ໝາເປັນສັດສີ່ຂາທີ່ຫຼາຍຄົນຫຼົງຮັກ ໃນຄວາມໜ້າຮັກຂອງມັນ, ຫຼາຍຄົນຫຼາຍຄອບຄົວກໍນຳເອົາມາລ້ຽງ ເພື່ອໃຫ້ເຝົ້າເຮືອນ ຫຼື ເອົາມາເປັນໝູ່ໃນຍາມເຫງົາ, ແຕ່ວ່າຍັງມີໝາຫຼາຍສາຍພັນ ທີ່ໄດ້ມີກົດໝາຍອອກມາຫ້າມບໍ່ໃຫ້ລ້ຽງໂດຍເດັດຂາດ ເພາະອາດຈະນຳອັນຕະລາຍມາສູ່ຕົນເອງ ແລະ ຄົນອື່ນ, ເຊິ່ງມີຢູ່ 12 ສາຍພັນໝາທີ່ບໍ່ໃຫ້ລ້ຽງ ເປັນຕົ້ນແມ່ນມີດັ່ງຕໍ່ໄປນີ້:
12. Perro de Presa Canario ໝາພັນນີ້ເປັນໝາທີ່ໃຈຮ້າຍ ມີແຮງກັດເຖິງ 540 psi, ປະກອບກັບເປັນໝາທີ່ກັດແລ້ວບໍ່ຍອມປ່ອຍ ຈະກັດຢູ່ນັ້ນ ຖ້າຄົນໃດຄົນໜຶ່ງທີ່ຖືກກັດຖືວ່າເປັນເຫຍື່ອຖືກໂຊກຮ້າຍທີ່ສຸດ. ໃນຄວາມໂຫດຂອງມັນ ຈຶ່ງເປັນສາເຫດທີ່ເຮັດໃຫ້ລັດຖະບານ ອອສເຕເລຍ ແລະ ນິວຊີແລນ ສັ່ງຫ້າມບໍ່ໃຫ້ລ້ຽງ, ຖືກຂຶ້ນບັນຊີດຳໃນສະຫະລັດອາເມຣິກາ ເນື່ອງຈາກວ່າມັນເໝາະກັບການຕໍ່ສູ້ຫຼາຍກວ່າທີ່ຈະເປັນສັດລ້ຽງທົ່ວໄປ ເຊິ່ງໃຜກໍອາດຈະບໍ່ກ້າຢອກສັດທີ່ມີອາລົມຂຶ້ນໆລົງໆນຳອີກ.
![](https://laox.la/wp-content/uploads/2021/03/Untitled-design-3-1024x683.png)
11. Fila Brasileiro ເປັນອີກໝາປະເພດໜຶ່ງ ທີ່ບໍ່ຜ່ານວີຊ່າໃນຫຼາຍໆປະເທດ ຢ່າງເຊັ່ນ: ໃນສະຫະຣາຊະອານາຈັກ ເຖິງກັບອອກກົດໝາຍຫ້າມລ້ຽງສັດປະເພດນີ້ໂດຍເດັດຂາດ. ໃນປະເທດເດນໝາກ, ນໍເວ ແລະ ຫຼາຍລັດໃນສະຫະລັດ ກໍຕັ້ງເງື່ອນໄຂໃນການນຳເຂົ້າ ເນື່ອງຈາກເປັນໝາທີ່ມັກໃນການລ່າ, ເດົາໃຈຍາກ ແລະ ໃຈຮ້ອນງ່າຍ. ນອກຈາກນີ້ ຖ້າຫາກຢາກທີ່ຈະສອນໃຫ້ມັນເຊື່ອຟັງງ່າຍໆແລ້ວ ໃນໄລຍະ 6 ເດືອນທຳອິດຕ້ອງສອນນິໄສໃຈຄໍມັນ ໂດຍຜູ້ຊ່ຽວຊານສະເພາະດ້ານໝາເທົ່ານັ້ນ ແລະ ຫາກໃຜທີ່ໄດ້ລ້ຽງໝາປະເພດນີ້ ບໍລິສັດປະກັນໄພກໍຕ້ອງຍົກເລີກສັນຍາໄດ້ ເພາະຮູ້ສຶກວ່າການທີ່ຢູ່ຮ່ວມກັນກັບໝາທີ່ດຸຮ້າຍ ມີຄວາມສ່ຽງສູງ ເຊິ່ງຈະບໍ່ກຸ້ມຄ່າກັບເງິນທີ່ເສຍໄປ.
![](https://laox.la/wp-content/uploads/2021/03/Untitled-design-19-1024x683.png)
10. Molosso Presa Mayo ເປັນໝາສາຍພັນໃໝ່ທີ່ປະສົມດ້ວຍ 3 ສາຍພັນ, ເຊິ່ງເຫັນພາຍນອກກໍເປັນຕາຢ້ານແລ້ວ ທັງກຳລັງແຮງທີ່ດຸຮ້າຍ ແລະ ໂຕໃຫຍ່ ພ້ອມມີນ້ຳໜັກ 59-77 ກິໂລກຼາມ ເກືອບເທົ່າກັບຄົນເລີຍ ເຖິງແມ່ນວ່າຈະບອກວ່າມັນເປັນສັດທີ່ສະຫຼາດ, ຈົງຮັກພັກດີຕໍ່ເຈົ້າຂອງ ແລະ ມີພະລັງຫຼາຍກໍຕາມ ແຕ່ກະແສບາງສ່ວນກໍຍັງໂຕ້ຕອບວ່າມັນດຸຮ້າຍຫຼາຍ ອາດເຮັດໃຫ້ເສຍຊີວິດໄດ້, ຈຶ່ງໄດ້ຕໍ່ຕ້ານບໍ່ໃຫ້ໝາພັນນີ້ນຳເຂົ້າໃນຫຼາຍໆປະເທດ ເນື່ອງຈາກວ່າມັນຂ້ອນຂ້າງເປັນໝາທີ່ໃຈຮ້າຍ. ແຕ່ທັງນີ້ທັງນັ້ນ ເຈົ້າຂອງກໍຍັງມີການຢືນຢັນວ່າ ກຳລັງປັບປຸງກຳລັງສາຍພັນນີ້ ໃຫ້ເໝາະສົມກວ່າເກົ່າ, ສ່ວນຈະອອກມາແບບໃດນັ້ນ ຕ້ອງຖ້າເບິ່ງກັນຕໍ່ໄປ.
![](https://laox.la/wp-content/uploads/2021/03/image-348.png)
9. Dobermann ເປັນໝາທີ່ຂ້ອນຂ້າງດຸຮ້າຍ ແຂ້ວຂອງມັນສາມາດກັດລູກເທນນິດແຕກໄດ້, ແຕ່ໃນຄວາມເປັນຈິງແລ້ວ ມັນບໍ່ໃຈຮ້າຍຢ່າງທີ່ຄິດ ແລະ ບໍ່ຄ່ອຍຈະທຳຮ້າຍຄົນ ເມື່ອທຽບກັບໝາພັນອື່ນໆ, ແຖມຍັງເຝິກຝົນງ່າຍກວ່າສັດຊະນິດອື່ນອີກ ແລະ ຍັງເປັນໝາທີ່ຕຳຫຼວດມັກເອົາມາລ້ຽງ ເພື່ອຊ່ວຍເຂົ້າໃນວຽກງານທີ່ກ່ຽວຂ້ອງ ເຖິງຈະມີຂໍ້ດີຫຼາຍກວ່າສາຍພັນອື່ນ ແຕ່ກໍຍັງມີຫຼາຍປະເທດທີ່ໄດ້ສັ່ງແບນ ແລະ ຈຳກັດການລ້ຽງ.
![](https://laox.la/wp-content/uploads/2021/03/image-349.png)
8. American Bandogge ໂຕໃຫຍ່ກ້າມໃຫຍ່ ແລະ ໂຫດ ເບິ່ງຄືວ່າອາດຈະເບິ່ງຄືໜ້າຮັກໃນສາຍຕາຄົນທີ່ຮັກໝາ ແຕ່ໃນຄວາມເປັນຈິງແລ້ວມັນດື້ ແລະ ມີກຳລັງແຮງຢ່າງຫຼວງຫຼາຍ ຖ້າຫາກວ່າບໍ່ພາມັນໄປແລ່ນໃນສະຖານທີ່ໃດໜຶ່ງທີ່ບໍ່ແມ່ນເຮືອນ ມັນກໍຈະທຳລາຍສິ່ງຂອງຕ່າງໆທີ່ຢູ່ໃນເຮືອນຈົນໝົດ ແລະ ຍິ່ງຮ້າຍໄປກວ່ານັ້ນ ເວລາທີ່ມັນເຫັນຄົນແປກໜ້າມັນຈະກັດບໍ່ປ່ອຍແລ້ວຈະບໍ່ເຫົ່າເລີຍ ຄວາມເລິກໃນການກັດສາມາດເຮັດໃຫ້ຂາຂາດໄດ້ ຖ້າຫາກວ່າບໍ່ຊ່ວຍ. ເປັນໂຕອັນຕະລາຍເຖິງຂະໜາດຖືກແບນໃນປະເທດສະວິດເຊີແລນ ແລະ ສະຫະລັດອາເມຣິກາ, ເຖິງແມ່ນວ່າຫຼາຍປະເທດບໍ່ໄດ້ສັ່ງຫ້າມ ແຕ່ເຈົ້າຂອງກໍຕ້ອງລ້ຽງໂດຍຕ້ອງມີຄວາມຮັບຜິດຊອບ.
![](https://laox.la/wp-content/uploads/2021/03/image-350.png)
7. Staffordshire Bull Terrier ເປັນໝາມີຂະໜາດໂຕຂ້ອນຂ້າງນ້ອຍ ແຕ່ມັນສາມາດແລ່ນໄດ້ໄວ ແລະ ຖ້າມີການທ້າທາຍໃດຂຶ້ນ ຈະແລ່ນນຳໂດຍທີ່ບໍ່ຢຸດພັກເລີຍກໍວ່າໄດ້ ເນື່ອງຈາກວ່າໝາພັນນີ້ບໍ່ໄດ້ໃຈດີຢູ່ແລ້ວ, ຫາກບໍ່ໄດ້ຮັບການເຝິກທີ່ດີ ມັນຈະບໍ່ເປັນມິດກັບຄົນໂດຍງ່າຍໆ, ສາມາດໄລ່ຄົນ ຫຼື ສັດໂຕນ້ອຍໆຮອບບ້ານເຊັ່ນ: ນົກ, ແມວ, ໜູ ຈຶ່ງຖືກສັ່ງຫ້າມລ້ຽງໃນປະເທດ ເຢຍລະມັນ ແລະ ສະວິດເຊີແລນໂດຍເດັດຂາດ ສ່ວນປະເທດອື່ນໆເຊັ່ນ: ໄອແລນ, ສະເປນ ລວມເຖິງຝຣັ່ງເສດ ກໍບໍ່ໄດ້ຫ້າມ ແຕ່ກໍຈຳກັດການລ້ຽງ.
![](https://laox.la/wp-content/uploads/2021/03/image-351.png)
6. Tosa ken ເປັນໝານັກສູ້ປະເທດຢີ່ປຸ່ນ ເປັນສາຍລູກປະສົມທີ່ເປັນຕາຢ້ານຫຼາຍ ມີຄວາມອົດທົນສູງ, ຄວາມສູງແມ່ນ 62-82 cm ເຊິ່ງສ້າງສາຍພັນນີ້ມາໂດຍສະເພາະລ່າສັດປ່າ, ສະໄຕລ໌ການໂຈມຕີ ແລະ ລັກສະນະໃນການໂຈມຕີແມ່ນບໍ່ຄ່ອຍຈະສົ່ງສຽງ. ນອກນີ້ ກໍຍັງເປັນສັດທີ່ຜິດກົດໝາຍໃນອັງກິດ ຖ້າຫາກພົບເຫັນອາດຈະເກີດເລື່ອງໃຫຍ່ ແລະ ຖ້າຫາກຕຳຫຼວດພົບໝາພັນນີ້ ກໍສາມາດຂຶ້ນຟ້ອງຮ້ອງເຖິງຂັ້ນສານໄດ້ ຖ້າພິຈາລະນາມາແລ້ວວ່າມັນເປັນສັດທີ່ດຸຮ້າຍ ບໍ່ແມ່ນສາຍພັນທີ່ອະນຸຍາດ ຫຼື ອາດຈະຂັງໂຕໝານີ້ໄວ້ ສ່ວນເຈົ້າຂອງກໍຖືກປັບໃໝດ້ວຍເງິນ ພ້ອມຈຳຄຸກ 6 ເດືອນ.
![](https://laox.la/wp-content/uploads/2021/03/image-352.png)
5. Boerboel ເປັນໝາທີ່ຖືກໃຊ້ໃຫ້ເຝົ້າຟາມງົວ ມີກຳລັງທີ່ແຂງແຮງ ມີການຫວງແຫນອານາເຂດ, ໂຕໃຫຍ່ ເມື່ອພາໄປໃສກໍຕ້ອງໄດ້ອັດປາກມັນໄວ້ ເພື່ອບໍ່ໃຫ້ໄປກັດຄົນອື່ນ, ມີຫຼາຍປະເທດທີ່ອອກກົດໝາຍຄວບຄຸມທີ່ໃຫ້ສາມາດລ້ຽງໄດ້ ເຊັ່ນ: ປະເທດໂຣມາເນຍ ຄົນທີ່ຈະລ້ຽງຕ້ອງມີອາຍຸ 18 ປີຂຶ້ນໄປ, ທີ່ປະເທດສິງກະໂປແມ່ນເຈົ້າຂອງຕ້ອງໄດ້ເຮັດປະກັນໄວ້ຕາມລາຄາທີ່ກຳນົດ.
![](https://laox.la/wp-content/uploads/2021/03/image-353.png)
4. Bully Kutta ເປັນໝາສາຍພັນທີ່ມີຂະໜາດໂຕໃຫຍ່ເກືອບເທົ່າກັບຄົນ ເຮັດໃຫ້ຄົນສ່ວນຫຼາຍຈະຢ້ານ, ສູງເຖິງ 86 CM, ມີນິໄສທີ່ຮຸນແຮງ, ໃຈຮ້າຍຫຼາຍ ຂະໜາດສັດຕະວະແພດໃນອິນເດຍ ເຖິງກັບບອກເລີຍວ່າມັນຕ້ອງຢູ່ກັບເຈົ້າຂອງ ທີ່ຜ່ານການເບິ່ງແຍງລ້ຽງດູແລ້ວ ຈຶ່ງຈະຮູ້ໃຈຂອງມັນ, ແຕ່ວ່າມີການລະບຸໄວ້ວ່າແມ່ນສັດທີ່ຜິດກົດໝາຍ ໃນປະເທດອິນເດຍ ແລະ ປາກິດສະຖານ.
![](https://laox.la/wp-content/uploads/2021/03/image-354.png)
3. Neapolitan Mastiff ມີລັກສະນະຮູບຮ່າງໃຫຍ່ ສີຈະອອກສີດຳໆ ແລະ ສີອື່ນໆ, ຫູຕູບໆ, ປາກກວ້າງໆ, ສົບຍານໆ, ມີນິໄສທີ່ຮ້າຍ ແລະ ທຳຮ້າຍສັດນ້ອຍໆໄດ້, ສາມາດແກ່ຄົນໄດ້ອີກດ້ວຍ ເຢຍລະມັນ ແລະ ສະຫະລັດອາເມຣິກາ ສັ່ງຫ້າມບໍ່ໃຫ້ລ້ຽງ.
![](https://laox.la/wp-content/uploads/2021/03/image-355.png)
2. Pit Bull ເປັນພັນທີ່ມີຮູບຮ່າງໃຫຍ່ພໍສົມຄວນ ເປັນໝາທີ່ມີຄວາມບໍ່ຊັດແຈ້ງໃນເລື່ອງນິໄສໃຈຄໍ ແຕ່ສ່ວນໃຫຍ່ແລ້ວເຮົາຈະເຫັນຄວາມຮ້າຍຂອງມັນ ແລະ ປະເທດເຢຍລະມັນ ກໍສັ່ງຫ້າມບໍ່ໃຫ້ລ້ຽງ, ພ້ອມມີການຈຳກັດການລ້ຽງໃນຫຼາຍໆປະເທດ ຕ້ອງໃສ່ແນວອັດປາກ. ແຕ່ກໍມີຄົນຕັ້ງຂໍ້ສັງເກດວ່າທີ່ຈິງແລ້ວມັນກໍອາດຈະຄືໝາພັນອື່ນທີ່ບາງຄັ້ງກໍຂຶ້ນຢຸູ່ກັບຄົນລ້ຽງ ແຕ່ສ່ວນຫຼາຍຄົນຈະຄິດວ່າໝາພັນນີ້ ເປັນໂຕກັດຕະຫຼອດ.
![](https://laox.la/wp-content/uploads/2021/03/image-356.png)
1. Rottweiler ຖ້າເວົ້າເຖິງໝາທີ່ໃຈຮ້າຍ ກໍຕ້ອງແມ່ນພັນນີ້ທີ່ຫຼາຍຄົນຄິດວ່າ ມັນໂຫດ ກັດບໍ່ຍອມປ່ອຍ ພ້ອມກັດຄົນທີ່ແປກໜ້າສະເໝີ ເຊິ່ງຈັດຢູ່ໃນລະດັບທີ່ອັນຕະລາຍ ຈົນປະເທດ ເອກົວດໍແລະ ເກາະເບີມິວດາ ໃນອັງກິດ ກໍສັ່ງແບນສາຍພັນນີ້. ສ່ວນໃນຫຼາຍປະເທດເຊັ່ນ: ໄອແລນ, ໂຣມາເນຍ ແລະ ສິງກະໂປ ສັ່ງໃຫ້ລ້ຽງໃນພື້ນທີ່ໃນຈຳກັດ. ເຖິງແມ່ນວ່າໝາພັນນີ້ອາດຈະມີລັກສະນະນິໄສທີ່ສະຫຼາດ ແລະ ເປັນມິດ ແຕ່ເພື່ອຄວາມປອດໄພກໍຕ້ອງປ້ອງກັນໄວ້ກ່ອນ.
![](https://laox.la/wp-content/uploads/2021/03/image-357.png)
ຂອບໃຈຂໍ້ມູນຈາກ: