ໃນມື້ພັກຜ່ອນ ຫາກໄດ້ນອນຫົ່ມຜ້າເປີດເບິ່ງຊີຣີ້ທີ່ຕົນມັກ ແລະ ດອງໄວ້ຫຼາຍໆເລື່ອງຄົງຈະເປັນຄວາມສຸກຂອງໃຜຫຼາຍຄົນ. ສຳລັບຄົນຮັກຊີຣີ້ແລ້ວການເບິ່ງເທື່ອລະ 1-2 ຕອນອາດເຮັດໄດ້ຍາກ ເນື່ອງຈາກຄວາມມ່ວນຊື່ນ, ຄວາມໜ້າດຶງດູດ ຫຼື ພະເອກຫຼໍ່, ນາງເອກງາມ ຈຶ່ງເປັນແຮງຂັບເຄື່ອນໃຫ້ຜູ້ເບິ່ງຢາກຕິດຕາມ ແລະ ລໍຖ້າເບິ່ງຕອນຖັດໄປບໍ່ໄຫວ. ສະນັ້ນ, ໂດຍສ່ວນໃຫຍ່ແລ້ວຄົນຮັກການເບິ່ງຊີຣີ້ມັກມີພຶດຕິກຳຢຸດເບິ່ງບໍ່ໄດ້, ເບິ່ງເທື່ອໃດກໍໃຊ້ເວລາໄປຫຼາຍຊົ່ວໂມງ.
ທຸກຄົນຮູ້ບໍວ່າ ພຶດຕິກຳເຫຼົ່ານີ້ມີຊື່ເອີ້ນວ່າ Binge Watching ເປັນພຶດຕິກໍາເສບຕິດການເບິ່ງຊີຣີ້ຢ່າງຕໍ່ເນື່ອງເປັນເວລາດົນນານໂດຍບໍ່ມີການຢຸດພັກຜ່ອນ.
ໂດຍມີອາການສະແດງອອກຄື:
- ເບິ່ງຮອບດຽວໃຫ້ຈົບເລື່ອງ ຫຼື ເບິ່ງຢ່າງຕໍ່ເນື່ອງເປັນເວລາ 7–8 ຊົ່ວໂມງ ຫຼື ອາດຫຼາຍກວ່ານັ້ນ
- ເບິ່ງຫຼາຍເກີນໄປຈົນບໍ່ມີເວລາເຮັດກິດຈະກຳອື່ນເລີຍ ເຊັ່ນ: ບໍ່ກິນເຂົ້າ, ບໍ່ນອນພັກຜ່ອນ…
- ເມື່ອເລີ່ມມີອາການເມື່ອຍລ້າກໍຍັງຄົງສຶບຕໍ່ເບິ່ງຊີຣີ້
- ຄວາມຮັບຜິດຊອບ ແລະ ປະສິດທິພາບໃນການເຮັດວຽກຫຼຸດລົງ ລວມທັງຄວາມສຳພັນກັບຄົນອ້ອມຂ້າງໜ້ອຍລົງ ເພາະຈົດຈໍ່ຢູ່ແຕ່ການເບິ່ງຊີຣີ້
ເຮົາມາຮູ້ສາເຫດນຳກັນວ່າ ເປັນຫຍັງເມື່ອເຮົາເບິ່ງຊີ້ຣີ້ແລ້ວຈຶ່ງຢຸດເບິ່ງໄດ້ຍາກ ຫຼື ຢຸດບໍ່ໄດ້ເລີຍ?
ເຫດຜົນທີ່ເຮົາບໍ່ສາມາດຢຸດເບິ່ງຊີຣີ້ໄດ້ ຍ້ອນວ່າ Corticotropin-Releasing Hormone ຫຼື CRH ຖືກປ່ອຍອອກມາຈາກຮ່າງກາຍໃນເວລາທີ່ເຮົາຕື່ນເຕັ້ນ, ເກີດຄວາມສົງໄສ, ຢາກຮູ້ຢາກເຫັນວ່າຈະເກີດຫຍັງຂຶ້ນໃນຕອນຕໍ່ໄປ. ສະນັ້ນ, ຜູ້ສ້າງຊີຣີ້ຈຶ່ງໃຊ້ຄຸນປະໂຫຍດຂອງຮໍໂມນນີ້ດ້ວຍການຕັດຈົບ ຫຼື ຖິ້ມປະເດັນໄວ້ໃຫ້ຢາກສືບຕໍ່ເບິ່ງ ແລະ ອົດໃຈລໍຖ້າເບິ່ງບໍ່ໄຫວໃນຕອນຖັດໄປ. ໃນລະຫວ່າງການເບິ່ງສະໝອງຈະປ່ອຍຮໍໂມນ Dopamine, ເປັນຮໍໂມນແຫ່ງຄວາມສຸກອອກມາ ສົ່ງຜົນໃຫ້ເຮົາຮູ້ສຶກເພີດເພີນ, ຜ່ອນຄາຍ ຈົນຕ້ອງອົດຫຼັບອົດນອນເພື່ອເບິ່ງຊີຣີ້ໃຫ້ຈົບນັ້ນເອງ.
ແຕ່ເນື່ອງຈາກເຮົາເບິ່ງເປັນເວລາດົນ ຜົນກະທົບຕໍ່ສຸຂະພາບກໍຕາມມາເຊັ່ນວ່າ:
• ໂຣກທາງສາຍຕາ ຫຼື Computer Vision Syndrome: ເກີດຈາກການເບິ່ງໜ້າຈໍເປັນເວລາດົນໆ ທັງໃນຄອມພິວເຕີ ແລະ ໂທລະສັບມືຖື ເຮັດໃຫ້ເກີດອາການຕາແຫ້ງ, ປວດຕາ, ເມື່ອຍຕາ, ສາຍຕາມົວ ພ້ອມຍັງສ່ຽງເປັນໂຣກຕໍ້ຫີນ ແລະ ສາຍຕາສັ້ນ ຍິ່ງໄປກວ່ານັ້ນ, ອາດມີອາການເຈັບຫົວ ເນື່ອງຈາກວ່າລະບົບປະສາດຕາເຊື່ອມຕໍ່ກັບສະໝອງຂອງເຮົານັ້ນເອງ.
• ຮ່າງກາຍອິດເມື່ອຍສະສົມ: ມີສາເຫດມາຈາກການນອນພັກຜ່ອນບໍ່ພຽງພໍ ລວມທັງການນອນບໍ່ຫຼັບ ເປັນຜົນມາຈາກແສງສີຟ້າຈາກໜ້າຈໍໂທລະສັບທີ່ລົບກວນສະໝອງ ເມື່ອຮ່າງກາຍອ່ອນເພຍລົງໂຣກຕ່າງໆກໍສາມາດເຂົ້າມາແຊກຊ້ອນໄດ້ງ່າຍ.
• ໂຣກກະເພາະອາຫານ: ຈາກການເບິ່ງຊີຣີ້ຢ່າງເພີນເພີດຈົນລືມກິນເຂົ້າ, ບໍ່ຢາກລຸກຂຶ້ນມາກິນອາຫານ ແລະ ກິນອາຫານບໍ່ກົງເວລາ ພຶດຕິກຳເຫຼົ່ານີ້ຈຶ່ງມີຄວາມສ່ຽງຕໍ່ການເປັນໂຣກກະເພາະ.
• ໂຣກຕຸ້ຍ: ເນື່ອງຈາກເຮົານັ່ງ ຫຼື ນອນເບິ່ງຊີຣີ້ໂດຍບໍ່ໄດ້ເຄື່ອນໄຫວຮ່າງກາຍເລີຍ ແນ່ນອນວ່າແຄລໍຣີບໍ່ໄດ້ຖືກເຜົາຜານ ຊໍ້າບໍ່ໜຳຍັງນຳອາຫານມາກິນຕາມໃຈປາກເຊັ່ນ: ເຂົ້າໜົມ, ນໍ້າອັດລົມ… ສົ່ງຜົນໃຫ້ນໍ້າໜັກເພີ່ມຂຶ້ນຢ່າງວ່ອງໄວ.
• ອາການຫງຸດຫງິດງ່າຍ: ນີ້ແມ່ນຜົນມາຈາກການນອນໜ້ອຍ ຫຼື ບໍ່ໄດ້ນອນເລີຍ ກໍ່ໃຫ້ເກີດອາລົມແປປວນງ່າຍ, ໃຈຮ້າຍ ເຮັດໃຫ້ຄົນອ້ອມຂ້າງບໍ່ຢາກຢູ່ໃກ້.
• ອາການຂອງ Office Syndrome ດ້ວຍການນັ່ງ ຫຼື ນອນໃນທ່າເກົ່າ ແລະ ບໍ່ເຄື່ອນໄຫວຮ່າງກາຍຈະມີອາການປວດເມື່ອຍໄດ້ງ່າຍຂຶ້ນ.
• ອາການຊຶມເສົ້າ ຫຼື Post-Series Depression (PSD) ມັກເກີດຂຶ້ນເມື່ອຜູ້ເບິ່ງອິນຕາມຕົວລະຄອນ ຫຼື ເນຶ້ອເລື່ອງຫຼາຍເກີນໄປ ຈົນເກີດມີອາການເສຍໃຈ, ຮ້ອງໄຫ້ ແລະ ໂສກເສົ້າຈົນນຳໄປສູ່ໂຣກຊຶມເສົ້າໄດ້.
ມື້ນີ້, LaoX ຈຶ່ງໄດ້ນຳເອົາ 8 ວິທີການເບິ່ງຊີຣີ້ຢ່າງເໝາະສົມ ເຊິ່ງທຸກຄົນສາມາດປະຕິບັດຕາມໄດ້ຄື:
1. ຕັ້ງເວລາ ຫຼື ຈໍານວນຕອນທີ່ຈະເບິ່ງ
2. ຖ້າທົນບໍ່ໄດ້ທີ່ຈະເບິ່ງໃນຕອນຕໍ່ໄປ ໃຫ້ເບິ່ງໃນຕອນກາງຂອງເລື່ອງແທນ ເພື່ອບໍ່ໃຫ້ເກີດຄວາມຄ້າງຄາໃຈ
3. ຕັ້ງເປົ້າໝາຍໃນຊີວິດໃຫ້ຊັດເຈນ ເຊິ່ງມັນເປັນແຮງຈູງໃຈໃຫ້ໄປເຮັດສິ່ງອື່ນໆ
4. ຊອກຫາກິດຈະກໍາທີ່ຕົນສົນໃຈ ແລະ ແບ່ງເວລາໄປເຮັດກິດຈະກຳອື່ນໆ
5. ພັກຜ່ອນສາຍຕາທຸກໆ 30-40 ນາທີ ໂດຍການລຸກຂຶ້ນໄປດື່ມນ້ຳ, ເຂົ້າຫ້ອງນ້ຳ ຫຼື ຫຼັບຕາ 2-3 ນາທີ.
6. ພະຍາຍາມເຄື່ອນໄຫວຮ່າງກາຍ ຢ່ານັ່ງ ຫຼື ນອນຢູ່ທ່າເກົ່າດົນເກີນໄປ
7. ອອກກຳລັງກາຍໄປພ້ອມ ໄດ້ທັງສຸຂະພາບແຂງແຮງ ແລະ ໄດ້ເບິ່ງຊີຣີ້ເລື່ອງທີ່ມັກນຳອີກ
8. ຊວນໝູ່ ຫຼື ຄົນຮັກມາເບິ່ງນຳກັນ ເພື່ອເພີ່ມຄວາມສໍາພັນ ແລະ ຫຼຸດຜ່ອນເວລາທີ່ໃຊ້ໃນການເບິ່ງໜ້າຈໍເປັນເວລາດົນນານ
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/
