ລາວ, ໄທ ຮ່ວມມື ແນໃສ່ການສະກັດກັ້ນ ເສັ້ນທາງການເງິນ ທີ່ຢູ່ເບື້ອງຫຼັງແກັ່ງຄໍເຊັນເຕີ
ສປປ ລາວ ແລະ ໄທ ກຳລັງເພີ່ມທະວີການຮ່ວມມືເພື່ອຕິດຕາມ ແລະ ທຳລາຍກະແສການໄຫຼວຽນຂອງເງິນທີ່ເອື້ອອຳນວຍໃຫ້ແກ່ສູນການຫຼອກລວງ (ແກັ່ງຄໍເຊັນເຕີ) ແລະ ເຄືອຂ່າຍອາຊະຍາກຳຂ້າມຊາດອື່ນໆທີ່ກຳລັງຂະຫຍາຍຕົວ.
ໃນການລາຍງານໜັງສືພີມປະຊາຊົນ, ສະຖານເອກອັກຄະຣາຊະທູດໄທ ປະຈຳ ສປປ ລາວ ໄດ້ຈັດກອງປະຊຸມສຳມະນາກ່ຽວກັບການປ້ອງກັນ ແລະ ປາບປາມການຟອກເງິນທີ່ກ່ຽວຂ້ອງກັບແກັ່ງຄໍເຊັນເຕີ ໃນວັນທີ 21 ກັນຍາ ທີ່ຜ່ານມາ.
ກອງປະຊຸມຄັ້ງນີ້ໄດ້ມີຜູ້ຕາງໜ້າຈາກບັນດາກະຊວງຂອງລາວ, ຂະແໜງຍຸຕິທຳ, ທະນາຄານ, ຕຳຫຼວດສືບສວນ-ສອບສວນອາຊະຍາກຳ ແລະ ສຳນັກງານຂໍ້ມູນຂ່າວສານຕ້ານການຟອກເງິນ, ພ້ອມທັງນັກການທູດ, ອົງການຈັດຕັ້ງສາກົນ ແລະ ຊ່ຽວຊານອື່ນໆ ເຂົ້າຮ່ວມ.
ທ່ານ ນາງ ຄຣອງຂະນິດ ຣັກຈະເລີນ ເອກອັກຄະຣາຊະທູດໄທ ປະຈຳ ສປປ ລາວ ກ່າວວ່າ: ສູນການຫຼອກລວງ ແລະ ການສໍ້ໂກງທາງອອນລາຍໄດ້ພັດທະນາໄປໄກກວ່າການຫຼອກລວງແບບທຳມະດາ ແລະ ໄດ້ກາຍເປັນຮູບແບບຕົ້ນຕໍຂອງອາຊະຍາກຳການຈັດຕັ້ງຂ້າມຊາດ.
“ຄືອຂ່າຍແກ້ງຄໍເຊັນເຕີ (Call Center) ແລະ ການຕົ້ມຕຸ໋ນອອນລາຍ ບໍ່ແມ່ນພຽງແຕ່ການຫຼອກລວງທໍາມະດາອີກຕໍ່ໄປ, ແຕ່ໄດ້ຂະຫຍາຍຕົວກວ້າງຂຶ້ນ ເປັນອົງການອາຊະຍາກໍາຂ້າມຊາດ ທີ່ສ້າງຄວາມເສຍຫາຍທາງດ້ານເສດຖະກິດຢ່າງມະຫາສານ, ກະທົບຕໍ່ປະຊາຊົນນັບລ້ານຄົນໃນພູມິພາກ ແລະ ທົ່ວໂລກ,” ທ່ານນາງກ່າວ.
ທ່ານທູດຍັງໄດ້ເຊື່ອມໂຍງການປະຕິບັດງານຂອງແກັ່ງຫຼອກລວງເຂົ້າກັບການຄ້າມະນຸດ ແລະ ການລະເມີດສິດທິມະນຸດຢ່າງຮ້າຍແຮງ, ໂດຍກ່າວວ່າ ການຟອກເງິນໄດ້ກາຍເປັນເຄື່ອງມືສຳຄັນທີ່ຊ່ວຍໃຫ້ເຄືອຂ່າຍອາຊະຍາກຳສາມາດຢູ່ລອດ ແລະ ເຕີບໂຕໄດ້.
ທ່ານນາງກ່າວຕື່ມວ່າ ສູນການຫຼອກລວງສ້າງລາຍຮັບທີ່ຜິດກົດໝາຍ, ໃນຂະນະທີ່ການຟອກເງິນກໍເປັນຊ່ອງທາງໃນການປິດບັງ ແລະ ເຄື່ອນຍ້າຍລາຍຮັບເຫຼົ່ານັ້ນ, ເຮັດໃຫ້ກຸ່ມອາຊະຍາກອນສາມາດນຳເອົາເງິນໄປລົງທຶນຄືນໃນການດຳເນີນງານຂອງພວກເຂົາ ແລະ ພັດທະນາວິທີການທີ່ຊັບຊ້ອນຫຼາຍຂຶ້ນ.
ຄວາມເຊື່ອມໂຍງທາງດ້ານການເງິນນີ້ ກຳລັງກາຍເປັນຈຸດສຸມສຳຄັນຂອງຄວາມພະຍາຍາມໃນການຕ້ານສູນການຫຼອກລວງໃນທົ່ວອະນຸພາກພື້ນແມ່ນໍ້າຂອງ. ເຄືອຂ່າຍອາຊະຍາກຳນັບມື້ນັບນຳໃຊ້ເຕັກໂນໂລຊີດິຈິຕອນ, ເງິນຄຣິບໂຕ (cryptocurrency) ແລະ ບັນຊີມ້າ (mule accounts) ເພື່ອເຄື່ອນຍ້າຍເງິນ ຊຶ່ງເຮັດໃຫ້ເຈົ້າໜ້າທີ່ສືບສວນຕິດຕາມຮ່ອງຮອຍໄດ້ຍາກຂຶ້ນ.
ດັ່ງນັ້ນ, ງານສຳມະນາຈຶ່ງໄດ້ໃຫ້ຄວາມສຳຄັນຢ່າງຍິ່ງຕໍ່ການຕິດຕາມທຸລະກຳທາງການເງິນ ແລະ ການຕັດຊ່ອງທາງທີ່ສະໜັບສະໜູນກິດຈະກຳທາງອາຊະຍາກຳ.
ຜູ້ເຂົ້າຮ່ວມໄດ້ສົນທະນາກ່ຽວກັບວິທີການກຳນົດ ແລະ ລະງັບບັນຊີມ້າທີ່ຕ້ອງສົງໄສແບບທັນທີ (real time), ການອາຍັດຊັບສິນທີ່ຜິດກົດໝາຍ, ການຍຶດຄືນລາຍຮັບຈາກອາຊະຍາກຳ ແລະ ການເສີມຂະຫຍາຍການຮ່ວມມືຂ້າມຊາຍແດນ.
ນອກຈາກນີ້, ຍັງໄດ້ມີການກວດກາເບິ່ງການນຳໃຊ້ຊັບສິນດິຈິຕອນທີ່ເພີ່ມຂຶ້ນ ແລະ ນາຍໜ້າຊື້ຂາຍເງິນຄຣິບໂຕນອກລະບົບທີ່ບໍ່ມີການຄຸ້ມຄອງ ເຊິ່ງສາມາດເປັນຊ່ອງທາງເພີ່ມເຕີມໃນການເຄື່ອນຍ້າຍເງິນທຶນທີ່ຜິດກົດໝາຍ.
ສຳລັບ ສປປ ລາວ, ການສົນທະນາດັ່ງກ່າວມີຂຶ້ນໃນຂະນະທີ່ລັດຖະບານພວມເລັ່ງຄວາມພະຍາຍາມໃນການສ້າງຄວາມເຂັ້ມແຂງໃຫ້ແກ່ລະບົບການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ. ແລະ ການປາບປາມແກ້ງຄໍເຊັນເຕີຢ່າງຕໍ່ເນື່ອງໃນໄລຍະທີ່ຜ່ານມາ.
ງານສຳມະນາຍັງໄດ້ພິຈາລະນາເຖິງລະບົບນິເວດຂອງສູນການຫຼອກລວງໃນວົງກວ້າງ, ລວມເຖິງວິທີການດຳເນີນງານຂອງກຸ່ມອາຊະຍາກອນ, ທ່າອ່ຽງໃນພາກພື້ນ ແລະ ຄວາມເຊື່ອມໂຍງລະຫວ່າງການສໍ້ໂກງທາງອອນລາຍ, ການພະນັນຜິດກົດໝາຍ, ການຟອກເງິນ ແລະ ການຄ້າມະນຸດ.
ຈຸດສຸມຂອງງານດັ່ງກ່າວສະທ້ອນໃຫ້ເຫັນເຖິງການປ່ຽນແປງທີ່ກວ້າງຂຶ້ນໃນການຕໍ່ສູ້ກັບການຫຼອກລວງທາງອອນລາຍ, ໂດຍການສືບສວນທາງດ້ານການເງິນໄດ້ກາຍເປັນພາກສ່ວນສຳຄັນຂອງຄວາມພະຍາຍາມໃນການທຳລາຍເຄືອຂ່າຍອາຊະຍາກຳ. ການແກະຮອຍເສັ້ນທາງການເງິນສາມາດຊ່ວຍໃຫ້ເຈົ້າໜ້າທີ່ສືບສວນບໍ່ພຽງແຕ່ລະບຸຕົວຜູ້ທີ່ມີສ່ວນກ່ຽວຂ້ອງໂດຍກົງໃນການຫຼອກລວງເທົ່ານັ້ນ, ແຕ່ຍັງລວມເຖິງຊ່ອງທາງການເງິນທີ່ເຮັດໃຫ້ການປະຕິບັດງານສາມາດດຳເນີນຕໍ່ໄປໄດ້.
ຜູ້ຕາງໜ້າຈາກລາວ ແລະ ໄທ ຍັງໄດ້ປຶກສາຫາລືກ່ຽວກັບການຮ່ວມມືໃນອະນາຄົດ, ໂດຍງານສຳມະນາໄດ້ຕັ້ງເປົ້າໝາຍໃນການພັດທະນາແນວຄວາມຄິດສຳລັບແຜນທີ່ນຳທາງ (roadmap) ສອງຝ່າຍ ເຊິ່ງກວມເອົາການສືບສວນທາງດ້ານການເງິນ, ການຍຶດຄືນຊັບສິນ, ການແບ່ງປັນຂໍ້ມູນຂ່າວສານ ແລະ ມາດຕະການອື່ນໆ.
ກອງປະຊຸມຄັ້ງນີ້ມີ ທ່ານ ຣິຊາດ ຟີລິປາດ (Richard Philipart) ຫົວໜ້າຫ້ອງການອົງການສະຫະປະຊາຊາດວ່າດ້ວຍຢາເສບຕິດ ແລະ ອາຊະຍາກຳ (UNODC) ປະຈຳ ສປປ ລາວ, ບັນດາຄະນະທູດານຸທູດ ແລະ ຜູ້ຕາງໜ້າຈາກອົງການຈັດຕັ້ງສາກົນ ລວມເຖິງສະຖາບັນຄົ້ນຄວ້າ ແລະ ຝຶກອົບຮົມກົດໝາຍສາກົນເຂົ້າຮ່ວມ.
ງານສຳມະນາດັ່ງກ່າວມີຈຸດປະສົງເພື່ອຮັດແໜ້ນການຮ່ວມມືລະຫວ່າງ ລາວ, ໄທ ແລະ ບັນດາຄູ່ຮ່ວມງານສາກົນ, ຄຽງຄູ່ກັບການສະໜັບສະໜູນຄວາມພະຍາຍາມໃນການປົກປ້ອງລະບົບການເງິນຂອງພາກພື້ນຈາກກິດຈະກຳອາຊະຍາກຳຂ້າມຊາດ.
#LaoX #ລາວໄທ #ຕ້ານການຟອກເງິນ #ແກັ່ງຄໍເຊັນເຕີ #ອາຊະຍາກຳຂ້າມຊາດ #ຄວາມປອດໄພທາງໄຊເບີ #Laos #Thailand #AntiMoneyLaundering #ScamCentres #CyberSecurity
