ທະນາຄານກາງຂອງໂບລິເວຍ ‘Banco Central de Bolivia’ ໄດ້ອອກມາປະກາດ ຍົກເລີກການຫ້າມການຊຳລະເງິນດ້ວຍ Bitcoin ແລະ cryptocurrency. ພ້ອມອະນຸຍາດໃຫ້ອົງການການເງິນໃນທົ່ວປະເທດສາມາດໃຫ້ບໍລິການທຸລະກໍາຊັບສິນດິຈິຕອນເພື່ອພັດທະນາລະບົບການຊໍາລະທີ່ທັນສະໄໝຫຼາຍຂຶ້ນ.
ການປ່ຽນແປງໃນດ້ານກົດລະບຽບຄັ້ງນີ້ ຖືເປັນຈຸດສິ້ນສຸດຂອງການແບນ cryptocurrency ໃນປະເທດທີ່ເລີ່ມຕົ້ນຕັ້ງແຕ່ໃນປີ 2014, ເຊັ່ນດຽວກັນກັບໃນປີ 2020 ເມື່ອລັດຖະບານໄດ້ຫ້າມບໍ່ໃຫ້ບັນດາທະນາຄານນໍາໃຊ້ cryptocurrency ໃນການເຮັດທຸລະກໍາ.
ເຊິ່ງການອະນຸມັດກົດລະບຽບຫຼ້າສຸດນີ້ຈະຊ່ວຍໃຫ້ທະນາຄານສາມາດເຮັດທຸລະກໍາດ້ວຍສະກຸນເງິນດິຈິຕອນໂດຍຜ່ານຊ່ອງທາງອີເລັກໂທຣນິກທີ່ໄດ້ຮັບການອະນຸມັດ.ຢ່າງໃດກໍຕາມ, ທະນາຄານກາງໄດ້ຊີ້ແຈງວ່າສະກຸນເງິນດິຈິຕອນຍັງບໍ່ທັນໄດ້ຮັບການຍອມຮັບຕາມກົດໝາຍ ແລະ ຈະມີຜົນບັງຄັບໃຊ້ແຕ່ວັນທີ 26 ມິຖຸນານີ້ເປັນຕົ້ນໄປ.
ໂດຍກົດໝາຍໃໝ່ນີ້ແມ່ນໜຶ່ງໃນແຜນການສຶກສາດ້ານເສດຖະກິດ ແລະ ການເງິນຂອງ Banco Central de Bolivia ທີ່ຕ້ອງການປັບກົດລະບຽບໃຫ້ສອດຄ່ອງກັບລະບົບການເງິນໃນອາເມຣິກາລາຕິນ. ລວມທັງການນໍາໃຊ້ສະກຸນເງິນດິຈິຕອນເພື່ອຊ່ວຍກະຕຸ້ນເສດຖະກິດ.
ໃນຊຸມປີມໍ່ໆມານີ້, ບັນດາປະເທດອາເມລຣິກາລາຕິນໄດ້ປະເຊີນໜ້າກັບສະພາບເສດຖະກິດຕົກຕ່ຳ ແລະ ໄພເງິນເຟີ້ເພີ່ມຂຶ້ນ. ດັ່ງນັ້ນ, ປະເທດເຫຼົ່ານີ້ກໍາລັງຊອກຫາຊັບສິນທາງເລືອກ, ເຊິ່ງ Bitcoin ແລະ cryptocurrency ໄດ້ກາຍມາເປັນໜຶ່ງໃນຊັບສິນທີ່ນິຍົມຫຼາຍທີ່ສຸດ.
ນອກຈາກນີ້, ໃນພູມີພາກດັ່ງກ່າວຍັງເປັນທີ່ຢູ່ຂອງ El Salvador, ເຊິ່ງປະເທດທໍາອິດໃນອາເມຣິກາລາຕິນ ແລະ ເປັນປະເທດດຽວໃນໂລກທີ່ນໍາໃຊ້ Bitcoin ຢ່າງຖືກຕ້ອງຕາມກົດໝາຍຄວບຄູ່ໄປກັບເງິນໂດລາສະຫະລັດຕັ້ງແຕ່ປີ 2021.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
