ທຸກຄົນຕ້ອງການມີຄວາມສຸກ ແຕ່ບໍ່ແມ່ນທຸກຄົນຈະຮູ້ວິທີທີ່ຈະມີຄວາມສຸກ. ຍັງມີຫຼາຍຄົນທີ່ສະແຫວງຫາຄວາມທຸກ ແລະ ເສບຕິດຄວາມເຈັບປວດ, ມັກເສີມສ້າງຄວາມຮູ້ສຶກດ້ານລົບ ຫຼື ຄວາມພ່າຍແພ້ໃຫ້ແກ່ຕົນເອງ ເຊິ່ງອາການດັ່ງກ່າວອາດຕົກຢູ່ໃນພາວະ “Chronically Unhappy” ອາການເສບຕິດຄວາມເສົ້າຊຳເຮື້ອ ເຊິ່ງແມ່ນອາການຂອງຄົນທີ່ມັກຕິດພັນກັບການທົນທຸກທໍລະມານ, ມັກໃຫ້ຄວາມໂສກເສົ້າເສຍໃຈ ຫຼື ຄວາມຜິດຫວັງ ເຂົ້າມາທຳຮ້າຍຕົນເອງຊໍ້າແລ້ວຊໍ້າອີກ. ເມື່ອໃດທີ່ເຮົາມີຄວາມສຸກ, ກໍຈະຊອກຫາວິທີທີ່ຈະກັບໄປຕິດຢູ່ໃນຄວາມເຈັບປວດອີກຄັ້ງ.
ພຶດຕິກຳຂອງຄນທີ່ມີພາວະ Chronically Unhappy ສະແດງອອກຄື:
– ການລະເລີຍທີ່ຈະດູແລຕົນເອງ
– ປຽບທຽບຕົນເອງກັບຄົນອື່ນຕະຫຼອດເວລາ
– ມັກຮັບບົດບາດຕົນເອງເປັນຜູ້ເຄາະຮ້າຍ ໂດຍໂຍນຄວາມຜິດໃຫ້ຜູ້ອື່ນ
– ໃຊ້ອາລົມມີຄວາມສຳຄັນເໜືອເຫດຜົນ
– ມັກຈະເຮັດໃຫ້ຕົນເອງຢູ່ໃນຄວາມສໍາພັນທີ່ Toxic ຊໍ້າແລ້ວຊໍ້າອີກ
– ມັກສະແຫວງຫາຄວາມທຸກ ແລະ ຊອກຫາຂໍ້ເສຍໃນທຸກສິ່ງໃນທຸກເລື່ອງ
ພຶດຕິກຳເຫຼົ່ານີ້ສາມາດເກີດຈາກຫຼາຍປັດໄຈເຊັ່ນ: ຄວາມບໍ່ສະຖຽນລະພາບທາງດ້ານຈິດໃຈ, ຄວາມນັບຖືຕົນເອງຕ່ຳ, ເຈັບປ່ວຍ ຫຼື ເປັນໂຣກຊຶມເສົ້າ, ມີປົມກະທົບກະເທືອນຈິດໃຈ ແລະ ຍັງບໍ່ໄດ້ຮັບການແກ້ໄຂ ພ້ອມນັ້ນມັນຍັງລວມເຖິງການລ້ຽງດູ ຄົນທີ່ເຕີບໃຫຍ່ຢູ່ໃນຄອບຄົວເຄັ່ງຄັດຫຼາຍ ແລະ ພໍ່ແມ່ມີຄວາມຄາດຫວັງສູງ, ເຊິ່ງເຮັດໃຫ້ຄວາມສຸກບາງຄັ້ງກໍຜູກມັດກັບຄວາມສໍາເລັດໂດຍບໍ່ໄດ້ຕັ້ງໃຈສົ່ງຜົນໃຫ້ລູກກົດດັນຕົນເອງຈົນນຳໄປສູ່ຄວາມຊຶມເສົ້າ.
ເມື່ອມີຄວາມໂສກເສົ້າ ຫຼື ມີອາລົມທາງລົບ ຮ່າງກາຍກໍຈະປ່ອຍສານເຄມີຄວາມກົດດັນອອກມາ ຖ້າເຮົາເຮັດພຶດຕິກຳທີ່ເຮັດໃຫ້ຕົນເອງຊຶມເສົ້າຊໍ້າໆ ມັນຈະກະຕຸ້ນຮໍໂມນດັ່ງກ່າວອອກມາເລື້ອຍໆ ແລະ ເຮັດໃຫ້ຮ່າງກາຍເສບຕິດຄວາມເສົ້າໂດຍບໍ່ຮູ້ຕົວ.
ວິທີປ້ອງກັນຕົນເອງບໍ່ໃຫ້ຜູກຕິດຢູ່ໃນຄວາມທຸກ.
1.ທຳຄວາມເຂົ້າໃຈເມື່ອພົບກັບຄວາມຜິດຫວັງ
ທຸກຄົນສາມາດໂສກເສົ້າໄດ້ ແຕ່ຕ້ອງບໍ່ຜູກຕິດກັບມັນເກີນໄປ. ໃຫ້ເຂົ້າໃຈວ່າ “ຄວາມຜິດຫວັງເປັນເລື່ອງປົກກະຕິຂອງໂລກ”
.ຖ້າເຮົາເຮັດສຸດຄວາມສາມາດແລ້ວ ເຖິງແມ່ນວ່າຈະບໍ່ປະສົບຜົນສຳເລັດ ແຕ່ກໍໄດ້ບົດຮຽນ ແລະ ປະສົບການ.
2.ເລືອກຢູ່ໃນສະພາບແວດລ້ອມທີ່ດີ.
ຈົ່ງພາຕົນເອງໄປຢູ່ໃນສະພາບແວດລ້ອມທີ່ດີ, ທີ່ເປັນມິດ, ມີທັດສະນະຄະຕິມຸມມອງບວກ, ໃຫ້ກຳລັງໃຈ ແລະ ສະໜັບສະໜູນເຮົາໄປໃນທາງທີ່ດີຂຶ້ນເລື້ອຍໆ ຫຼີກລ້ຽງຄວາມສຳພັນດ້ານລົບທຸກຮູບແບບ.
3.ບໍ່ຈົມປັກໃນເລື່ອງບໍ່ດີ ແລະ ຊອກຫາຂໍ້ບົກພ່ອງໃນທຸກຢ່າງ.
ເລື່ອງທີ່ຜ່ານມາແລ້ວກໍເປັນພຽງອະດີດ ລອງເຝິກຕົນເອງໃຫ້ປ່ອຍວາງ ແລະ ຝຶກຫາຂໍ້ດີຫຼາຍກວ່າຂໍ້ເສຍໃນເລື່ອງຕ່າງໆ ມັນອາດຈະບໍ່ງ່າຍໃນຕອນທໍາອິດ, ແຕ່ທຸກທ່ານສາມາດເຮັດໄດ້ລອງເປີດໃຈໃຫ້ກວ້າງຂຶ້ນ.
4.ເລືອກຕິດຕາມສື່ທີ່ມີປະໂຫຍດ
ເຮົາສາມາດເລືອກເບິ່ງສາລະໜ້າຮູ້ ຫຼື ສື່ສັງຄົມທີ່ເປັນປະໂຫຍດແກ່ເຮົາໄດ້ເພື່ອຫຼີກຈາກຄວາມຕຶງຄຽດ ແລະ ບໍ່ພົວພັນກັບຂ່າວສານດຣາມ່າ ຫຼື ດ້ານລົບທີ່ຈະໄປສູ່ການສ້າງຄວາມເຄັ່ງຄຽດແກ່ຕົວທ່ານເອງ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/