ປີໃໝ່ປີນີ້ເປັນປີທີ່ພິເສດອີກຢ່າງໜຶ່ງ ຫຼັງຈາກບໍ່ໄດ້ຫຼິ້ນຫົດນ້ຳໃນຮອບ 2 ປີ ທີ່ມີການແຜ່ລະບາດຂອງພະຍາດໂຄວິດ-19 ແລະ ເປັນປີທີ່ບໍ່ມີການເກີດອຸບັດຕິເຫດຫຼາຍ ຖ້າທຽບໃສ່ຫຼາຍໆປີຜ່ານມາ ໂດຍສະເພາະຄົນເສຍຊີວິດຈາກໄລຍະປີໃໝ່ ນະຄອນຫຼວງວຽງຈັນມີ 3 ຄົນທີ່ເສຍຊີວິດຈາກອຸບັດຕິເຫດປີໃໝ່ ສ່ວນອັດຕະປືແມ່ນບໍ່ມີຈັກຄົນ ແລະ ອີກຫຼາຍໆແຂວງ ທີ່ການເກີດອຸບັດຕິເຫດລົດລົງ ລວມທັງຍອດຜູ້ເສຍຊີວິດ.
ພັທ ວິລະພົງ ສະເໜ່ຫາ ຫົວໜ້າພະແນກຕຳຫຼວດຈະລາຈອນ ນວ ໃຫ້ຮູ້ວ່າ: ໃນໄລຍະບຸນປີໃໝ່ລາວ 3 ວັນ ນັບແຕ່ວັນທີ 14-16 ເມສາ 2023, ຢູ່ນະຄອນຫຼວງວຽງຈັນ ມີອຸບັດຕິເຫດເກີດຂຶ້ນ 20 ກໍລະນີ, ມີຜູ້ເສຍຊີວິດ 3 ຄົນ, ຍິງ 1 ຄົນ, ມີຜູ້ບາດເຈັບ 37 ຄົນ, ແລະ ມີພາຫະນະເປ່ເພ 39 ຄັນ.
ສາເຫດຂອງການເກີດອຸບັດຕິເຫດ ຍ້ອນນັກຂັບຂີ່ລະເມີດກົດຈະລາຈອນ, ດື່ມສິ່ງມຶນເມົາແລ້ວຂັບຂີ່ລົດໄວເກີນກໍານົດ ແລະ ປ່ຽນທິດທາງການສັນຈອນບໍ່ຮັບປະກັນ. ເພື່ອຫຼີກເວັ້ນການເກີດອຸບັດຕິເຫດ ຮຽກຮ້ອງຜູ້ໃຊ້ລົດໃຊ້ຖະໜົນ ເພີ່ມທະວີມີສະຕິໃນການຂັບຂີ່ພາຫະນະ, ເວລາດື່ມສິ່ງມຶນເມົາຫ້າມຂັບຂີ່ພາຫະນະ, ໃຊ້ຄວາມໄວຕາມທີ່ກໍານົດ, ກ່ອນຈະປ່ຽນທິດທາງການສັນຈອນ ແລະ ແຊງຂຶ້ນໜ້າລົດຄັນອື່ນ ຕ້ອງຮັບປະກັນຄວາມປອດໄພ, ການຂີ່ລົດຖີບ ຫຼື ລົດຈັກ ທຸກຄັ້ງຕ້ອງແນບເຂົ້າເບື້ອງຂວາມືຂອງຕົນເອງ ເພື່ອຫຼີກບັນຫາການເກີດອຸບັດຕິເຫດ.
![](https://laox.la/wp-content/uploads/2023/04/image-267.png)
ສ່ວນແຂວງອັດຕະປື ທ່ານ ຮອ ສົມໃຈ ນາມປະກາສິດ ຫົວໜ້າກອງສືບສວນ-ສອບສວນ ຄະດີອຸບັດຕິເຫດ ປກສ ແຂວງອັດຕະປື ໃຫ້ສໍາພາດໃນວັນທີ 19 ເມສາ 2023 ນີ້ວ່າ: ໃນໄລຍະການສະເຫຼີມສະຫຼອງປີໃໝ່ລາວ 2023 ແຕ່ວັນທີ 12-16 ເມສາ 2023 ທົ່ວແຂວງອັດຕະປື ມີອຸບັດເຫດເກີດຂຶ້ນທັງໜົດ 19 ລາຍ. ໃນນີ້, ຢູ່ເມືອງສາມັກຄີໄຊ 9 ລາຍ, ເມືອງໄຊເສດຖາ 6 ລາຍ,ເມືອງພູວົງ, ເມືອງ ສະໜາມໄຊ ເມືອງລະ 2 ລາຍ ແລະ ສ່ວນເມືອງຊານໄຊ ແມ່ນບໍ່ມີອຸບັດຕິເຫດເກີດຂຶ້ນ. ສໍາລັບອຸບັດຕິເຫດທີ່ເກີດຂຶ້ນມີພາຫະນະເປ່ເພ 25 ຄັນ, ເປ່ເພສົມຄວນ 6 ຄັນ, ມີຄົນຮັບບາດເຈັບເລັກນ້ອຍ 25 ຄົນ, ບາດເຈັບສົມຄວນ 8 ຄົນ, ບາດເຈັບສາຫັດ 1 ຄົນ ແລະ ບໍ່ມີຜູ້ເສຍຊິວິດ. ລວມມູນຄ່າເສຍຫາຍ ທັງໝົດ 80 ລ້ານກວ່າກີບ. ສ່ວນສາເຫດຂອງການເກີດອຸບັດຕິເຫດ ແມ່ນຍ້ອນນັກຂັບຂີ່ດື່ມສິ່ງມຶນເມົາ, ນັກຂັບຂີ່ບໍ່ເຄົາລົບກົດລະບຽບຈາລະຈອນ ເຊັ່ນ: ແລ່ນລົດໄວເກີນກຳນົດ, ສະພາບເຕັກນິກຂອງລົດບໍ່ຮັບປະກັນຄວາມປອດໄພ ແລະ ບັນຫາອື່ນໆ.
ທ່ານ ຮ້ອຍເອກ ສົມໃຈ ນາມປະກາສິດ ຍັງໃຫ້ຮູ້ອີກວ່າ: ອຸບັດເຫດທີ່ເກີດຂຶ້ນໃນປີນີ້, ຖ້າທຽບໃສ່ປີຜ່ານມາ ແມ່ນເພີ່ມຂຶ້ນ 8 ລາຍ, ແຕ່ທຽບໃສ່ການສູນເສຍກັບປີຜ່ານມາແມ່ນມີໜ້ອຍ, ທັງນີ້ກໍຍ້ອນເຈົ້າໜ້າທີ່ ໄດ້ເຮັດໜ້າທີ່ການໂຄສະນາ ກ່ຽວກັບລະບຽບການສັນຈອນໃຫ້ນັກຂັບຂີ່ຕາມສາຍທາງ ແລະ ສະຖານທີ່ຕ່າງໆ, ພ້ອມທັງໄດ້ຕັ້ງຈຸດກວດກາ, ສຶກສາອົບຮົມກ່າວເຕືອນ ຕໍ່ຜູ້ທີລະເມີດ ແລະ ນຳໃຊ້ເຄື່ອງວິຊາສະເພາະ ເຊັ່ນ: ຈັບຄວາມໄວຂອງຍານພາຫະນະຕາມເສັ້ນທາງຫຼວງແຫ່ງຊາດ ແລະ ເຄື່ອງກວດທາດເຫຼົ້າ, ຖ້າພົບເຫັນຜູ້ລະເມີດ ແມ່ນໃຫ້ພັກຜ່ອນ ແລະ ແນະນຳໃຫ້ພີ່ນ້ອງມາຮັບເພື່ອລີກເວັ້ນການເກີດອຸບັດເຫດ .
ທ່ານ ຮ້ອຍເອກ ສົມໃຈ ນາມປະກາສິດ ຍັງໄດ້ຝາກເຖິງທົ່ວສັງຄົມ ບໍ່ວ່າຈະຢູ່ໃນເທສະການໃດໆກໍຕາມ ເວລາໃຊ້ລົດໃຊ້ຖະໜົນ, ນັກຂັບຂີ່ທຸກຄົນ ໃຫ້ເອົາໃຈໃສ່ປະຕິບັດກົດລະບຽບການສັນຈອນຢ່າງເຂັ້ມງວດ, ຂັບຂີ່ຕ້ອງໃຫ້ກຽດເຊິ່ງກັນ ແລະ ກັນ, ຫ້າມດື່ມສິ່ງມຶນເມົາແລ້ວຂັບຂີ່ລົດ ແລະ ກວດເຊັກສະພາບເຕັກນິກລົດກ່ອນອອກເດີນທາງ ເພື່ອລີກເວັ້ນການເກີດອຸບັດຕິເຫດຕາມທ້ອງຖະໜົນ.
![](https://laox.la/wp-content/uploads/2023/04/image-268.png)
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/