ກະຊວງອຸດສາຫະກຳ ແລະ ການຄ້າ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດ (LNCCI) ແລະ UNDP ເປີດໂຕໂຄງການ “Digital in Motion For MSME” ເພື່ອເລັ່ງຊຸກຍູ້ທຸລະກິດຂະໜາດນ້ອຍໃຫ້ກ້າວສູ່ຍຸກດິຈິຕອນ, ແກ້ໄຂບັນຫາການເຂົ້າເຖິງເຕັກໂນໂລຊີ ແລະ ແຫຼ່ງທຶນ ຫວັງຍົກລະດັບຂີດຄວາມສາມາດໃນການແຂ່ງຂັນ ແລະ ສ້າງຄວາມເຂັ້ມແຂງໃຫ້ເສດຖະກິດຮາກຖານຂອງ ສປປ ລາວ.
ຕາມການລາຍງານ ຂອງ ກະຊວງອຸດສາຫະກຳ ແລະ ການຄ້າ, ພິທີດັ່ງກ່າວໄດ້ຈັດຂຶ້ນໃນຕອນບ່າຍຂອງວັນທີ 22 ມິຖຸນາ 2026, ໂດຍການເປັນປະທານຮ່ວມຂອງ ທ່ານ ປອ ນາງ ມະໄລຄຳ ພິລາພອນ ຮອງຫົວໜ້າກົມສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ຈນກ), ທ່ານ ອະນຸສອນ ພົນອາມາດ ຮອງປະທານ LNCCI ແລະ ທ່ານ ນາງ Martine There ຜູ້ຕາງໜ້າອົງການ UNDP ປະຈຳ ສປປ ລາວ.
ທ່ານ ປອ ນາງ ມະໄລຄຳ ໄດ້ເນັ້ນໜັກວ່າ ໃນຍຸກປັດຈຸບັນ ການຂັບເຄື່ອນທຸລະກິດດ້ວຍດິຈິຕອນບໍ່ແມ່ນພຽງທາງເລືອກອີກຕໍ່ໄປ ແຕ່ເປັນຄວາມຈຳເປັນອັນຮີບດ່ວນ. ໂຄງການນີ້ຈຶ່ງປຽບເໝືອນກົນໄກສຳຄັນໃນການສ້າງໂອກາດໃໝ່ໃຫ້ແກ່ຜູ້ປະກອບການ ສອດຄ່ອງກັບບູລິມະສິດຂອງລັດຖະບານທີ່ຕ້ອງການສົ່ງເສີມນະວັດຕະກຳ ແລະ ຍົກສູງການພັດທະນາເສດຖະກິດ-ສັງຄົມແບບມີສ່ວນຮ່ວມ.
ປັດຈຸບັນ, ພາກສ່ວນ MSME ຖືເປັນຫົວໃຈສຳຄັນຂອງເສດຖະກິດລາວ ໂດຍກວມເອົາເຖິງ 99.8% ຂອງວິສາຫະກິດທັງໝົດ ແລະ ກວມເອົາ 80% ຂອງການຈ້າງງານທົ່ວປະເທດ. ເຖິງຢ່າງໃດກໍຕາມ, ສິ່ງທ້າທາຍໃຫຍ່ທີ່ພາກທຸລະກິດເຫຼົ່ານີ້ພວມປະເຊີນ ແມ່ນຂໍ້ຈຳກັດດ້ານຄວາມຮູ້ທາງເຕັກໂນໂລຊີ (Digital Literacy) ແລະ ຄວາມຫຍຸ້ງຍາກໃນການເຂົ້າເຖິງແຫຼ່ງທຶນ.
ການກ້າວເຂົ້າມາຂອງໂຄງການ Digital in Motion For MSME ຈະເຂົ້າໄປອຸດຊ່ອງໂຫວ່ດັ່ງກ່າວ ໂດຍຊ່ວຍໃຫ້ຜູ້ປະກອບການສາມາດນຳໃຊ້ເຕັກໂນໂລຊີເຂົ້າໃນການຂະຫຍາຍຕະຫຼາດ, ເພີ່ມປະສິດທິພາບການບໍລິຫານ ແລະ ທີ່ສຳຄັນຄືການສ້າງລະບົບບັນທຶກຂໍ້ມູນທຸລະກິດທີ່ໄດ້ມາດຕະຖານ. ການມີຂໍ້ມູນທີ່ຊັດເຈນນີ້ ຈະເປັນກະແຈສຳຄັນທີ່ປົດລັອກໃຫ້ MSMEs ສາມາດເຂົ້າເຖິງການຄໍ້າປະກັນສິນເຊື່ອຈາກບໍລິສັດຄ້ຳປະກັນສິນເຊື່ອລາວ ແລະ ສະຖາບັນການເງິນຕ່າງໆໄດ້ງ່າຍຂຶ້ນກວ່າເດີມ.
ເພື່ອຮັບປະກັນໃຫ້ໂຄງການບັນລຸຜົນຕາມເປົ້າໝາຍ, ກົມສົ່ງເສີມ ຈນກ ກະຊວງອຸດສາຫະກຳ ແລະ ການຄ້າ ໄດ້ຢືນຢັນຄວາມໝາຍໝັ້ນທີ່ຈະເຮັດວຽກຢ່າງໃກ້ຊິດຮ່ວມກັບ UNDP, LNCCI ພ້ອມດ້ວຍທຸກພາກສ່ວນທີ່ກ່ຽວຂ້ອງ. ການຮ່ວມມືຄັ້ງນີ້ ບໍ່ພຽງແຕ່ເພື່ອຮັບປະກັນຜົນສຳເລັດຂອງໂຄງການເທົ່ານັ້ນ, ແຕ່ຍັງແນໃສ່ຂະຫຍາຍຜົນຮັບໃຫ້ກວ້າງຂວາງ ເພື່ອຫັນປ່ຽນວິຖີການດຳເນີນທຸລະກິດຂອງ MSME ລາວ ໃຫ້ກ້າວທັນການປ່ຽນແປງຂອງໂລກດິຈິຕອນຢ່າງແທ້ຈິງ.
#LaoXperts #DigitalInMotionForMSME #SMElaos #DigitalTransformation #UNDPLaoPDR #LNCCI #MOIC #ເສດຖະກິດລາວ #ທຸລະກິດຍຸກດິຈິຕອນ
