ຜູ້ຜະລິດ ຫຼື ຜູ້ປະກອບການທ້ອງຖິ່ນກໍາລັງປະເຊີນກັບສິ່ງທ້າທາຍຕ່າງໆໃນການຕອບສະໜອງຄວາມຕ້ອງການຂອງຕະຫຼາດພາຍໃນ ເພື່ອຫຼຸດຜ່ອນການນໍາເຂົ້າ.
ອີງຕາມການລາຍງານຂອງໜັງສືພິມ ວຽງຈັນທາມ ຜູ້ຜະລິດສິນຄ້າທີ່ຜະລິດສໍາລັບການຈໍາໜ່າຍພາຍໃນປະເທດຈ່າຍອັດຕາພາສີເຕັມແຕ່ 5% ຫາ 7% ສໍາລັບວັດຖຸດິບນໍາເຂົ້າ. ທີ່ໂດຍປົກກະຕິແລ້ວ, ພາສີເຫຼົ່ານີ້ຕ້ອງຄວນຍົກເວັ້ນສໍາລັບວັດຖຸດິບທີ່ນໍາເຂົ້າເພື່ອຜະລິດສິນຄ້າເພື່ອສົ່ງອອກ.
ບັນຫາເຫຼົ່ານີ້ ເປັນສ່ວນໜຶ່ງຂອງການນຳສະເໜີໂດຍ ທ່ານ ນັນຕາ ສານຸວົງ ຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ທີ່ກອງປະຊຸມທີ່ຈັດຂຶ້ນເມື່ອບໍ່ດົນມານີ້ ທີ່ເນັ້ນໃສ່ການຫາທາງແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ການເງິນ.
ທ່ານກ່າວວ່າ, ບັນຫາເຫຼົ່ານີ້ໄດ້ສົ່ງຜົນໃຫ້ຕົ້ນທຶນການຜະລິດເພີ່ມຂຶ້ນ, ຜະລິດຕະພັນບໍ່ສາມາດແຂ່ງຂັນກັບສິນຄ້ານຳເຂົ້າຈາກປະເທດບ້ານໃກ້ເຮືອນຄຽງທີ່ລາຄາເທົ່າກັນຫຼືຕ່ຳກວ່າ.
ຜູ້ປະກອບການລວມທັງ SMEs ຍັງປະສົບກັບຄວາມຫຍຸ້ງຍາກໃນການເຂົ້າເຖິງຂໍ້ມູນກ່ຽວກັບເງິນກູ້ດອກເບ້ຍຕໍ່າຍ້ອນວ່າພວກເຂົາຍັງຂາດຄວາມຮູ້ ແລະ ປະສົບການທີ່ພຽງພໍກ່ຽວກັບການດໍາເນີນທຸລະກິດຂອງຕົນເອງ ແລະ ມາດຕະຖານ ເງື່ອນໄຂທີ່ທະນາຄານກໍານົດສໍາລັບເງິນກູ້.
ນອກຈາກນີ້ ການບໍລິໂພກສິນຄ້າພາຍໃນຍັງບໍ່ແຂງແຮງ, ມີຄ່ານິຍົມເປັນສິນຄ້າທີ່ນໍາເຂົ້າຈາກປະເທດອື່ນ, ການພັດທະນາສິນຄ້າຂອງລາວຍັງບໍ່ດີເທົ່າທີ່ຄວນ. ທ່ານ ນັນຕາ ກ່າວຕື່ມວ່າ:ຜະລິດຕະພັນທ້ອງຖິ່ນຍັງໄດ້ຮັບຜົນກະທົບຈາກລາຄາທີ່ສູງ, ການຫຸ້ມຫໍ່ທີ່ບໍ່ໜ້າສົນໃຈ ແລະ ການຂາດການຄົ້ນຄວ້າຄວາມເຂົ້າໃນຢ່າງເລິກເຊິ່ງໃນຕະຫຼາດ.
ທ່ານກ່າວຕໍ່ວ່າ ການກວດກາ ການຂົນສົ່ງ ຂອງບໍລິສັດ ນໍາເຂົ້າສົ່ງອອກ ບາງແຫ່ງ ກໍຍັງເປັນການຍາກ ເພາະພວກເຂົາບໍ່ໄດ້ເກັບສິນຄ້າຢູ່ສາງ. ແຕ່ຈະແຈກຢາຍ ສິນຄ້າໃຫ້ແກ່ລູກຄ້າໂດຍກົງ ເຊິ່ງບໍ່ເປັນໄປຕາມ ລະບຽບກົດໝາຍ. ນອກນັ້ນ, ຍັງມີການລັກລອບນໍາເຂົ້າສິນຄ້າຕາມຊາຍແດນ ແລະ ຜ່ານດ່ານຊາຍແດນ.
ການເຂົ້າເຖິງການບໍລິການຂອງຜູ້ປະກອບການ MSME ແມ່ນຈໍາກັດເນື່ອງຈາກຄ່າໃຊ້ຈ່າຍໃນການວາງສະແດງ ແລະ ການເກັບຮັກສາສິນຄ້າເນື່ອງຈາກຄ່າບໍລິການຍັງສູງ.
ໂດຍ ທ່ານ ຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນໄດ້ກ່າວວ່າ: ເພື່ອສົ່ງເສີມການນຳໃຊ້ຜະລິດຕະພັນພາຍໃນໃຫ້ຫຼາຍຂຶ້ນ ແລະ ຮັບປະກັນຄຸນະພາບ ແລະ ປະລິມານຂອງສິນຄ້າດັ່ງກ່າວ, ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ຈະສຸມໃສ່ພັດທະນາຜູ້ປະກອບການ ແລະ ຜະລິດຕະພັນ, ການໂຄສະນາສົ່ງເສີມການຕະຫຼາດ ແລະ ຕິດຕາມການນຳເຂົ້າ.
ປັດຈຸບັນ, ທົ່ວນະຄອນຫຼວງວຽງຈັນ ມີວິສາຫະກິດຂະໜາດນ້ອຍ ແລະ ກາງ 4.640 ແຫ່ງ ເພີ່ມຂຶ້ນ 1.53% ເມື່ອທຽບໃສ່ຕົວເລກປີ 2022. ໃນນັ້ນ, ມີໂຮງງານປຸງແຕ່ງ ແລະ ຫັດຖະກຳ 2.571 ແຫ່ງ, ໂຮງງານຂະໜາດກາງ 153 ແຫ່ງ, ໂຮງງານຂະໜາດນ້ອຍ 435 ແຫ່ງ; 1.983 ໜ່ວຍ ຂະໜາດນ້ອຍ, ແບບຄອບຄົວ. ຮ່ວມກັນກວມເອົາ 88,34 ເປີເຊັນຂອງຈໍານວນໂຮງງານທັງໝົດ. ຜູ້ຜະລິດຂອງນະຄອນຫຼວງວຽງຈັນ ຜະລິດສິນຄ້າທັງໝົດ 844 ລາຍການ ເພື່ອຮັບໃຊ້ສັງຄົມ.
ຕິດຕາມຂ່າວທັງໝົດຈາກ LaoX: https://laox.la/all-posts/
