ເມື່ອບໍ່ດົນມານີ້ເພຈທາງການຂອງໂຄງການ Young Southeast Asian Leaders Initiative (YSEALI) ກໍໄດ້ປະກາດລາຍຊື່ບຸກຄົນທີ່ໄດ້ຜ່ານເຂົ້າຮ່ວມໂຄງການ YSEALI SUMMIT 2022. ສຳລັບໂຄງການນີ້ປະເທດລາວເຮົາກໍໄດ້ ມີ 6ຕົວແທນ ທີ່ໄດ້ເຂົ້າຮ່ວມເຊິ່ງປະກອບມີ:
- ສິນສະຫວັນ ສອນປະເສີດ
- ດວງດາລາ ຄຳພັນທອງ
- ທິບພາພອນ ສຸພິດາ
- ສັກດາວົງ ມັງຄະເສີມ
- ຈັນສະໄຫມ ຣັດຕະນະສຸວັນນະຜົນ
- ທິບພະຈັນ ດວງມະນີ
ໂຄງການນີ້ຈັດຂຶ້ນໂດຍສະຖານທູດສະຫະລັດອາເມຣິກາປະຈຳ ນະຄອນ ບັນດາ ເສຣີເບກາວັນ (Bandar Seri Begawan) ຂອງ ບຣູໄນ ໂດຍຈະໄດ້ຮວບຮວມບັນດາໄວໜຸ່ມ YSEALI ຈຳນວນ 90 ຄົນ ຈາກ 10 ປະເທດໃນອາຊຽນ (ລວມທັງປະເທດຕີມໍເລສເຕ) ທີ່ມີສັກກະຍະພາບ, ທັກສະ, ໄຫວພິບ ແລະ ຄວາມສາມາດ ແບບບໍ່ມີຂອບເຂດ ເພື່ອຊ່ວຍກັນເຮັດພາລະກິດແກ້ໄຂບັນຫາກ່ຽວກັບໂລກຮ້ອນ ແລະ ການນຳໃຊ້ເທັກໂນໂລຢີຕ່າງໆ ເພື່ອເຮັດໃຫ້ມີການປ່ຽນແປງແລະເປັນຕົວຈຸດປະກາຍໃນການດຳເນີນການດ້ານສະພາບອາກາດໃນພາກພື້ນອາຊີຕາເວັນອອກສຽງໃຕ້.
ຫົວຂໍ້ຫຼັກໆ ຫຼື ຕີມ ຂອງງານຈະແມ່ນ Empowering Technology for a Greener Future ເຊິ່ງຈະມີຫົວຂໍ້ຍ່ອຍໆ ອີກເຊັ່ນ: Climate Change in SEA (Southeast Asia), ພວກແຄມເປນຕ່າງໆ ແລະ ການທີ່ເຮົານຳໃຊ້ເທັກໂນໂລຢີເຂົ້າມາຊ່ວຍແກ້ໄຂບັນຫາໃນດ້ານນີ້. ນອກນັ້ນຍັງຈະມີການແຂ່ງຂັນຊິງທຶນດຳເນີນໂຄງການ, ການເຂົ້າຝຶກງານກັບໜ່ວຍງານ ແລະ ອົງກອນຊັ້ນນຳຕ່າງໆ.
ໂດຍໂຄງການນີ້ຈະເລີ່ມຕົ້ນປະຕິບັດພາຍໃນເດືອນມີນາ ແກ່ຍາວໄປຈົນຮອດເດືອນພະຈິກ 2022 ເຊິ່ງຮູບແບບຂອງການເຂົ້າຮ່ວມໂຄງການແມ່ນເປັນແບບ ອອນລາຍ. ຂໍສະແດງຄວາມດີໃຈນຳ 6 ຄົນທີ່ເປັນຕົວແທນຂອງປະເທດລາວເຮົາ ທີ່ໄດ້ເຂົ້າຮ່ວມໂຄງການນີ້ ພ້ອມກັນນັ້ນເຊື່ອວ່າທັງ 6 ຄົນຈະຕ້ອງນຳເອົາຄວາມຮູ້, ຄວາມສາມາດ ທັກສະ, ວິໄສທັດ ກັບມາພັດທະນາປະເທດຊາດເຮົາຢ່າງແນ່ນອນ.
ຕິດຕາມຂ່າວທັງໝົດຈາກ LaoX: https://laox.la/all-posts/
