Huawei Technologies ວາງແຜນທີ່ຈະຕິດຕັ້ງສະຖານີສາກໄຟຄວາມໄວສູງສຳລັບລົດ EV ຈຳນວນ 100,000 ແຫ່ງ ໃນປະເທດຈີນພາຍໃນປີນີ້, ລວມທັງຮຸ່ນທີ່ມີຄວາມໄວສູງຫຼາຍກວ່າສະຖານີ Supercharger ຂອງ Tesla ເຖິງ 2 ເທົ່າ ເຊິ່ງຈະຊ່ວຍສົ່ງເສີມໂຄງສ້າງພື້ນຖານດ້ານພະລັງງານໃຫ້ກັບລົດທີ່ສາກໄຟຄວາມໄວສູງຈາກຜູ້ຜະລິດລົດຈີນ.
ໂດຍໃນປ້າຍໂຄສະນາຂອງສະຖານີສາກໄຟແຫ່ງໜຶ່ງຢູ່ໃນບ່ອນຈອດລົດຂອງສູນການຄ້າໃນເມືອງ Shenzhen ເຊິ່ງເປັນທີ່ຕັ້ງຂອງສໍານັກງານໃຫຍ່ຂອງ Huawei ໄດ້ມີຂໍ້ຄວາມລະບຸໄວ້ວ່າ “ສາມາດເພີ່ມໄລຍະທາງໄດ້ 1 ກິໂລແມັດທຸກໆວິນາທີ ດ້ວຍກຳລັງໄຟຟ້າ 600 ກິໂລວັດ”
ສະຖານີສາກໄຟຄວາມໄວສູງພິເສດນີ້ພັດທະນາໂດຍ Huawei Digital Power ເຊິ່ງເຄີຍຜະລິດຊິ້ນສ່ວນຂອງສະຖານີສາກໄຟ. ແຕ່ໃນປັດຈຸບັນກໍາລັງຂະຫຍາຍເພື່ອສ້າງສະຖານີສາກໄຟແບບຄົບວົງຈອນ.
ບໍລິສັດ Huawei ວາງແຜນທີ່ຈະຂາຍສະຖານີສາກໄຟໃຫ້ກັບຜູ້ປະກອບການສະຖານີສາກໄຟ ໂດຍມີເປົ້າໝາຍທີ່ຕິດຕັ້ງທັງໝົດ 100,000 ແຫ່ງ, ລວມທັງສະຖານີສາກໄຟ 250 ກິໂລວັດ ໃນສະຖານທີ່ຕ່າງໆເຊັ່ນ: ສູນການຄ້າ ແລະບ່ອນຈອດລົດທາງຫຼວງໃນທ້າຍປີ 2024.
ຈາກການສົມມຸດຖານຂອງ Huawei ສໍາລັບ 1 ກິໂລແມັດຕໍ່ວິນາທີ ຕໍ່ກັບລົດໄຟຟ້າທີ່ມີແບັດເຕີຣີ 80 ກິໂລວັດຊົ່ວໂມງ ແລະ ແລ່ນໄດ້ໄກເຖິງ 600 ກິໂລແມັດ. ການສາກໄຟຈົນເຕັມຈະສຳເລັດພາຍໃນເວລາປະມານ 8 ນາທີເທົ່ານັ້ນ! ໂດຍການສາກໄຟແທ້ອາດແຕກຕ່າງກັນຂຶ້ນຢູ່ກັບອຸນຫະພູມ ແລະ ແບັດເຕີຣີທີ່ຍັງເຫຼືອຢູ່.
ທັງນີ້ກຳລັງໄຟຟ້າ 600 ກິໂລວັດຂອງເຄື່ອງສາກນີ້ແມ່ນຖືວ່າສູງທີ່ສຸດໃນໂລກ. ເມື່ອທຽບກັບເຄື່ອງສາກ Supercharger ຂອງ Tesla ທີ່ມີກໍາລັງໄຟຟ້າສູງສຸດ 250 ກິໂລວັດໃນປະເທດຈີນ ເຊິ່ງໃຊ້ເວລາປະມານ 19 ນາທີເພື່ອສາກເຕັມ.
ນອກຈາກນີ້, Huawei ຍັງໄດ້ລະບຸວ່າສະຖານີສາກໄຟຂອງຕົນສາມາດໃຊ້ງານໄດ້ກັບລົດ EV ທຸກຮຸ່ນ ລວມທັງລົດ Tesla ອີກດ້ວຍ. ການເພີ່ມກໍາລັງໄຟຟ້າຂອງສະຖານີສາກໄຟອາດສົ່ງຜົນໃຫ້ເກີດຄວາມຮ້ອນຫຼາຍຂຶ້ນ. Huawei ໄດ້ແກ້ໄຂບັນຫານີ້ດ້ວຍລະບົບລະບາຍຄວາມຮ້ອນແບບອາຍເຢັນ ເຊິ່ງແຕກຕ່າງຈາກສະຖານີສາກໄຟສ່ວນໃຫຍ່ທີ່ໃຊ້ພັດລົມລະບາຍຄວາມຮ້ອນ. ຖ້າເຄື່ອງສາກດັ່ງກ່າວເປັນທີ່ນິຍົມ ມັນອາດຈະເປັນການຊຸກຍູ້ໃຫ້ບໍລິສັດຈີນທີ່ຜະລິດລົດໄຟຟ້າທີ່ຮອງຮັບການສາກໄວ. ໂດຍໃນເບື້ອງຕົ້ນ Huawei ຈະສຸມໃສ່ຕະຫຼາດພາຍໃນປະເທດ ແຕ່ຍັງບໍ່ທັນຕັດສິນໃຈຂະຫຍາຍທຸລະກິດຢູ່ຕ່າງປະເທດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
