ອີງຕາມການລາຍງານຂອງ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນໄລຍະ 9 ເດືອນຕົ້ນປີນີ້ ມີນັກທ່ອງທ່ຽວຕ່າງປະເທດ 2,4 ລ້ານຄົນ ເຂົ້າມາທ່ອງທ່ຽວລາວ ເພີ່ມຂຶ້ນ 285% ເມື່ອທຽບໃສ່ໄລຍະດຽວກັນຂອງປີກາຍ.
ໂດຍສະຖິຕິຈາກ ກົມການຕະຫຼາດການທ່ອງທ່ຽວ ຂອງກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເຜີຍໃຫ້ເຫັນວ່າ: ນັກທ່ອງທ່ຽວຈາກປະເທດອາຊຽນມີ 1,6 ລ້ານເທື່ອຄົນ, ໃນນັ້ນມີ 636,687 ຄົນຈາກພາກພື້ນອາຊີປາຊີຟິກ, ຢູໂຣບມີ 142,845 ຄົນ, ແລະ ອາເມຣິກາ 54,686 ຄົນ.
ຕົວເລກດັ່ງກ່າວສະແດງໃຫ້ເຫັນວ່າມີຄົນເຂົ້າມາລາວນັບມື້ນັບຫຼາຍຂຶ້ນຍ້ອນວ່າປັດຈຸບັນມີການເຂົ້າ, ອອກ ແລະ ເດີນທາງຜ່ານປະເທດງ່າຍຂຶ້ນ, ສະດວກກວ່າໃນການເດີນທາງຜ່ານທາງດ່ວນ ແລະ ການນຳໃຊ້ທາງລົດໄຟລາວ-ຈີນ.
ເສັ້ນທາງລົດໄຟເປັນເສັ້ນທາງທີ່ໂດ່ງດັງຫຼາຍໃນການເດີນທາງ ແລະ ຜ່ານແຂວງຫຼວງພະບາງ ແລະ ອຸດົມໄຊ, ເຊິ່ງມີຫຼາຍສະຖານທີ່ໃຫ້ນັກທ່ອງທ່ຽວສົນໃຈ, ລວມທັງພູມສັນຖານພູດອຍທີ່ສວຍງາມ, ທິວທັດຂອງຊີວິດຊົນນະບົດ ແລະ ກິດຈະກໍາການຜະຈົນໄພທີ່ຫຼາກຫຼາຍອັນເປັນທີ່ໝາຍປອງຂອງນັກທ່ອງທ່ຽວ.
ໃນການກະກຽມຕ້ອນຮັບປີ 2024, ເຈົ້າໜ້າທີ່ທ່ອງທ່ຽວ ແລະ ນັກທຸລະກິດໄດ້ປັບປຸງການບໍລິການຢູ່ໂຮງແຮມ, ເຮືອນພັກ ແລະ ຮ້ານອາຫານ ແລະ ໄດ້ເພີ່ມທະວີສິ່ງອຳນວຍຄວາມສະດວກໃຫ້ແກ່ນັກທ່ອງທ່ຽວໃຫ້ດີຂຶ້ນ ແລະ ມ່ວນຊື່ນກວ່າ.
ລັດຖະບານ ແລະ ວິສາຫະກິດທ້ອງຖິ່ນໄດ້ສົມທົບກັນຊຸກຍູ້ການທ່ອງທ່ຽວ ແລະ ເຂົ້າເຖິງຜູ້ຊົມຢ່າງກ້ວາງຂວາງໂດຍຜ່ານງານວາງສະແດງສາກົນ, ງານຕະຫຼາດນັດການທ່ອງທ່ຽວອາຊຽນ ແລະ ການພັດທະນາຜະລິດຕະພັນການທ່ອງທ່ຽວໃໝ່.
ໂດຍລັດຖະບານຫວັງວ່າປີໜ້າຈະມີນັກທ່ອງທ່ຽວທັງຕ່າງປະເທດ 4,6 ລ້ານຄົນເຂົ້າມາທ່ຽວຢູ່ລາວ, ສ້າງລາຍຮັບໄດ້ 712 ລ້ານໂດລາສະຫະລັດ. ລັດຖະບານໄດ້ຈັດຕັ້ງບັນດາລາຍການໂຄສະນາໃນໄລຍະ 25 ປີຜ່ານມາ ເພື່ອດຶງດູດນັກທ່ອງທ່ຽວ, ໃນນັ້ນມີ 2 ປີທ່ອງທ່ຽວລາວ, ປີທ່ອງທ່ຽວລາວ-ຈີນ, ເຊິ່ງໄດ້ດຶງດູດນັກທ່ອງທ່ຽວເປັນຈຳນວນຫຼວງຫຼາຍ.
ທີ່ມາ: vientianetimes
ຕິດຕາມຂ່າວທັງໝົດຈາກ LaoX: https://laox.la/all-posts/
