ຖືເປັນອີກໜຶ່ງຄວາມໃສ່ໃຈ ແລະ ຄວາມໜ້າຮັກຂອງຊາວຍີ່ປຸ່ນ ເມື່ອ ເຈົ້າໜ້າທີ່ໃນສະໜາມບິນແຫ່ງໜຶ່ງ ໃນເກາະໂອກິນາວາ ປະເທດຍີ່ປຸ່ນ ໄດ້ແຕ້ມຮູບໂຕ ຊີຊ່າ ທີ່ໜ້າຮັກອັນເປັນສັນຍະລັກຂອງໂອກິນາວາ ພ້ອມກັບຂໍ້ຄວາມຂໍ້ໂທດ ຜູ້ໂດຍສານທີ່ເຮືອບິນອອກຊ້າກວ່າກຳນົດ.
ໂດຍເລື່ອງລາວດັ່ງກ່າວ ໄດ້ກາຍເປັນທີ່ເວົ້າເຖິງ ໂດຍມັນໄດ້ເກີດຂຶ້ນໃນສະໜາມບິນນາຮະ ໃນເກາະໂອກິນາວາ ເຮືອບິນຕ້ອງໄດ້ອອກຊ້າກວ່າກຳນົດເນື່ອງຈາກເຫດຜົນບາງປະການ ແລະ ຂະນະທີ່ຜູ້ໂດຍສານກຳລັງເກີດຄວາມກັງວົນ ເວົ້າຂວັນ ແລະ ນິນທາກັນຢູ່ນັ້ນ ພໍຫຼຽວເບິ່ງອອກໄປທາງປ່ອງຢ້ຽມຂອງເຮືອບິນ ກໍພົບກັບເລື່ອງລາວດີໆ ທີ່ບາງຄົນທີ່ກຳລັງກະວົນກະວາຍ ຫຼື ເຄັ່ງຄຽດຢູ່ນັ້ນ ກໍອົດທີ່ຈະຍິ້ມ ແລະ ໃຈອ່ອນບໍ່ໄດ້.
ເຊິ່ງພາບທີ່ຜູ້ໂດຍສານໄດ້ເຫັນນັ້ນ ເປັນພາບຂອງເຈົ້າໜ້າທີ່ຄົນໜຶ່ງກຳລັງໃຊ້ອຸປະກອນທີ່ຄ້າຍຄືເຄື່ອງສີດນໍ້າ ຫຼື ເຄື່ອງພົ່ນສີ ສີດເປັນຮູບໂຕ ຊີຊ່າ ເທບພະເຈົ້າປົກປັກຄຸ້ມຄອງ ຂອງ ໂອກິນາວາ ຢ່າງຄ່ອງແຄ້ວ ພ້ອມກັບຂຽນຂໍ້ຄວາມລົງໄປວ່າ: “ຂໍໂທດທີ່ຫຼ້າຊ້າເດີ” ພ້ອມກັບໂຄ້ງຕົວຂໍໂທດຜູ້ໂດຍສານນຳອີກ.
ຫຼັງພາບດັ່ງກ່າວຖືກເຜີຍແຜ່ອອກໄປໃນສັງຄົມອອນລາຍ ຫຼາຍຄົນກໍເຂົ້າມາສະແດງຄວາມເຫັນກ່ຽວກັບຄວາມໜ້າຮັກ ແລະ ຄວາມເອົາໃຈໃສ່ໃນການບໍລິການຂອງຊາວຍີ່ປຸ່ນ ແຕ່ກໍມີຫຼາຍຄົນຕັ້ງຂໍ້ສັງເກດວ່າ ເຈົ້າໜ້າທີ່ຄົນນີ້ເຮັດໜ້າທີ່ຫຍັງ ລາວຄືແຕ້ມຮູບໄດ້ຢ່າງຊຳນິຊຳນານ ປານມືອາຊີບແທ້.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
