ນັກເທຣດ crypto ລາຍໜຶ່ງໄດ້ສູນເສຍເງີນໄປຫຼາຍກ່ວາ 310,000 ໂດລາ (ປະມານ 6.7 ຕື້ກີບ) ຫຼັງຈາກຖືກຫຼອກລວງຈາກເວັບເທຣດປອມໃນ Linkedin. ໂດຍການໃຊ້ວິທີການສະເໜີຫຼັກສູດ ວີທີການຫາລາຍໄດ້ຈາກການເທຣດ
ຜູ້ເຄາະຮ້າຍໄດ້ເວົ້າວ່າ ລາວໄດ້ຮູ້ຈັກເວັບເທຣດ crypto ທີ່ໃສ່ຊື່ວ່າ “Ethfinance” ໂດຍຜ່ານຄົນທີ່ລາວເພີ່ມເປັນເພື່ອນໃນ Linkedin , ຫຼັງຈາກນັ້ນ Scammer ກໍໄດ້ຫຼອກລວງຜູ້ເຄາະຮ້າຍໃຫ້ໂອນເງິນຫຼາຍກວ່າ 310,000 ໂດລາຈາກກະເປົາເງິນ DeFi ຂອງລາວໄປຫາແພລັດຟອມ ໂດຍອ້າງວ່າຈະຊ່ວຍເຮັດໃຫ້ມີກໍາໄລຈາກການເທຣດ.
ຢ່າງໃດກໍຕາມ, ເມື່ອເຫຍື່ອຕ້ອງການທີ່ຈະຖອນເງິນບາງສ່ວນອອກມາ, ກັບພົບຂໍ້ຄວາມແຈ້ງໃຫ້ໂອນເງິນເພີ່ມເຕີມ ເພື່ອດຳເນີນການ Smart Contract ໃຫ້ສຳເລັດ. ຕໍ່ມາຜູ້ເຄາະຮ້າຍກໍເລິ່ມເອະໃຈ ແລະ ບໍ່ໄດ້ເຮັດຕາມທີ່ຂໍ້ຄວາມບອກ. ຫຼັງຈາກນັ້ນກໍພົບວ່າຕົນເອງຖືກຫຼອກລວງ, ບັນຊີຂອງຕົນເອງຖືກບລັອກ ແລະ ບໍ່ສາມາດຖອນເງິນອອກມາໄດ້.
ໜ່ວຍງານ Washington State Department of Financial Institutions (DFI) ລາຍງານວ່າເວັບໄຊ Ethfinance ເຄີຍຖືກແຈ້ງຮ້ອງຮຽນມາແລ້ວກ່ອນໜ້ານີ້, ໂດຍຜູ້ເຄາະຮ້າຍໄດ້ສູນເສຍເງິນໄປກວ່າ 165,000 ໂດລາ. Scammer ໄດ້ໃຊ້ວິທີການປອມຕົວເຂົ້າໄປເພື່ອສະເໜີຫຼັກສູດສອນເພື່ອຫາເງິນຈາກການຊື້ຂາຍ crypto.
ປັດຈຸບັນ, ເວັບໄຊ Ethfinance ຍັງຄົງເປີດໃຫ້ບໍລິການ ແລະ ຄາດວ່າ Scammers ຍັງຄົງຊອກຫາຜູ້ເຄາະຮ້າຍລາຍໃໝ່. ຜູ້ໃຊ້ Linkedin ຄວນລະມັດລະວັງ, ຢ່າຫຼົງເຊື່ອຂໍ້ຄວາມທີ່ຊັກຊວນໃຫ້ທ່ານລົງທຶນໃນ crypto ຈາກຄົນແປກໜ້າ
ວິທີປ້ອງກັນ:
- ກວດເບິ່ງຂໍ້ມູນເວັບໄຊຢ່າງລະອຽດກ່ອນທີ່ຈະລົງທຶນ.
- ລະວັງຂໍ້ຄວາມຊັກຊວນການລົງທຶນຈາກຄົນແປກໜ້າ.
- ຮຽນຮູ້ກ່ຽວກັບ DeFi Wallet ແລະ Smart Contract.
- ຢ່າໂອນເງິນໄປຫາເວັບໄຊທີ່ບໍ່ໜ້າເຊື່ອຖື.
- ແຈ້ງເຈົ້າໜ້າທີ່ທີ່ກ່ຽວຂ້ອງ ຖ້າຖືກຫຼອກລວງ.
ການສູນເສຍເງິນຈາກການລົງທຶນໃນ crypto ສາມາດເກີດຂຶ້ນໄດ້ຕະຫຼອດເວລາ. ຜູ້ໃຊ້ຄວນສຶກສາຂໍ້ມູນຢ່າງລະອຽດ ແລະ ລົງທຶນດ້ວຍຄວາມລະມັດລະວັງທຸກຄັ້ງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
