Google ໄດ້ປະກາດລົງທຶນ 2 ຕື້ໂດລາສະຫະລັດໃນມາເລເຊຍ, ລວມທັງການສ້າງສູນຂໍ້ມູນແຫ່ງທໍາອິດໃນອາຊີຕາເວັນອອກສຽງໃຕ້ ແລະ ເປັນສ່ວນໜຶ່ງຂອງຄວາມພະຍາຍາມເພື່ອຂະຫຍາຍການບໍລິການ Google Cloud ໃນພາກພື້ນ.
Ruth Porat, CFO ຂອງ Alphabet Inc., ບໍລິສັດແມ່ຂອງ Google ກ່າວວ່າ ການລົງທຶນໃນຄັ້ງນີ້ແມ່ນການລົງທຶນທີ່ໃຫຍ່ທີ່ສຸດຂອງ Google ໃນອາຊີຕາເວັນອອກສຽງໃຕ້. ໂດຍເກີດຂຶ້ນຈາກການຮ່ວມມືກັບລັດຖະບານມາເລເຊຍເພື່ອສົ່ງເສີມນະໂຍບາຍ Cloud First ແລະ ຍົກສູງມາດຕະຖານຄວາມປອດໄພທາງອິນເຕີເນັດ.
ການລົງທຶນໃນຄັ້ງນີ້ແມ່ນສ່ວນໜຶ່ງຂອງແຜນການຂະຫຍາຍທີ່ໄດ້ວາງແຜນມາແລ້ວຂອງ Google ໃນອາຊີຕາເວັນອອກສຽງໃຕ້. ໃນສອງສາມເດືອນທີ່ຜ່ານມາ, ບໍລິສັດໄດ້ປະກາດແຜນການລົງທຶນຫຼາຍຕື້ໂດລາໃນພາກພື້ນ ໂດຍສຸມໃສ່ໂອກາດການໃນຂະຫຍາຍຕົວໃໝ່ໆ.
ໃນຂະນະດຽວກັນ, ບໍລິສັດຄູ່ແຂ່ງຄື Microsoft ກໍໄດ້ປະກາດແຜນການລົງທຶນ 2.2 ຕື້ໂດລາສະຫະລັດໃນມາເລເຊຍເຊັ່ນດຽວກັນໃນປະເທດໄທ ແລະ ອິນໂດເນເຊຍ, ສະທ້ອນໃຫ້ເຫັນເຖິງການແຂ່ງຂັນທີ່ດຸເດືອດລະຫວ່າງຍັກໃຫຍ່ເຕັກໂນໂລຊີເຫຼົ່ານີ້ສໍາລັບການເປັນຜູ້ນໍາໃນຕະຫຼາດ Cloud Computing ແລະ ຕະຫຼາດ AI ໃນພາກພື້ນ.
ນອກເຫນືອຈາກການລົງທຶນໃນໂຄງສ້າງພື້ນຖານດ້ານເຕັກໂນໂລຊີແລ້ວ, Google ມຸ່ງໝັ້ນທີ່ຈະສົ່ງເສີມທັກສະດ້ານ AI ໃນປະເທດມາເລເຊຍ, ໂດຍເຮັດວຽກຮ່ວມກັບລັດຖະບານເພື່ອພັດທະນາໂຄງການການເຝິກອົບຮົມ ແລະ ການສຶກສາ.
ການລົງທຶນຂອງ Google ຄາດວ່າຈະສົ່ງຜົນກະທົບທາງເສດຖະກິດຢ່າງຫຼວງຫຼາຍຕໍ່ມາເລເຊຍ, ນາຍົກລັດຖະມົນຕີ Anwar Ibrahim ຄາດການວ່າ ການລົງທຶນໃນຄັ້ງນີ້ຈະຊ່ວຍເພີ່ມມູນຄ່າທາງດ້ານເສດຖະກິດ 3.2 ຕື້ໂດລາສະຫະລັດ ແລະ ສ້າງວຽກເຮັດງານທຳໃໝ່ 26,500 ຕໍາແໜ່ງໃນປີ 2030.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
