ລາຍຮັບ 6 ເດືອນທະລຸເປົ້າ 54%, ຄາດການງົບປະມານປີ 2026 ເກີນດຸນກວ່າ 2 ພັນຕື້ກີບ
ກະຊວງການເງິນເປີດເຜີຍຕົວເລກເສດຖະກິດ 6 ເດືອນຕົ້ນປີ 2026 ເກັບລາຍຮັບໄດ້ກວ່າ 44,956 ຕື້ກີບ ບັນລຸ 54% ຂອງແຜນການປີ ພ້ອມຮັດສາຍແອວການໃຊ້ຈ່າຍຈົນສ້າງຄວາມຫວັງໃຫ້ງົບປະມານທ້າຍປີເກີນດຸນເຖິງ 2,200 ຕື້ກີບ.
ຄວາມສຳເລັດນີ້ເປັນຜົນຈາກການບຸກທະລຸອັດຊ່ອງຫວ່າງການຮົ່ວໄຫຼ ແລະ ການຍົກລະດັບນະໂຍບາຍສ້າງເສດຖະກິດເອກະລາດ ເປັນເຈົ້າຕົນເອງ (ສອຈ) ເພື່ອສ້າງສະຖຽນລະພາບມະຫາພາກຂອງລາວຢ່າງຍືນຍົງ.
ຕາມການລາຍງານຂອງກະຊວງດັ່ງກ່າວ, ບາດກ້າວສຳຄັນດັ່ງກ່າວໄດ້ຖືກລາຍງານຢ່າງເປັນທາງການໃນກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານປະຈຳເຄິ່ງປີ ທີ່ຈັດຂຶ້ນຜ່ານລະບົບທາງໄກໃນວັນທີ 24 ສິງຫາ 2026 ເຊິ່ງນຳພາໂດຍທ່ານ ສຸລິວັດ ສຸວັນນະຈູມຄຳ ຮອງລັດຖະມົນຕີກະຊວງການເງິນ.
ເວທີດັ່ງກ່າວບໍ່ພຽງແຕ່ເປັນການສະຫຼຸບຕົວເລກ ແຕ່ຍັງເປັນການຕີລາຄາຄືນເຖິງປະສິດທິຜົນຂອງການປະຕິຮູບນະໂຍບາຍການເງິນໃນໄລຍະທີ່ຜ່ານມາ.
ພາບລວມຂອງເສດຖະກິດມະຫາພາກຖືວ່າຢູ່ໃນເກນທີ່ໜ້າພໍໃຈ ໂດຍການເຕີບໂຕທາງເສດຖະກິດ (GDP) ສາມາດຂະຫຍາຍຕົວສະເລ່ຍໃນລະດັບ 5% ຄິດເປັນມູນຄ່າ 199,987 ຕື້ກີບ (ເທົ່າກັບ 48% ຂອງແຜນການປີ) ເຊິ່ງແຍກເປັນການເຕີບໂຕໃນໄຕມາດທີໜຶ່ງ 5.5% ແລະ ໄຕມາດທີສອງ 4.6% ສະທ້ອນໃຫ້ເຫັນເຖິງການຟື້ນຕົວທີ່ໝັ້ນຄົງຂອງຖານການຜະລິດ ແລະ ການບໍລິການພາຍໃນປະເທດ.
ເມື່ອເຈາະເລິກເຖິງພາກສ່ວນຂອງລາຍຮັບງົບປະມານແຫ່ງລັດ ພົບວ່າມີການຂະຫຍາຍຕົວຢ່າງກ້າວກະໂດດເຖິງ 19% ເມື່ອທຽບໃສ່ໄລຍະດຽວກັນຂອງປີກາຍ.
ປັດໄຈຫຼັກທີ່ຊຸກຍູ້ຄວາມສຳເລັດນີ້ແມ່ນມາຈາກການຈັດເກັບລາຍຮັບພາຍໃນທີ່ເຮັດໄດ້ດີເກີນຄາດເຖິງ 43,970 ຕື້ກີບ ໂດຍສູນກາງຮັບຜິດຊອບເກັບໄດ້ 31,531 ຕື້ກີບ ໃນຂະນະທີ່ທ້ອງຖິ່ນກໍສາມາດເກັບໄດ້ເຖິງ 12,439 ຕື້ກີບ.
ຜົນງານດັ່ງກ່າວເປັນໝາກຜົນໂດຍກົງຈາກການນຳໃຊ້ລະບົບທີ່ທັນສະໄໝເຂົ້າໃນການຈັດເກັບພາສີ-ອາກອນ ບວກກັບຄວາມເດັດຂາດໃນການອັດຊ່ອງຫວ່າງການຮົ່ວໄຫຼ ເຮັດໃຫ້ຖານລາຍຮັບຂອງລັດຖະບານເປີດກວ້າງ ແລະ ມີຄວາມໂປ່ງໃສຫຼາຍຂຶ້ນ ເຊິ່ງສາມາດທົດແທນລາຍຮັບຈາກການຊ່ວຍເຫຼືອລ້າທີ່ປະຕິບັດໄດ້ພຽງ 986 ຕື້ກີບ ຫຼື 19% ຂອງແຜນປີ.
ໃນຂະນະທີ່ການຂະຫຍາຍຖານລາຍຮັບກຳລັງດຳເນີນໄປໄດ້ດ້ວຍດີ ວຽກງານການຄຸ້ມຄອງລາຍຈ່າຍກໍຖືກປະຕິບັດດ້ວຍຄວາມຮັດກຸມຂັ້ນສູງສຸດ. ກະຊວງການເງິນສາມາດຄວບຄຸມການໃຊ້ຈ່າຍໃຫ້ຢູ່ໃນລະດັບ 30,126 ຕື້ກີບ ຫຼື ພຽງ 37% ຂອງແຜນການປີເທົ່ານັ້ນ (ແບ່ງເປັນສູນກາງ 23,037 ຕື້ກີບ ແລະ ທ້ອງຖິ່ນ 7,089 ຕື້ກີບ).
ງົບປະມານດັ່ງກ່າວຖືກນຳໃຊ້ຢ່າງກົງໄປກົງມາເຂົ້າໃນຂະແໜງການທີ່ຈຳເປັນຢ່າງຮີບດ່ວນ ເຊັ່ນ: ການເບີກຈ່າຍເງິນເດືອນ ແລະ ເງິນນະໂຍບາຍ, ການຊຳລະໜີ້ສິນເພື່ອຮັກສາຄວາມໜ້າເຊື່ອຖືຂອງປະເທດ ແລະ ການຮັບປະກັນການເຄື່ອນໄຫວຂອງກົງຈັກພັກ-ລັດ ໃຫ້ມີສະຖຽນລະພາບ.
ຈາກການດຸ່ນດ່ຽງລະຫວ່າງລາຍຮັບທີ່ລື່ນແຜນ ແລະ ລາຍຈ່າຍທີ່ຮັດກຸມນີ້ເອງ ເຮັດໃຫ້ເກີດມີການຄາດຄະເນທາງບວກທີ່ສຳຄັນວ່າ ໃນໝົດປີ 2026 ລັດຖະບານຈະສາມາດຄວບຄຸມລາຍຈ່າຍລວມໄວ້ທີ່ 81,400 ຕື້ກີບ ແລະ ອາດສ້າງງົບປະມານ “ເກີນດຸນ” ໄດ້ເຖິງ 2,200 ຕື້ກີບ ເຊິ່ງຖືເປັນສັນຍານແຫ່ງການຟື້ນຟູທາງການເງິນທີ່ຊັດເຈນ.
ເພື່ອຮັບປະກັນໃຫ້ຕົວເລກຄາດໝາຍໃນທ້າຍປີກາຍເປັນຄວາມຈິງ ທ່ານປະທານກອງປະຊຸມໄດ້ຮຽກຮ້ອງໃຫ້ທຸກພາກສ່ວນທັງຂັ້ນສູນກາງ ແລະ ທ້ອງຖິ່ນ ລົງເລິກຄົ້ນຄວ້າແກ້ໄຂຂໍ້ຄົງຄ້າງຢ່າງຈິງຈັງ.
ສິ່ງສຳຄັນທີ່ສຸດແມ່ນການຫັນເອົານະໂຍບາຍ “ສ້າງເສດຖະກິດເອກະລາດ ເປັນເຈົ້າຕົນເອງ” ຫຼຶ ສອຈ ເຂົ້າສູ່ວຽກງານຕົວຈິງໃນທຸກຂະແໜງການ ເຊິ່ງນະໂຍບາຍນີ້ຈະເປັນເຂັມທິດນຳທາງຍຸດທະສາດ ໃນການຫຼຸດຜ່ອນການເພິ່ງພາປັດໄຈພາຍນອກ ສ້າງຄວາມເຂັ້ມແຂງໃຫ້ແກ່ຖານການຜະລິດພາຍໃນປະເທດ ແລະ ສ້າງທ່າຫັນປ່ຽນໃໝ່ທີ່ຮອບດ້ານ ເພື່ອນຳພາເສດຖະກິດລາວກ້າວໄປສູ່ຄວາມໝັ້ນຄົງຢ່າງແທ້ຈິງ.
#LaoXperts #ກະຊວງການເງິນ #ເສດຖະກິດລາວ2026 #ເສດຖະກິດເອກະລາດ #ງົບປະມານເກີນດຸນ #ຂ່າວເສດຖະກິດມະຫາພາກ #ການເງິນລາວ
