UN ເຕືອນ​ເຖິງ​ລະດັບ​ນ້ຳ​ທະ​ເລ​ທີ່​ເພີ່ມ​ຂຶ້ນ ພ້ອມລະບຸວ່າ ສິ່ງນີ້ປຽບເໝືອນການລົງໂທດປະຫານຊີວິດສໍາລັບປະຊາຊົນໃນປະເທດທີ່ມີຄວາມສ່ຽງ

UN ເຕືອນ​ເຖິງ​ລະດັບ​ນ້ຳ

ບັນຫາໂລກຮ້ອນ ຍັງເປັນອີກໜຶ່ງບັນຫາທີ່ມະນຸດເຮົາຍັງແກ້ໄຂບໍ່ຕົກ ແລະ ບັນຫານີ້ມີທ່າອ່ຽງຈະເພີ່ມຄວາມຮຸນແຮງຂຶ້ນເລື້ອຍໆ. ຫຼ້າສຸດ ທ່ານ ອັນໂຕນິໂອ ກູຕາເຣສ (Antonio Guterres) ເລຂາທິການໃຫຍ່ອົງການສະຫະປະຊາຊາດ (UN) ໄດ້ອອກແຈ້ງເຕືອນເຖິງໄພຂົ່ມຂູ່ຂອງລະດັບນໍ້າທະເລທີ່ສູງຂຶ້ນ ໂດຍມັນສົ່ງຜົນກະທົບຕໍ່ປະຊາຊົນຫຼາຍຮ້ອຍລ້ານຄົນທີ່ອາໄສຢູ່ໃນເຂດແຄມຝັ່ງທະເລ ແລະ ປະເທດທີ່ເປັນເກາະນ້ອຍໆ. ຫຼັງຈາກຂໍ້ມູນຊຸດໃໝ່ຊີ້ໃຫ້ເຫັນວ່າລະດັບນ້ຳທະເລໃນປັດຈຸບັນໄດ້ເພີ່ມຂຶ້ນຢ່າງໄວວານັບແຕ່ປີ 1900 ເປັນຕົ້ນມາ.

ທ່ານ ກູຕາເຣສ ໄດ້ກ່າວໃນກອງປະຊຸມສະພາຄວາມໝັ້ນຄົງສະຫະປະຊາຊາດ (UNSC) ກ່ຽວກັບຜົນກະທົບຂອງລະດັບນໍ້າທະເລທີ່ສູງຂຶ້ນຕໍ່ສັນຕິພາບ ແລະ ຄວາມປອດໄພສາກົນທີ່ປະເທດຕ່າງໆເຊັ່ນ: ບັງກະລາເທດ, ຈີນ, ອິນເດຍ ແລະ ເນເທີແລນໃນເວລານີ້ກໍາລັງຖືກຂົ່ມຂູ່, ເຊັ່ນດຽວກັບບັນດາເມືອງໃຫຍ່ໆເຊັ່ນ: ນະຄອນຫຼວງ ບົວໂນສໄອເຣສ, ຈາກາຕາ, ລາໂກສ, ລອນດອນ, ລອສແອງເຈີລິສ, ມຸມໄບ, ມາປູໂຕ, ນິວຢອກ ແລະ ຊຽງໄຮ້ ກໍກໍາລັງປະເຊີນໜ້າກັບຄວາມທ້າທາຍເຊັ່ນກັນ.

UN ເຕືອນ​ເຖິງ​ລະດັບ​ນ້ຳ

ທ່ານ ເລຂາທິການໃຫຍ່ອົງການສະຫະປະຊາຊາດຍັງໄດ້ກ່າວອີກວ່າ ການປ່ຽນແປງຂອງດິນຟ້າອາກາດສົ່ງຜົນໃຫ້ໂລກຮ້ອນຍິ່ງຂຶ້ນ ນ້ຳກ້ອນ ແລະ ແຜ່ນນ້ຳແຂງລະລາຍລົງຢ່າງໄວວາ. ຂໍ້ມູນຈາກອົງການ NASA ເປີດເຜີຍວ່ານ້ຳແຂງຂອງ ແອນຕາກຕິກາ ລະລາຍ ປະມານ 1,5 ແສນລ້ານໂຕນ ຕໍ່ປີໂດຍສະເລ່ຍ. ໃນຂະນະດຽວກັນ ນ້ຳແຂງໃນເກາະກຣີນແລນ ກໍກໍາລັງລະລາຍຢ່າງວ່ອງໄວເຖິງປະມານ 2,7 ແສນລ້ານໂຕນ ຕໍ່ປີ.

UN ເຕືອນ​ເຖິງ​ລະດັບ​ນ້ຳ

ນອກຈາກນີ້ ທ່ານ ກູຕາເລສ ຍັງກ່າວຕື່ມວ່າອຸນຫະພູມທະເລໃນປັດຈຸບັນໄດ້ມີຄວາມຮ້ອນຫຼາຍຂຶ້ນຢ່າງໄວວາ ໃນໄລຍະທີ່ຜ່ານມາ, ຫຼາຍກວ່າເວລາໃດໆໃນຮອບ 11,000 ປີ ແລະ ອຸນຫະພູມສະເລ່ຍຂອງໂລກແມ່ນເກີນຂອບເຂດຂີດຈຳກັດຄວາມຮ້ອນ, ເຊິ່ງຢູ່ທີ່ປະມານ 1,5 ອົງສາ ເມື່ອທຽບໃສ່ໄລຍະການປະຕິວັດອຸດສາຫະກໍາ. ແຕ່ປັດຈຸບັນມີທ່າອ່ຽງວ່າມັນອາດຈະຖີບຕົວສູງຂຶ້ນເຖິງ 2,8 ອົງສາ. ຖ້າເປັນແບບນັ້ນ, ມັນອາດຈະບໍ່ແຕກຕ່າງຈາກໂທດປະຫານຊີວິດສໍາລັບຄົນໃນປະເທດທີ່ມີຄວາມສ່ຽງ ນີ້ອາດເຮັດໃຫ້ເກີດການຍົກຍ້າຍຢ່າງໃຫຍ່ຫຼວງຂອງປະຊາກອນໂລກ.

UN ເຕືອນ​ເຖິງ​ລະດັບ​ນ້ຳ

ພ້ອມນີ້ ທ່ານ ກູຕາເລສ ຍັງເນັ້ນອີກວ່າ ວິກິດການດ້ານດິນຟ້າອາກາດຕ້ອງໄດ້ຮັບການແກ້ໄຂໃນສາເຫດຕົ້ນຕໍຄືການລົດຜ່ອນການປ່ອຍອາຍແກ໊ສເຮືອນແກ້ວ, ຈໍາກັດຂອບເຂດຂອງຄວາມຮ້ອນຂອງໂລກ ແລະ ການພັດທະນາລະບົບເຕືອນໄພທໍາມະຊາດລ່ວງໜ້າ, ຊຸກຍູ້ໃຫ້ມີກົດໝາຍ ແລະ ຫຼັກການສິດທິມະນຸດ. ເພື່ອຮອງຮັບການຍົກຍ້າຍປະຊາຊົນ ລວມທັງການສູນເສຍທີ່ດິນ ແລະ ບ່ອນຢູ່ອາໄສໃນອະນາຄົດ.

ຂອບໃຈຂໍ້ມູນຈາກ:

ຕິດຕາມຂ່າວທັງໝົດຈາກ LaoX: https://laox.la/all-posts/