Jeff Guenther ນັກບຳບັດຄວາມສຳພັນຊື່ດັງ ເຈົ້າຂອງບັນຊີ therapyjeff ໃນ Instagram ແລະ TikTok ທີ່ມີຜູ້ຕິດຕາມຫຼາຍລ້ານຄົນ ຊີ້ວ່າ ແອັບພິເຄຊັນຫາຄູ່ຍຸກໃໝ່ທີ່ເຮັດໃຫ້ Gen Z ເລືອກຫຼາຍເກີນໄປ.
Jeff Guenther ໄດ້ໃຫ້ສຳພາດກັບ CNBC Make It ວ່າ Gen Z ຕັ້ງສະເປັກສູງເກີນໄປ ເພາະແອັບຫາຄູ່ເຮັດໃຫ້ກັ່ນຕອງຄົນໄດ້ງ່າຍ ພຽງແຕ່ຮູບຮ່າງໜ້າຕາ ຫຼື ສ່ວນສູງບໍ່ຖືກໃຈກໍປັດຖິ້ມ.
ບາງເທື່ອເຮົາກໍຕັ້ງສະເປັກສູງ ຢຶດຕິດກັບສິ່ງທີ່ຕົນເອງຕ້ອງການຫຼາຍເກີນໄປ ຈົນປິດໂອກາດທີ່ຈະພົບກັບຄົນທີ່ແຕກຕ່າງກັນ.
Jeff Guenther ກ່າວວ່າ: ແອັບຫາຄູ່ທີ່ເຮົານຳໃຊ້ທຸກມື້ນີ້ບໍ່ເໝາະສົມກັບການຫາຄູ່ແທ້.
ຕົວຢ່າງຄືເລື່ອງສ່ວນສູງ ຫຼາຍຄົນປັດຖິ້ມຄົນທີ່ສູງບໍ່ຮອດ 180 cm ທັ້ງໆທີ່ມີຜູ້ຊາຍພຽງ 11% ເທົ່ານັ້ນທີ່ມີສ່ວນສູງເທົ່ານີ້.
ຂໍ້ມູນຈາກເວັບໄຊຫາຄູ່ The League ໃນປະເທດອາເມຣິກາ ຜູ້ຍິງບລັອກຄູ່ທີ່ຈັບໄດ້ 70% ທຽບໃສ່ຜູ້ຊາຍທີ່ບລັອກ 55% ເຫດຜົນຫຼັກໆກໍແມ່ນເລື່ອງຂອງສ່ວນສູງ ແລະ ອາຍຸ.
ເມື່ອຄົນຮຸ່ນໃໝ່ຕັ້ງຄວາມຫວັງໄວ້ສູງ ກໍຍິ່ງເຮັດໃຫ້ກັງວົນວ່າຈະຫາຮັກແທ້ໄດ້ບໍ່ ຜົນສຳຫຼວດຈາກ EduBirdie ເຜີຍວ່າ 1 ໃນ 4 ຂອງ Gen Z ກັງວົນວ່າຈະບໍ່ມີຄູ່ ແລະ 22% ເບິ່ງວ່າການຫາຄູ່ຊິວິດເປັນເລື່ອງຍາກ.
ນອກຈາກນີ້ Gen Z ຍັງຫາຈຸດທີ່ເຮັດໃຫ້ໝົດຄວາມສົນໃຈໃນຕົວອີກຝ່າຍ ເຊິ່ງເປັນເທຣນໃນໂລກໂຊຊຽວມີເດຍທີ່ຫຼາຍຄົນແຊຣ໌ປະສົບການວ່າ ແມ່ນຫຍັງທີ່ໃຫ້ເຊົາມັກຄົນໆໜຶ່ງຕັ້ງແຕ່ເລື່ອງນ້ອຍໆເຊັ່ນ ອີໂມຈິທີ່ໃຊ້ ຈົນໄປເຖິງເມນູອາຫານທີ່ສັ່ງ.
ແອັບຫາຄູ່ມັນຄືກັບແຮງດຶງດູດບາງຢ່າງ ເຖິງພວກເຂົາຈະຢູ່ໃນຄວາມສຳພັນກັບຄົນທີ່ດີຢູ່ແລ້ວ ແຕ່ກໍຍັງກັບໄປຫຼິ້ນແອັບຫາຄູ່ ເພື່ອພົບກັບຄົນທີ່ດີກວ່າ. Jeff Guenther ກ່າວ ການມີຕົວເລືອກຫຼາກຫຼາຍຢູ່ແອັບຫາຄູ່ເຮັດໃຫ້ຄົນ Gen Z ປະຕິເສດຄົນອື່ນງ່າຍເກີນໄປ.
ສະຫຼຸບແລ້ວແອັບຫາຄູ່ເຮັດໃຫ້ Gen Z ເລືອກຫຼາຍເກີນໄປ ຈົນພາດໂອກາດພົບກັບຄົນດີໆ ເພາະໄປໂຟກັດຜິດຈຸດ.
ຕິດຕາມຂ່າວທັງໝົດຈາກ LaoX: https://laox.la/all-posts/
