ຖືວ່າເປັນຈຸດໝາຍສຳຄັນຂອງວົງການເທັນນິສລາວ ທີ່ໄດ້ສົ່ງນັກກິລາ ແລະ ຄູເຝິກ ລວມ 6 ຄົນ ໄປເຂົ້າຮ່ວມແຂ່ງຂັນເທັນນິສທີມຊາຍ ຊິງແຊ້ມໂລກ ຫຼື ລາຍການ Davis Cup ເປັນຄັ້ງທຳອິດ ໃນປະຫວັດສາດ ທີ່ປະເທດບາເຣນ ເຊິ່ງນຳໂດຍ ທ່ານ ວົງສະຫວັດ ຈັນສົມພູ ຫົວໜ້າທີມ ພ້ອມດ້ວຍຄູເຝິກຊາວສິງກະໂປ, ທ່ານ ອາລັນ ວ໋ອງ (Alan Voung) ແລະ ນັກກິລາ 4 ຄົນ ປະກອບມີ ທ.ວິທະຍາ ຣາຊາວະດີ, ທ.ສະຖາພອນ ສິມມາລາວົງ, ທ.ສົມພອນ ຊົງວິໄລ ແລະ ທ. ໄຊສະຫວັດ ຈັນຊົມພູ.
![ນັກກິລາເທັນນິສລາວ](https://laox.la/wp-content/uploads/2022/10/image-203.png)
ໂອກາດນີ້, ທ່ານ ວົງສະຫວັດ ຈັນສົມພູ ຫົວໜ້າທີມຊາດລາວຊຸດນີ້ ກ່າວວ່າ: “ຄະນະນັກກິລາລາວທຸກຄົນ ແມ່ນມີຄວາມພ້ອມເຕັມຮ້ອຍ ທັງພະລະກຳລັງ ແລະ ຈິດໃຈ ພ້ອມສູ້ຊົນສ້າງຜົນງານໃຫ້ດີທີ່ສຸດ ເພື່ອເກັບຄະແນນອັນດັບໂລກທີ່ດີກັບມາ ຂະນະທີ່ທາງດ້ານ ວິທະຍາ ຣາຊາວະດີ ນັກເທັນນິສ ມື 1 ຂອງລາວ ກໍສະແດງຄວາມດີໃຈ ທີ່ໄດ້ເປັນຕົວແທນຂອງທີມຊາດລາວ ເຂົ້າຮ່ວມລາຍການນີ້ຄັ້ງທຳອິດ ຈະພະຍາຍາມສູ້ສຸດຄວາມສາມາດ ເພື່ອຍາດແຍ່ງຜົນງານໃຫ້ດີທີ່ສຸດ”.
ສ່ວນທ່ານ ດາວວອນ ພະຈັນທະວົງ ໃຫ້ສຳພາດວ່າ: “ລາຍການນີ້ ສະຫະພັນພວກເຮົາເຄີຍສົ່ງນັກກິລາຍິງເຂົ້າຮ່ວມແຂ່ງຂັນມາກ່ອນ ເຊິ່ງນັກກິລາຊາຍ ເນື່ອງຈາກພວກເຮົາເປັນສະມາຊິກຊັ້ນສອງ ຈຶ່ງໄດ້ສິດເຂົ້າຮ່ວມແຂ່ງຂັນ ແລະ ກໍເປັນຄັ້ງທຳອິດທີ່ໄດ້ເຂົ້າຮ່ວມລາຍການນີ້ ໂດຍໄດ້ຮັບທຶນສະໜັບສະໜູນຈາກສະຫະພັນເທັນນິສສາກົນ ຫຼື (ITF) ເຊິ່ງທີ່ພາກພູມໃຈທີ່ສຸດຄືເຫັນທຸງຊາດລາວ ປິວສະບັດຜ່ານສາຍຕາມວນຊົນໃນເວທີໂລກ ເຊິ່ງເປັນກຽດ ແລະ ຊື່ສຽງຂອງປະເທດຊາດພວກເຮົາ”
![ນັກກິລາເທັນນິສລາວ](https://laox.la/wp-content/uploads/2022/10/image-204.png)
ສຳລັບການແຂ່ງຂັນເທັນນິສ ທີມຊາຍຊິງແຊ້ມໂລກ ຫຼື ລາຍການ Davis Cup ແມ່ນມີມາແຕ່ປີ 1900 ໂດຍມີການຈັດລະດັບແຂ່ງຂັນໃນແຕ່ລະຂົງເຂດ ຕາມຜົນງານອັນດັບໂລກ ຫຼື Ranking ຂອງແຕ່ລະຊາດ ເພື່ອຄັດເຂົ້າສູ່ຮອບສຸດທ້າຍ ຫຼື ລະດັບສູງສຸດ ສຳລັບນັກກິລາເທັນນິສ ທີມຊາດລາວ ໃນຖານະເປັນນ້ອງໃໝ່ ໄດ້ແຂ່ງຂັນໃນຂົງເຂດອາຊີ-ໂອຊີນີ ຢູ່ລະດັບກຸ່ມທີ 4 ຂອງຂົງເຂດ ເຊິ່ງມີ 17 ທີມເຂົ້າຮ່ວມ ແບ່ງການແຂ່ງຂັນອອກເປັນ 2 ສ່ວນ ໂດຍທີມຊາດລາວ ຢູ່ສ່ວນທີ 2 ປະກອບມີ 9 ທີມ ຄື: ເຕີກເມນິສະຖານ, ຄູເວດ, ກຳປູເຈຍ, ກວມ, ມົງໂກລີ, ສິງກະໂປ, ພູຖານ ແລະ ບາເຣນ ເຈົ້າພາບ.
![ນັກກິລາເທັນນິສລາວ](https://laox.la/wp-content/uploads/2022/10/image-205.png)
ສ່ວນຮູບແບບການແຂ່ງຂັນ ຈະແບ່ງເປັນ 2 ກຸ່ມ ແຂ່ງພົບກັນໝົດໃນກຸ່ມ ແບບດີສຸດ 2 ໃນ 3 ຄູ່ ກໍຄື ດ່ຽວ ມື 1, ມື 2 ແລະ ຄູ່ຊາຍ, ແລ້ວຄັດເລືອກເອົາທີ 1 ຂອງສອງກຸ່ມ ມາພົບກັນໃນຮອບເພອັອບ ເພື່ອເອົາທີມຊະນະ ເລື່ອນຊັ້ນສູ່ກຸ່ມທີ 3 ຂອງຂົງເຂດ ແລະ ຄ່ອຍໄຕ່ເຕົ້າໄປສູ່ລະດັບສູງສຸດ ຫຼື World Group Finals ເພື່ອລຸ້ນຊິງຂັນແຊ້ມ. ໂດຍຈະແຂ່ງຂັນໃນລະຫວ່າງວັນທີ 17-22 ຕຸລາ 2022 ນີ້.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
No comment