ບໍ່ວ່າຈະເປັນການນັ່ງຫຼິ້ນ, ນັ່ງເຮັດວຽກ ຫຼື ນັ່ງຊື່ໆ, ຖ້າຫາກນັ່ງໃນທ່າເກົ່າເປັນເວລາດົນໆ ຫຼື ນັ່ງຜິດທ່າກໍເປັນອັນຕະລາຍຕໍ່ເຮົາ ບໍ່ຕ່າງຫຍັງຈາກຜູ້ທີ່ໃຊ້ແຮງງານໃນການເຮັດວຽກເລີຍ, ຫາກໃຜທີ່ມີອາການຢູ່ແລ້ວແຕ່ຍັງນັ່ງໃນທ່າເກົ່າຊ້ຳໆ ອາການກໍອາດຈະໜັກຂຶ້ນເລື້ອຍໆຈົນເຮັດໃຫ້ຕ້ອງໄດ້ເຂົ້າບຳບັດເປັນປີໆ ແລະ ສົ່ງຜົນເສຍອື່ນອີກໄດ້.
ມື້ນີ້ເຮົາຈະມາບອກກ່ຽວກັບທ່ານັ່ງທີ່ຄວນຫຼີກເວັ້ນ ແລະ ທ່ານັ່ງທີ່ຖືກຕ້ອງເພື່ອບັນເທົາອາການປວດເມື່ອຍເມື່ອຕ້ອງນັ່ງເປັນເວລາດົນ.
- ນັ່ງໄຂວ້ຂາ
ຫຼາຍຄົນອາດຈະຮູ້ດີວ່າ ທ່ານັ່ງໄຂວ້ຂາອາດຈະເຮັດໃຫ້ເຮົາເບິ່ງມີບຸກຄະລິກດີ. ແຕ່ເມື່ອເຮົາລົງນໍ້າໜັກໃສ່ຂາ ແລະ ຕີນຂ້າງໃດຂ້າງໜຶ່ງ ເຮັດໃຫ້ການໄຫຼວຽນເລືອດໃນບໍລິເວນຂານັ້ນໄຫຼວຽນບໍ່ຄ່ອຍດີ. ນອກຈາກຈະເມື່ອຍ ແລະ ໜັກຂາຈາກການເຕັງແລ້ວ ມັນຍັງເຮັດໃຫ້ກ້າມເນື້ອສະໂພກ, ແອວ, ແກ່ຍາວໄປຫຼັງຫົວຜິດຮູບ, ກ້າມເນື້ອຂ້າງກະດູກບໍ່ມີຄວາມສົມດຸນ ແລະ ອາດຈະເຮັດໃຫ້ກະດູກສັນຫຼັງງໍ, ເສັ້ນປະສາດເຮັດວຽກຜິດ, ໝອນຮອງກະດູກເສື່ອມ ຫຼື ໝອນຮອງກະດູກທັບເສັ້ນປະສາດ ເຊິ່ງເປັນໂຣກທີ່ນິຍົມຫຼາຍໃນໝູ່ພະນັກງານອັອບຟິດ.
- ນັ່ງຫຼັງກົ່ງ
ນອກຈາກຈະເຮັດໃຫ້ບຸກຄະລິກບໍ່ດີແລ້ວ ການນັ່ງຫຼັງກົ່ງຍັງເຮັດໃຫ້ກະດູກສັນຫຼັງງໍ ໂດຍສະເພາະແມ່ນນັ່ງເປັນເວລາດົນໆ ບໍ່ລຸກໄປໃສເລີຍ ຈະເຮັດໃຫ້ກ້າມເນື້ອເຄັ່ງຕຶງ ເກີດການກັກເກັບຂອງກົດ lactic ເຮັດໃຫ້ຮູ້ສຶກເມື່ອຍຕະຫຼອດເວລາ ແລະ ກະດູກທີ່ຄົດງໍຜິດຮູບຢ່າງຖາວອນ.
- ນັ່ງບໍ່ເຕັມກົ້ນ
ຫຼາຍຄົນມັກຈະນັ່ງບໍ່ຄ່ອຍເຕັມກົ້ນ ຫຼື ມັກນັ່ງພຽງເຄິ່ງກົ້ນເທົ່ານັ້ນ ເຮັດໃຫ້ຫຼັງບໍ່ໄດ້ອີງກັບຕັ່ງນັ່ງ ຈຶ່ງເປັນເຫດໃຫ້ຫຼັງກົ່ງໂດຍບໍ່ຮູ້ຕົວ. ນອກຈາກນີ້ຍັງເຮັດໃຫ້ກ້າມຊີ້ນຫຼັງເຮັດວຽກຫຼາຍຂຶ້ນ ເພາະຖານກົ້ນຮອງຮັບນ້ຳໜັກໄດ້ບໍ່ເຕັມທີ່.
- ນັ່ງຂັດຕະໝາດ, ນັ່ງພັບແພບ
ຫຼາຍຄົນມັກເອົາຂາຂຶ້ນມານັ່ງຂັດຕະໝາດຢູ່ເທິງຕັ່ງ, ການນັ່ງສະມາທິເປັນເວລາດົນ ອາດຈະເຮັດໃຫ້ເກີດອາການຂາຊາ ເນື່ອງເລືອດບໍ່ສາມາດໄຫຼວຽນໄດ້ຢ່າງສະດວກ. ການນັ່ງໃນທ່າດັ່ງກ່າວເປັນເວລາດົນໆຍັງເປັນສາເຫດຂອງອາການຂໍ້ຂາອັກເສບໄດ້.
- ນັ່ງທັບຂາຂ້າງໃດຂ້າງໜຶ່ງເປັນເວລາດົນ
ການຍົກຂາຂ້າງໃດຂ້າງໜຶ່ງ ແລ້ວເອົາຂາອີກຂ້າງທັບ ເຮັດໃຫ້ເລືອດໄຫຼວຽນໄປລ້ຽງຂາໄດ້ບໍ່ສະດວກ. ນອກຈາກນີ້ຍັງສ່ຽງເຮັດໃຫ້ກະດູກສະໂພກ ແລະ ກະດູກສັນຫຼັງຄົດງໍໄດ້.
- ນັ່ງຍົກໄຫຼ່
ຫຼາຍຄົນອາດບໍ່ເຄີຍສັງເກດວ່າຕົນເອງເປັນຄົນທີ່ຍົກໄຫຼ່ຢູ່ຕະຫຼອດເວລາ ໂດຍສະເພາະຄົນທີ່ເຮັດວຽກຢູ່ໜ້າຄອມພິວເຕີ, ເຊິ່ງສາເຫດທີ່ເຮົາຍົກໄຫຼ່ຢູ່ຕະຫຼອດເວລານັ້ນ ຍ້ອນວ່າຕັ່ງນັ່ງ ແລະ ໂຕະວາງຄອມພິວເຕີບໍ່ສຳພັນກັນ ອາດຍ້ອນຕັ່ງທີ່ເຕ້ຍເກີນໄປ ຫຼື ໂຕະທີ່ສູງເກິນໄປ ຈຶ່ງເຮັດໃຫ້ເວລາເຮົາພິມ ຫຼື ໃຊ້ເມົ້າຕ້ອງໄດ້ຍົກໄຫຼ່ຂຶ້່ນມານຳ ເພື່ອທີ່ຈະເຮັດວຽກໄດ້ຢ່າງຖະນັດຂຶ້ນ. ແລະນີ້ເຮັດໃຫ້ເຮົາປວດໄຫຼ່ ແລະ ເປັນສາເຫດຂອງການປວດຫຼັງແບບຊຳເຮຶ້ອ.
ທ່ານັ່ງທີ່ດີສາມາດຊ່ວຍບັນເທົາອາການປວດເມື່ອຍໄດ້ດີ ເພາະສະນັ້ນເຮົາຄວນນັ່ງດ້ວຍທ່ານັ່ງທຳມະດາ ປ່ອຍຂາລົງຕາມສະບາຍທັງສອງຂ້າງ ຫຼັງຕິດເບາະນັ່ງ, ຫາກຕັ່ງນັ່ງມີບ່ອນວາງແຂນ ກໍຄວນປັບຄວາມສູງ – ຕໍ່າໃຫ້ພໍດີກັບໂຕະເຮັດວຽກ ຂໍ້ມືກັບຂໍ້ສອກຕ້ອງຢູ່ໃນລະດັບນາບພຽງກັນ ສ່ວນບ່າໄຫຼ່ກັບຂໍ້ສອກຕັ້ງສາກເປັນມຸມ 90 ອົງສາ, ຫາກຕ້ອງນັ່ງເປັນເວລາດົນໆ ຄວນລຸກໄປຢ່າງຍືດເສັ້ນຍືດສາຍ ແລະ ປ່ຽນທ່າທຸກໆ 15-20ນາທີ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
