ເມື່ອວັນທີ 5 ກໍລະກົດທີ່ຜ່ານມາ, ອົງການອຸຕຸນິຍົມໂລກຂອງສະຫະປະຊາຊາດ (WMO) ໄດ້ປະກາດການມາເຖິງຂອງປາກົດການ El Niño ເຊິ່ງເປັນປາກົດການສະພາບອາກາດຄັ້ງໃຫຍ່ ໂດຍເຕືອນວ່າການກັບຄືນມາຂອງປາກົດການນີ້ຈະເປັນການປູທາງໄປສູ່ອຸນຫະພູມໂລກ ແລະ ສະພາບອາກາດທີ່ຮ້າຍແຮງ. ໃນຕອນນີ້ເຈົ້າໜ້າທີ່ເລີ່ມກຽມພ້ອມຮັບມືກັບເຫດການດັ່ງກ່າວ ເຊິ່ງມີຄວາມສໍາຄັນຕໍ່ການດຳລົງຊີວິດຂອງມະນຸດ.
ປາກົດການ El Niño ຄັ້ງຫຼ້າສຸດທີ່ຜ່ານມາເກີດຂຶ້ນໃນປີ 2016 ເຊິ່ງຍັງເປັນປີທີ່ຮ້ອນທີ່ສຸດໃນປະຫວັດສາດ, ໂດຍເກີດຈາກຄວາມຮ້ອນທີ່ເພີ່ມຂຶ້ນທົ່ວໂລກ ເປັນຜົນມາຈາກການປ່ອຍກ໊າສຄາບອນໄດອັອກໄຊທີ່ມະນຸດສ້າງຂຶ້ນ ເຊິ່ງ WMO ເອີ້ນວ່າ “Double Whammy” ສາມາດເຮັດໃຫ້ສະພາບດິນຟ້າອາກາດຮຸນແຮງຂຶ້ນທັງເທິງບົກ ແລະ ໃນທະເລທົ່ວໂລກ.
WMO ໄດ້ປະເມີນວ່າມີຄວາມເປັນໄປໄດ້ເຖິງ 90% ທີ່ເຫດການ El Niño ຈະຄົງຢູ່ໄປຈົນຮອດທ້າຍປີ 2023 ໂດຍມີຄວາມຮຸນແຮງປານກາງ ຫຼື ສູງກວ່າ. ໂດຍໂອກາດທີ່ຈະເກີດປາກົດການ El Nino ທີ່ຮ້າຍແຮງ ແລະ ຮ້ອນຂຶ້ນໃນທ້າຍປີນີ້ຢູ່ທີ່ 56% ໂດຍມາຈາກການຄາດການຂອງເຈົ້າໜ້າທີ່ສະຫະລັດ.
Peterry Talas ເລຂາທິການຂອງ WMO ກ່າວວ່າ: “ການເກີດປາກົດການ El Niño ຈະເພີ່ມຄວາມເປັນໄປໄດ້ຢ່າງຫຼວງຫຼາຍໃນການທໍາລາຍສະຖິຕິອຸນຫະພູມ ແລະ ເຮັດໃຫ້ເກີດຄວາມຮ້ອນທີ່ຮຸນແຮງຂຶ້ນໃນຫຼາຍພາກສ່ວນຂອງໂລກ ແລະ ໃນມະຫາສະໝຸດ”
ການປະກາດປາກົດການ El Niño ໂດຍ WMO ນັ້ນ ເປັນການສົ່ງສັນຍານໃຫ້ລັດຖະບານທົ່ວໂລກເພື່ອລະດົມການກຽມພ້ອມເພື່ອຈຳກັດຜົນກະທົບຕໍ່ສຸຂະພາບ, ລະບົບນິເວດ, ເສດຖະກິດ ແລະ ອື່ນໆ. ການເຕືອນໄພລ່ວງໜ້າ ແລະ ການດຳເນີນການລ່ວງໜ້າສຳລັບເຫດສະພາບອາກາດທີ່ຮ້າຍແຮງທີ່ກ່ຽວຂ້ອງກັບປາກົດການດິນຟ້າອາກາດທີ່ສຳຄັນນີ້ແມ່ນສຳຄັນຕໍ່ການຊ່ວຍຊີວິດ ແລະ ການດຳລົງຊີວິດຂອງຜູ້ຄົນ.
ນັກຄົ້ນຄວ້າບາງຄົນຄິດວ່າ El Niño ສາມາດເຮັດໃຫ້ປີ 2023 ກາຍເປັນປີທີ່ຮ້ອນທີ່ສຸດໃນປະຫວັດສາດ ເຖິງແມ່ນວ່າຈະມີຄື້ນຄວາມຮ້ອນທີ່ເພີ່ມຂຶ້ນໃນປີ 2024. ອີງຕາມບົດລາຍງານທີ່ຜ່ານມາໂດຍ WMO ແລະ UK Met Office ຄາດການວ່າມີໂອກາດ 66% ທີ່ອຸນຫະພູມໂລກທັງປີຈະເພີ່ມສູງຂຶ້ນເຖິງ 1.5 ອົງສາ ເປັນເວລາຢ່າງໜ້ອຍໜຶ່ງປີພາຍໃນປີ 2027.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
