄວາມຍຸຕິທຳໃຫ້ພໍ່ຕູ້ວິຊາ ແລະ ຄົນເອເຊຍ ລວມທັງຕໍ່ຕ້ານການຢຽດເຊື້ອຊາດອີກດ້ວຍ.