ໃນປີທີ່ຜ່ານມາ ຫຼັງຈາກ Netflix ແພລັດຟອມສາຍຮູບເງົາອອນລາຍ ອັນດັບຕົ້ນໆຂອງໂລກ ປະສົບກັບບັນຫາມີຍອດຜູ້ສະໝັກສະມາຊິກລາຍເດືອນລົດລົງໃນຫຼາຍປະເທດ ເຮັດໃຫ້ Netflix ເລີ່ມເບິ່ງຫາວິທີການ ແລະ ທຸລະກິດໃໝ່ໆ ທີ່ຈະເຂົ້າມາອຸ້ມຊູທຸລະກິດນີ້ໃຫ້ມັນຍ່າງໄປໜ້າໄດ້.
ຫຼ້າສຸດ ກໍຄື Netflix ກຽມເຂົ້າມາບຸກຕະຫຼາດເກມ ໂດຍການພັດທະນາເກມຕ່າງໆ ທັງເກມທີ່ໄດ້ຮັບຄວາມນິຍົມ ຫຼື ເກມທີ່ກ່ຽວຂ້ອງກັບຮູບເງົາ ໃຫ້ບັນດາສະມາຊິກໄດ້ມາຫຼິ້ນກັນໄດ້ໃນແພລັດຟອມ ຜ່ານທາງໂທລະສັບມືຖື ຫຼື ແທັບເລັດ. ໂດຍປັດຈຸບັນປ່ອຍເກມອອກມາແລ້ວກວ່າ 55 ເກມ ແລະ ມີແຜນຈະປ່ອຍເກມໃໝ່ອອກມາອີກຢ່າງໜ້ອຍ 40 ເກມພາຍໃນປີນີ້.
![](https://laox.la/wp-content/uploads/2023/03/image-409.png)
ນອກຈາກນີ້ ຍັງມີລາຍງານວ່າ Netflix ກໍາລັງຢູ່ລະຫວ່າງການຂະຫຍາຍທຸລະກິດເກມ ໃຫ້ສະມາຊິກສາມາດຫຼິ້ນເກມຕ່າງໆ ໄດ້ຜ່ານໜ້າຈໍທີ່ໃຫຍ່ກວ່າ ແລະ ສະດວກກວ່າ ນັ້ນກໍຄືໜ້າຈໍໂທລະພາບ ໂດຍໃຊ້ iPhone, ໂທລະສັບມືຖື ຫຼື ແທັບເລັດ ເປັນອຸປະກອນຄວບຄຸມຕົວເກມ.
ແຕ່ຢ່າງໃດກໍຕາມ Netflix ຍັງບໍ່ໄດ້ຢືນຢັນວ່າການຫຼິ້ນເກມຜ່ານໂທລະພາບນີ້ຈະເປີດໃຫ້ໃຊ້ງານເມື່ອໃດ ເພາະຕອນນີ້ເປັນພຽງການທົດລອງພາຍໃນເທົ່ານັ້ນ ແຕ່ກໍອາດບໍ່ແມ່ນເລື່ອງຍາກເກີນໄປ ເພາະທຸກມື້ນີ້ Smart TV ຫຼາຍຍີ່ຫໍ້ ກໍມີ Netflix ກັນຢູ່ແລ້ວ.
![](https://laox.la/wp-content/uploads/2023/03/image-410.png)
ໂດຍກ່ອນໜ້ານີ້ Netflix ກໍມີແຜນທີ່ຈະໃຫ້ບໍລິການເກມຜ່ານລະບົບຄລາວຢູ່ແລ້ວ ທີ່ຈະໃຫ້ຜູ້ໃຊ້ງານສາມາດຫຼິ້ນເກມຕ່າງໆ ເທິງຄລາວໄດ້ເລີຍ ໂດຍບໍ່ຕ້ອງເຮັດການດາວໂຫຼດ ຫຼື ຕິດຕັ້ງເກມຕ່າງໆ ລົງໃນອຸປະກອນຂອງຕົນເອງ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/