ນັກອະນຸລັກສິ່ງແວດລ້ອມກຸ່ມໜຶ່ງໄດ້ມີຄວາມຄິດໃນການນຳໃຊ້ສິລະປະເປັນເຄື່ອງມື ເພື່ອທຳຄວາມສະອາດສິ່ງແວດລ້ອມ ແລະ ເປັນແຫຼ່ງຫາລາຍໄດ້ໄປໃນຕົວ ພາຍໃຕ້ແຄັມເປນ “Tawa Uchafu na Nusu” ທີ່ຈະປ່ຽນຂີ້ເຫຍື້ອໃຫ້ກາຍເປັນງານສິລະປະຫຼາກຫຼາຍຮູບແບບເພື່ອນຳໄປວາງຂາຍໃນທ້ອງຕະຫຼາດ.
Lwanyaga Walakira ຜູ້ຈັດໂຄງການ Tawa Uchafu na Nusu ໄດ້ອະທິບາຍວ່າ ແຮງບັນດານໃຈຂອງພວກເຂົາມາຈາກການລົນນະລົງດ້ານສິ່ງແວດລ້ອມຕ່າງໆ, ເຊິ່ງເປົ້າໝາຍຫຼັກຂອງພວກເຂົາແມ່ນເພື່ອສະແດງໃຫ້ໄວໜຸ່ມສາມາດນໍາເອົາຄວາມຄິດສ້າງສັນ ແລະ ສິລະປະຂອງເຂົາເຈົ້າມາສ້າງລາຍໄດ້ຈາກຂີ້ເຫຍື້ອທີ່ເກັບມາຈາກຄົວເຮືອນ ແລະ ຈຸດຖິ້ມຂີ້ເຫຍື້ອ ເພື່ອກະຕຸ້ນໃຫ້ພວກເຂົາບໍ່ຖິ້ມຂີ້ເຫຍື້ອໄປໂດຍເປົ່າປະໂຫຍດ ແລະ ໃຊ້ງານສິລະປະໃນການປ່ຽນມັນໃຫ້ມີປະໂຫຍດແເທນ. ພວກເຂົາແນມເຫັນອະນາຄົດທີ່ຄົນເກັບຂີ້ເຫຍື້ອຍອມຈ່າຍເງິນໃຫ້ກັບເຈົ້າຂອງຂີ້ເຫຍື້ອ ເມື່ອພິຈາລະນາເບິ່ງແລ້ວພວກມັນສາມາດສ້າງກຳໄລໄດ້ຢ່າງຫຼວງຫຼາຍຈາກການນຳໄປຣີໄຊເຄິນ.
“ທຸກມື້ນີ້ພວກເຮົາຈ່າຍເງິນຈຳນວນຫຼາຍໃຫ້ກັບບໍລິສັດເກັບຂີ້ເຫຍື້ອ ແລະ ບໍລິສັດເຫຼົ່ານີ້ໄດ້ຄັດແຍກຂີ້ເຫຍື້ອແລ້ວຮັບຜົນປະໂຫຍດຈາກມັນ. ຄວາມຝັນຂອງພວກເຮົາກໍຄືຍອມຈ່າຍເພື່ອຊື້ຂີ້ເຫຍື້ອເຫຼົ່ານັ້ນແລ້ວນຳມາປ່ຽນໃຫ້ເປັນຜະລິດຕະພັນທີ່ມີປະໂຫຍດທີ່ສາມາດກະຕຸ້ນເສດຖະກິດພາຍໃນປະເທດໄດ້”
Walakira ເຊື່ອວ່າ ການໃຫ້ນັກສິລະປິນເຂົ້າມາມີສ່ວນຮ່ວມໃນໂຄງການດັ່ງກ່າວ ກໍເພື່ອໃຫ້ພວກເຂົາເຂົົ້າໃຈເຖິງຄວາມສຳຄັນໃນການຮັກສາຄວາມສະອາດຂອງສິ່ງແວດລ້ອມ ແລະ ຍັງສາມາດນຳໄປສູ່ການສ້າງສັນສິນລະປະໃນຮູບແບບຕ່າງໆທີ່ເອື້ອອໍານວຍໃຫ້ກັບເປົ້າໝາຍນີ້ໄດ້.
ນອກຈາກນີ້, Walakira ຍັງໄດ້ເປີດເຜີຍວ່າໂຄງການຂອງພວກເຂົາໄດ້ສ້າງຕັ້ງສະຖາບັນການເຝິກອົບຮົມໃນ Kyebando ເຊິ່ງຈະສອນວິທີການສ້າງຮູບແບບສິລະປະຕ່າງໆຈາກວັດສະດຸທີ່ຖືກຖິ້ມເຊັ່ນ: ດອກໄມ້, ເຕົ່າພລາສຕິກ, ເຄື່ອງຫຼິ້ນເດັກນ້ອຍ, ໂຖດອກໄມ້. ອຸປະກອນຕົບແຕ່ງເຮືອນ ແລະ ອື່ນໆອີກດ້ວຍ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
