ຄາມາລາ ແຮຣິສ ສະມາຊິກສະພາສະຫະລັດອາເມຣິກາ ຈາກລັດຄາລິຟໍເນຍ ກຽມໂຕຂຶ້ນຮັບຕຳແໜ່ງ ຮອງປະທານາທິບໍດີຍິງ ຄົນທຳອິດໃນປະຫວັດສາດອາເມຣິກາ ຫຼັງຈາກ ໂຈ ໄບເດັນ ຊະນະການເລືອກຕັ້ງເປັນປະທານາທິບໍດີຂອງສະຫະລັດ.
ຄາມາລາ ແຮຣິສ ອາຍຸ 56 ປີ ເປັນແມ່ຍິງຊາວອາເມຣິກາຜິວສີ ແລະ ມີເຊື້ອສາຍຊາວອາຊີ ຄົນທຳອິດທີ່ໄດ້ຮັບເລືອກໃຫ້ລົງແຂ່ງຂັນຕຳແໜ່ງຮອງປະທານາທິບໍດີ ແລະ ປະສົບຜົນສຳເລັດ ກາຍເປັນແມ່ຍິງທີ່ດຳລົງຕຳແໜ່ງສູງສຸດທາງການເມືອງຂອງອາເມຣິກາ ໃນຊ່ວງເວລານີ້.
ຄາມາລາ ແຮຣິສ ເກີດທີ່ເມືອງ ໂອກແລນ ລັດຄາລິຟໍເນຍ ໂດຍພໍ່ຂອງລາວເປັນຊາວຈາໄມກາ ແລະ ແມ່ເປັນຊາວອິນເດຍ ຈົບຈາກມະຫາວິທະຍາໄລ Howard ໃນນະຄອນຫຼວງວໍຊິງຕັນ ແລະ ຈົບກົດໝາຍຈາກ ມະຫາວິທະຍາໄລຄາລິຟໍເນຍ.
ຄາມາລາ ແຮຣິສ ໄດ້ຮັບເລືອກຕັ້ງເຂົ້າສູ່ຕຳແໜ່ງທາງການເມືອງລະດັບທ້ອງຖິ່ນຄັ້ງທຳອິດເມື່ອປີ 2003 ໃນຖານະໄອຍະການເຂດນະຄອນຊານຟຣານຊິສໂກ ແລະ ຫຼັງຈາກນັ້ນອີກ 7 ປີຕໍ່ມາເມື່ອປີ 2010 ໄດ້ຮັບເລືອກເປັນໄອຍະການສູງສຸດຂອງລັດຄາລິຟໍເນຍ.
ໃນປີ 2016 ໄດ້ກ້າວເຂົ້າສູ່ເວທີການເມືອງລະດັບຊາດເປັນຄັ້ງທຳອິດ ໂດຍໄດ້ຮັບເລືອກເປັນນຶ່ງໃນສອງວຸດທິສະມາຊິກຍິງຜູ່ເປັນຕົວແທນຂອງລັດຄາລິຟໍເນຍ ເຖິງແມ່ນວ່າຈະດຳລົງຕຳແໜ່ງພຽງ 4 ປີ ລາວກໍຖືກຈັດຢູ່ໃນກຸ່ມບຸກຄົນທີ່ໂດດເດັ່ນໃນພັກ Democrat.
ການດຳລົງຕຳແໜ່ງຂອງ ຄາມາລາ ແຮຣິສ ຖືກເບິ່ງວ່າ ເປັນຈຸດປະກາຍແຫ່ງຄວາມຫວັງທາງການເມືອງຂອງບັນດາແມ່ຍິງທົ່ວປະເທດ ຫຼັງຈາກ ຮິວລາຣີ ຄລິນຕັນ ປະລາໄຊໃຫ້ແກ່ ທຣຳ ໃນການເລືອກຕັ້ງປະທານາທິບໍດີເມື່ອ 4 ປີກ່ອນ.
ຂອບໃຈຂໍ້ມູນຈາກ:
https://www.voathai.com/a/kamala-harris-profile/5652056.html
