ລາຍການ Youth With You ໄດ້ຖືກຍົກເລີກ ເຖິງລາຍການຈະກ້າວເຂົ້າສູ່ຮອບສຸດທ້າຍກໍຕາມ ແຕ່ກໍຕ້ອງໄດ້ຍົກເລີກ ເພາະແຟນຄລັບໄດ້ສະໜັບສະໜູນໄອດໍ້ຕົນເອງແບບບໍ່ຖືກຕ້ອງ ແລະ ໄດ້ລະເມີດກົດໝາຍຕໍ່ຕ້ານການບໍລິໂພກຟຸມເຟືອຍ ຊື້ນົມມາຫຼາຍຮ້ອຍກ່ອງບໍ່ພາກັນດື່ມ ກາຍເປັນວ່າເອົາແຕ່ QR Code ທີ່ຢູ່ໃນຝານັ້ນມາ ເພື່ອໂຫວດໃຫ້ກັບຜູ້ປະກວດທີ່ຕົນມັກ ສ່ວນນົມກໍຖອກຖິ້ມຢ່າງຫຼວງຫຼາຍ ແລະ ສ້າງຄວາມເສຍຫາຍ, ສ້າງພຶດຕິກຳທີ່ສັງຄົມຮັບບໍ່ໄດ້ ລັດຖະບານຈີນຈຶ່ງໃຫ້ຍົກເລີກຖ່າຍລາຍການນີ້ ຊົ່ວຄາວ ເພື່ອປັບປຸງໃຫ້ຖືກກວ່ານີ້.
ໃນການປະກວດ Season 3 ຄັ້ງນີ້ ມີ Sponsor ຫຼັກຂອງລາຍການຄືແບຣນເຄື່ອງດື່ມນົມສົ້ມ ເຈິນກົ່ວລີ່ ເຊິ່ງລາຍການດຳເນີນມາຈົນເຖິງຂັ້ນຈະຕັດສິນທີມຜູ້ຊະນະ ແຕ່ກະຕິກາຄື: ຕ້ອງໃຫ້ແຟນຄລັບ ໂຫວດໃຫ້ຜູ້ປະກວດທີ່ຕົນເອງມັກ ໂດຍຜ່ານການຊື້ຜະລິດຕະພັນນົມສົ້ມ ແລ້ວສະແກນ QR Code ຢູ່ກ້ອງຝານົມ 1 ຝາເທົ່າກັບ 1 ຄະແນນ ຖ້າຜູ້ປະກວດໄດ້ຄະແນນຈາກການສະແກນຂອງຝາສູງສຸດ 9 ຄົນ ຈະກາຍເປັນຜູ້ຊະນະ ແລະ ກາຍເປັນສະມາຊິກວົງນັກຮ້ອງວົງໃໝ່ທັນທີ.
ຫຼັງຈາກປະກາດກະຕິກາຮອບສຸດທ້າຍນີ້ອອກໄປ 1 ອາທິດກ່ອນວັນປະກາດຜົນ ແຟນຄລັບໄດ້ແຫ່ຊື້ນົມສົ້ມ ຕາມຮ້ານຕ່າງໆຂາຍດີຄືກັບວ່າແຈກຂອງຟຣີ ຈົນເຮັດໃຫ້ຂາດສະຕັອກ ແຕ່ຊື້ແລ້້ວກໍເອົາໄປຖອກຖິ້ມ ເອົາແຕ່ QR Code ເຊິ່ງລະເມີດຕໍ່ກົດໝາຍ.
ທາງລັດຖະບານຈີນຈຶ່ງໃຫ້ຍົກເລີກຊົ່ວຄາວ ໃນວັນທີ 5 ພຶດສາພາ 2021 ເຊິ່ງເຮັດໃຫ້ຜູ້ສະໜັບສະໜູນໄດ້ຮັບຜົນເສຍຢ່າງບໍ່ທັນຕັ້ງຕົວ ແລະ ໃນວັນທີ 9 ພຶດສະພາ 2021 ທາງລາຍການກໍໄດ້ປະກາດ ວ່າ ຂໍຍຸຕິການແຂ່ງຂັນ ແລະ ການຖ່າຍທຳທັງໝົດ.
ແຟນຄລັບລາຍການທົ່ວໂລກເຖິງກັບຕົກໃຈໄປຕາມໆກັນ ແລະ ຕັ້ງຄຳຖາມຕ່າງໆ ເປັນຫ່ວງເຖິງຜູ້ເຂົ້າປະກວດ ແລະ ຕົ້ນສັງກັດຈະຮັບຜິດຊອບແບບໃດ ພ້ອມເຫັນໃຈຜູ້ເຂົ້າປະກວດຢ້ານບໍ່ໄດ້ຮັບຄວາມເປັນທຳ ທີ່ພວກເຂົາໄດ້ກຽມຕົວ, ຕັ້ງໃຈມາປະກວດໂດຍສະເພາະ. ນອກຈາກນີ້ກໍມີຫຼາຍໆຄຳຖາມ ທີ່ກໍ່ໃຫ້ເກີດການວິພາກວິຈານກັນຢ່າງໜັກໜ່ວງ ແລະ ມີຫຼາຍພາກສ່ວນທີ່ໄດ້ຮັບຜົນກະທົບ ຈາກການຍົກເລີກໃນຄັ້ງນີ້.
ຂອບໃຈຂໍ້ມູນຈາກ:https://bit.ly/2Q72XD6
ຕິດຕາມຂ່າວທັງໝົດຈາກ LaoX: https://laox.la/all-posts/
