ອີງຈາກບົດລາຍງານຂອງສຳນັກຂ່າວຕ່າງປະເທດ, ນັກວິເຄາະຂອງຈີນ ແລະ ໄທຕ່າງກໍໄດ້ສະແດງຄວາມຄິດເຫັນ ແລະ ບອກເປັນສຽງດຽວກັນວ່າ: ການລົງທຶນຂອງຈີນໃນປະເທດໄທປີ 2024 ຈະຍັງຄົງສາມາດເຕີບໂຕຢ່າງຕໍ່ເນື່ອງ ແລະ ຄາດວ່າຈະສ້າງສະຖິຕິສູງສຸດໃໝ່. ຫຼັງຈາກທີ່ຈີນກາຍເປັນນັກລົງທຶນຕ່າງປະເທດລາຍໃຫຍ່ທີ່ສຸດຂອງໄທໃນປີທີ່ຜ່ານມາ.
ໂດຍລາຍງານໄດ້ລະບຸວ່າ ນັບຕັ້ງແຕ່ເດືອນທັນວາຜ່ານມາ, ໄດ້ພົບເຫັນບໍລິສັດທີ່ໄດ້ລົງທະບຽນລະດັບ A-share ສັນຊາດຈີນຢ່າງໜ້ອຍ 14 ແຫ່ງ ແລະ ໄດ້ປະກາດວ່າຈະສ້າງຕັ້ງສາຂາ, ສ້າງໂຮງງານໃໝ່ ເພື່ອຂະຫຍາຍໂຮງງານທີ່ມີຢູ່ແລ້ວ ຫຼື ເພີ່ມທຶນໃນປະເທດໄທ ທ່າມກາງກະແສການລົງທຶນຂອງຈີນທີ່ໄຫຼເຂົ້າມາໃນໄທຢ່າງໄວ. ເຊິ່ງໜຶ່ງໃນນັ້ນກໍຄື ZYNP Corp, ຜູ້ຜະລິດສ່ວນປະກອບຂອງເຄື່ອງຈັກເຜົາໄໝ້ຈາກແຂວງ Henan, ພາກກາງຂອງຈີນ ທີ່ໄດ້ອອກມາເປີດເຜີຍໃນວັນທີ 3 ທີ່ຜ່ານມາວ່າບໍລິສັດກໍາລັງລົງທຶນ 210 ລ້ານຢວນເພື່ອສ້າງຖານການຜະລິດໃນປະເທດໄທ.
ໃນຂະນະດຽວກັນ, Circuit Fabology Microelectronics Equipment Co Ltd, ບໍລິສັດ Printed Circuit Board (PCB) ທີ່ຕັ້ງຢູ່ໃນແຂວງ Anhui, ພາກຕາເວັນອອກຂອງຈີນ ກໍໄດ້ປະກາດໃນມື້ດຽວກັນນັ້ນວ່າ ບໍລິສັດກໍາລັງລົງທຶນ 100 ລ້ານຢວນໃນປະເທດໄທ ເພື່ອສ້າງຕັ້ງສາຂາ, ຊື້ທີ່ດິນ ແລະ ສ້າງໂຮງງານ.
Xu Genluo ຮອງປະທານບໍລິສັດ Amata Corp., ທີ່ຕັ້ງຢູ່ປະເທດໄທ ກໍໄດ້ສະແດງຄວາມຄິດເຫັນວ່າ ໃນໄລຍະປີທີ່ຜ່ານມາ ບັນດາປະຊາຄົມວິສາຫະກິດຂອງຈີນໄດ້ສະແດງໃຫ້ເຫັນເຖິງຄວາມຫຼົງໃຫຼທີ່ບໍ່ເຄີຍມີມາກ່ອນໃນການລົງທຶນຢູ່ໄທ. ພ້ອມດ້ວຍຄະນະຜູ້ແທນວິສາຫະກິດຈຳນວນໜຶ່ງໄດ້ເດີນທາງມາຢ້ຽມຢາມເຂດນິຄົມອຸດສາຫະກຳຂອງຕົນຢ່າງບໍ່ຂາດສາຍ.
ໃນດ້ານຂອງນັກວິເຄາະໃນຈີນ ແລະ ໄທເຫັນວ່າ ການເພີ່ມຂຶ້ນຂອງການລົງທຶນຂອງຈີນແມ່ນໄດ້ຮັບການຊຸກຍູ້ຈາກອຸດສາຫະກຳພາຫະນະພະລັງງານໃໝ່ (NEV) ແລະ ອຸດສາຫະກໍາເອເລັກໂຕຣນິກ. ໂດຍສ່ວນໜຶ່ງເປັນຜົນມາຈາກມາດຕະການຂອງລັດຖະບານໄທທີ່ສະໜັບສະໜູນການລົງທຶນຈາກຕ່າງປະເທດ. ສົມທົບກັບການປ່ຽນແປງໃນພູມສັນຖານເສດຖະກິດໂລກທີ່ຕໍ່ຕ້ານຄວາມສ່ຽງທີ່ໄດ້ແຜ່ກະຈາຍໄປທົ່ວໂລກ, ຈົນເຮັດໃຫ້ຈີນຕົກເປັນເປົ້າໝາຍໃນການກີດກັ້ນທາງດ້ານການຄ້າ. ຍິ່ງໄປກວ່ານັ້ນ, ທັງຈີນ ແລະ ໄທລ້ວນແຕ່ມີເປົ້າໝາຍອັນດຽວກັນໃນການສ້າງອະນາຄົດທີ່ການຄ້າ ແລະ ການລົງທຶນໃຫ້ມີຄວາມຈະເລີນຮຸ່ງເຮືອງ, ໝັ້ນຄົງ, ສາມາດເຕີບໂຕໄດ້ຢ່າງຕໍ່ເນື່ອງ ແລະ ຍືນຍົງ.
ນອກຈາກນີ້, ນັກວິເຄາະສ່ວນໃຫຍ່ຍັງໄດ້ເຫັນດີກົງກັນວ່າ ຈີນຈະສືບຕໍ່ເປັນແຫຼ່ງການລົງທຶນທີ່ໃຫ່ຍທີ່ສຸດຂອງໄທໃນປີນີ້ຕໍ່ເນື່ອງຈາກປີ 2023. ນັກວິເຄາະຈີນຄິດວ່າໃນປີ 2024, ນອກຈາກໄທແລ້ວ ຫວຽດນາມ ແລະ ອິນໂດເນເຊຍຍັງແມ່ນຈຸດພົ້ນເດັ່ນຂອງການລົງທຶນໂດຍກົງຈາກຕ່າງປະເທດຂອງຈີນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
