ກ້ວຍ ເປັນອີກໝາກໄມ້ຊະນິດໜຶ່ງທີ່ມີວິຕາມິນ ແລະ ແຮ່ທາດຫຼາຍຊະນິດທີ່ຮ່າງກາຍຕ້ອງການ ແລະ ເມື່ອບໍ່ດົນມານີ້ມີຜົນການວິໄຈພົບວ່າ ກ້ວຍດິບ ຫຼື ກ້ວຍຂຽວ ສາມາດຫຼຸດຄວາມສ່ຽງເປັນມະເຮັງຫຼາຍຊະນິດໄດ້ເຖິງ 60% ເຊິ່ງນີ້ເປັນການສະທ້ອນໃຫ້ເຫັນວ່າໝາກໄມ້ຊະນິດນີ້ຄວນມີໄວ້ຢູ່ເຮືອນ ແລະ ກິນທຸກມື້.
ໂດຍການສຶກສາມີຊື່ເອີ້ນວ່າ “CAPP2” ທົດລອງກັບກຸ່ມຕົວຢ່າງ 1000 ຄົນ ເຊິ່ງກຸ່ມຄົນເຫຼົ່ານີ້ມີຄວາມສ່ຽງສູງໃນການເປັນມະເຮັງປະເພດຕ່າງໆ ແລະ ໄດ້ພົບວ່າກຸ່ມຄົນທີ່ຮັບປະທານແປ້ງທົນທານຕໍ່ການຍ່ອຍ ຫຼື “Resistant Starch” ທີ່ມາຈາກ “ໝາກກ້ວຍດິບ” ເປັນເວລາ 2 ປີບໍ່ເປັນມະເຮັງລຳໄສ້ ແລະ ຫຼຸດຜ່ອນການເກີດມະເຮັງອື່ນໆໃນຮ່າງກາຍເກີນກວ່າເຄິ່ງ.
ນອກນັ້ນ, ຍັງມີຜົນການສຶກສາຕີພິມໃນວາລະສານການຄົ້ນຄວ້າ “Cancer Prevention” ທີ່ຕິດຕາມຄົນເຈັບມະເຮັງເປັນເວລາເຖິງ 10 ປີ ແລະ ໄດ້ລວບລວມຂໍ້ມູນສະຖິຕິຂອງຄົນເຈັບຄວບຄຸມຍາວເຖິງ 20 ປີ ຈາກຜູ້ເຂົ້າຮ່ວມ 369 ຄົນ ເຮັດໃຫ້ຮູ້ວ່າປະໂຫຍດຂອງໝາກກ້ວຍດິບຈະເຫັນຜົນຊັດເຈນໃນການປ້ອງກັນມະເຮັງຫຼອດອາຫານທາງເດີນນໍ້າດີ, ມະເຮັງຕັບອ່ອນ ແລະ ລຳໄສ້ນ້ອຍເປັນຕົ້ນ ເຊິ່ງປະສິດທິພາບໃນການປ້ອງກັນໂຣກສາມາດຢູ່ໄດ້ເຖິງ 10 ປີ.
ການຄົ້ນພົບຄັ້ງນີ້ຖືເປັນປະໂຫຍດທາງການແພດຫຼາຍ ໂດຍ John Mathers, ອາຈານຂອງໂພຊະນາການຂອງມະນຸດຢູ່ມະຫາວິທະຍາໄລ Newcastle ກ່າວວ່າ ແປ້ງທົນຕໍ່ການຍ່ອຍຊ່ວຍຫຼຸດການເກີດມະເຮັງໄດ້ຫຼາຍກວ່າ 60%, ໂດຍສະເພາະໃນສ່ວນເທິງຂອງລໍາໄສ້. ດັ່ງນັ້ນ, ການຄົ້ນພົບນີ້ຈຶ່ງມີຄວາມສໍາຄັນຫຼາຍ ຍ້ອນວ່າມະເຮັງກະເພາະລໍາໄສ້ເທິງແມ່ນຍາກທີ່ຈະກວດວິນິດໄສ ແລະ ມັກຈະກວດບໍ່ເຫັນງ່າຍ.
ຢ່າງໃດກໍຕາມ, ໃນປັດຈຸບັນນັກຄົ້ນຄວ້າກໍາລັງທົດລອງໂຄງການ “CAPP3” ເພື່ອສຶກສາຕື່ມອີກກ່ຽວກັບປະລິມານຂອງການໃຊ້ຢາສັງເຄາະແອສໄພລິນ (ຢາຫຼຸດຜ່ອນອາການປວດອັກເສບ) ໃນການປິ່ນປົວຄົນເຈັບເພື່ອໃນປະລິມານທີ່ນ້ອຍທີ່ສຸດ ແລະ ປອດໄພກວ່າ ກໍລະນີຕ້ອງໃຊ້ຢາເພື່ອຊ່ວຍຫຼຸດຜ່ອນຄວາມສ່ຽງຂອງມະເຮັງ.
ອ້າງອີງຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
