ການປ່ຽນແປງດິນຟ້າອາກາດໃນປັດຈຸບັນ ບໍ່ພຽງແຕ່ເຮັດໃຫ້ໂລກຮ້ອນຂຶ້ນເທົ່ານັ້ນ. ແຕ່ມັນຍັງອາດເຮັດໃຫ້ຄົນທີ່ທຸກຢູ່ແລ້ວ ທຸກຂຶ້ນກວ່າເກົ່າ. ອີງຈາກການຄົ້ນຄວ້າໃໝ່ໄດ້ເປີດເຜີຍໃຫ້ເຫັນເຖິງພາບໂດຍລວມທີ່ໜ້າເປັນຫ່ວງ ກ່ຽວກັບຜົນກະທົບທາງດ້ານເສດຖະກິດຂອງວິກິດການໂລກຮ້ອນ. ໂດຍຄາດວ່າ GDP ໂລກຈະມີການຫົດຕົວລົງ 19% ຫຼື 38 ພັນຕື້ໂດລາ ໃນອີກ 26 ປີຂ້າງໜ້າ. ເຮັດໃຫ້ປະເທດທີ່ທຸກຍາກຢູ່ແລ້ວຈະໄດ້ຮັບຜົນກະທົບຫຼາຍທີ່ສຸດ.
ການຄົ້ນຄວ້າໄດ້ນໍາໃຊ້ຂໍ້ມູນຈາກຫຼາຍກວ່າ 1,600 ພາກພື້ນໃນທົ່ວໂລກໃນໄລຍະ 40 ປີທີ່ຜ່ານມາ ເພື່ອປະເມີນຄວາມເສຍຫາຍຈາກການປ່ຽນແປງຂອງອຸນຫະພູມ ແລະ ປະລິມານນ້ຳຝົນ. ເຊິ່ງນີ້ລວມມີການແປປວນຂອງສະພາບອາກາດປະຈໍາວັນ ແລະ ສະພາບອາກາດທີ່ຮຸນແຮງ.
ພາວະໂລກຮ້ອນເປັນປັດໄຈຫຼັກທີ່ກໍ່ໃຫ້ເກີດຄວາມສູນເສຍທາງເສດຖະກິດໂລກ ຜ່ານປັດໄຈຕ່າງໆເຊັ່ນ: ຄື້ນຄວາມຮ້ອນ, ໄພແຫ້ງແລ້ງ, ນໍ້າຖ້ວມ ຫຼື ລະດັບນໍ້າທະເລ. ສົ່ງຜົນໃຫ້ຕົວເລກຄວາມເສຍຫາຍທີ່ຄາດການໄວ້ເພີ່ມຂຶ້ນອີກປະມານ 50%.
ການຄົ້ນຄວ້ານີ້ຍັງໄດ້ຄາດການອີກວ່າ ທຸກພາກພື້ນໃນທົ່ວໂລກຈະປະເຊີນກັບການສູນເສຍດ້ານເສດຖະກິດຈາກໂລກຮ້ອນ. ຍົກເວັ້ນບາງພື້ນທີ່ທີ່ມີເສັ້ນຂະໜານສູງຫຼາຍ ທີ່ອາດຈະໄດ້ຮັບຜົນປະໂຫຍດຈາກການປ່ຽນແປງຂອງອຸນຫະພູມທີ່ແປປວນໜ້ອຍລົງ.
ຢ່າງໃດກໍຕາມ, ເຂດທີ່ມີແນວໂນ້ມທີ່ຈະປະສົບກັບການສູນເສຍທາງດ້ານເສດຖະກິດທີ່ໃຫຍ່ທີ່ສຸດແມ່ນຢູ່ໃນເສັ້ນຂະໜານທີ່ຕໍ່າ. ໂດຍສະເພາະແມ່ນຢູ່ໃນພາກພື້ນທີ່ມີການປ່ອຍອາຍພິດເຮືອນແກ້ວສະສົມໃນອະດີດ ແລະ ມີລາຍໄດ້ທີ່ຕໍ່າໃນປັດຈຸບັນ.
ຄວາມເສຍຫາຍທາງດ້ານເສດຖະກິດຈາກວິກິດການໂລກຮ້ອນທີ່ພວກເຮົາກໍາລັງປະເຊີນໃນປັດຈຸບັນ ແມ່ນມູນຄ່າຫຼາຍກວ່າ 6 ເທົ່າເມື່ອທຽບກັບຄ່າໃຊ້ຈ່າຍໃນການຫຼຸດຜ່ອນການປ່ອຍອາຍພິດເຮືອນແກ້ວ. ເພື່ອທີ່ຈະປ້ອງກັນບໍ່ໃຫ້ເສຍຫາຍໄປຫຼາຍກວ່ານີ້ ຈຳເປັນຕ້ອງບັນລຸເປົ້າໝາຍຈຳກັດອຸນຫະພູມໂລກໃຫ້ບໍ່ເກີນ 2 ອົງສາ ຕາມທີ່ໄດ້ກຳນົດໄວ້ໃນສັນຍາປາຣີສ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/