“ ກິນຂອງຫວານລ້າງຄາວ ” ປະໂຫຍກນີ້ ຫຼາຍຄົນອາດຄຸ້ນຫູກັນແມ່ນບໍ່. ໂດຍປົກກະຕິແລ້ວ, ຄົນສ່ວນຫຼາຍມັກກິນຂອງຫວານເຊັ່ນ: ໝາກໄມ້, ເຂົ້າໜົມຫວານ, ນໍ້າຫວານ… ຫຼັງກິນເຂົ້າສຳເລັດ. ບັນດາທ່ານຮູ້ກັນບໍ່ວ່າ, ການກິນຂອງຫວານຫຼັງຄາບອາຫານໃນປະລິມານທີ່ຫຼາຍເກີນໄປມີຜົນເສຍຕໍ່ສຸຂະພາບຫຼາຍຢ່າງ ເຊັ່ນ: ໂຣກເບົາຫວານ, ໄຂມັນອຸດຕັນໃນເສັ້ນເລືອດ…
ລອງມາກວດເບິ່ງນຳກັນວ່າທ່ານເປັນຄົນໜຶ່ງທີ່ມີອາການຕິດຫວານຢູ່ບໍ່
•ຕ້ອງໄດ້ກິນອາຫານຫວານຫຼັງຈາກກິນເຂົ້າສຳເລັດ
•ຮູ້ສຶກວ່າຢາກກິນຂອງຫວານທີ່ມັກເລື້ອຍໆ
•ຮູ້ສຶກເມື່ອຍ, ກະວົນກະວາຍ ຫຼື ອາລົມບໍ່ດີ ໃນເວລາທີ່ຂາດແຄນອາຫານ ຫຼື ອາຫານວ່າງທີ່ມີແປ້ງ ຫຼື ນ້ຳຕານ
•ມັກຄິດເລື່ອງອາຫານຢູ່ເລື້ອຍໆ ເຖິງແມ່ນວ່າຫາກໍກິນອາຫານສຳເລັດ
•ມັກກິນໝາກໄມ້ຫວານໆເຊັ່ນ: ໝາກຫຸ່ງ, ຖົ່ວລຽນ, ໝາກນັດ…
•ມັກກິນໝາກໄມ້ແຫ້ງ, ໝາກໄມ້ດອງ
•ຕື່ມນໍ້າຕານໃສ່ໃນທຸກເມນູອາຫານ, ເຊັ່ນ: ເຝີ, ນໍ້າປຽກ, ແກງ…
•ເລືອກກິນເຄື່ອງດື່ມຫວານໆແທນນໍ້າ ເຊັ່ນ: ຊາເຢັນ, ຊາຂຽວ, ແປັບຊີ…
•ຕ້ອງມີຂອງຫວານຕິດໄວ້ໃນຕູ້ເຢັນ
•ມັກຫິວຕະຫຼອດ
ຢ່າງໃດກໍຕາມ, ຮ່າງກາຍຂອງຄົນເຮົາພຽງແຕ່ຕ້ອງການນ້ຳຕານໃນປະລິມານທີ່ເໝາະສົມເທົ່ານັ້ນ. ຖ້າເຮົາຫາກກິນນໍ້າຕານໃນປະລິມານທີ່ຫຼາຍເກີນໄປ ຮ່າງກາຍຈະປ່ອຍຮໍໂມນອິນຊູລິນ ເພື່ອຄວບຄຸມລະດັບນໍ້າຕານໃນເລືອດ. ແຕ່ເມື່ອໃດທີ່ລະດັບນໍ້າຕານໃນເລືອດຫຼຸດລົງ, ຮ່າງກາຍຈະສົ່ງສັນຍານໃຫ້ສະຫມອງຮັບຮູ້ວ່າກຳລັງເກີດຄວາມຫິວ ແລະ ຢາກກິນຂອງຫວານ ເພື່ອເພີ່ມລະດັບນໍ້າຕານໃນເລືອດໃຫ້ກັບຄືນສູ່ປົກກະຕິ, ແຕ່ເຮົາບໍ່ຄວນກິນໃນປະລິມານຫຼາຍເກີນໄປ.
ມື້ນີ້, LaoX ໄດ້ນຳ 5 ເຄັດລັບການເອົາຊະນະຄວາມຢາກຂອງຫວານມາຝາກກັນ.
1). ກິນອາຫານໃຫ້ອີ່ມກ່ອນ
ເມື່ອກິນອາຫານເຕັມທີ່ແລ້ວ ຈະຊ່ວຍໃຫ້ເຮົາຮູ້ສຶກອີ່ມທອງແລະ ບໍ່ຢາກກິນຂອງຫວານຫຼັງອາຫານ. ບັນດາທ່ານພະຍາຍາມເລືອກອາຫານທີ່ມີໂພຊະນາການ ແລະ ຍ່ອຍງ່າຍ ເຊັ່ນ: ຜັກ, ໝາກໄມ້, ໂປຣຕີນ ເປັນຕົ້ນ.
2). ດື່ມນ້ຳພຽງພໍ
ບາງຄັ້ງຄວາມຢາກຂອງຫວານສາມາດເກີດຈາກການຂາດນ້ຳ. ພະຍາຍາມດື່ມນ້ໍາໃຫ້ພຽງພໍ 1.5 ລິດ ເຖິງ 2.5 ລິດຕໍ່ມື້. ເພື່ອຊ່ວຍເພີ່ມນ້ຳໃຫ້ກັບຮ່າງກາຍ ແລະ ເຮັດໃຫ້ຮູ້ສຶກອີ່ມທ້ອງ.
3). ຊອກຫາກິດຈະກໍາທີ່ຕ້ອງເຮັດຫຼັງຈາກກິນອາຫານ
ຊອກຫາກິດຈະກໍາທີ່ຕ້ອງເຮັດຫຼັງຈາກອາຫານ ເພື່ອຊ່ວຍຫຼີກເວັ້ນຄວາມສົນໃຈຈາກການຫິວຂອງຫວານ ເຊັ່ນ: ອອກກໍາລັງກາຍ, ອ່ານປຶ້ມ ຫຼື ເບິ່ງຮູບເງົາ.
4). ມີຂອງຫວານທີ່ເປັນປະໂຫຍດຢູ່ເຮືອນ
ຫາກທ່ານຮູ້ສຶກຢາກຂອງຫວານແທ້ໆແທນທີ່ຈະເລືອກກິນຂອງຫວານທີ່ບໍ່ເປັນປະໂຫຍດ, ແຕ່ໃຫ້ກັບມາເລືອກກິນທາດບໍາລຸງແທນເຊັ່ນ: ໝາກໄມ້ສົດ, ໂຢເກິດ, ຫຼື ຫມາກຖົ່ວ.
5).ຈົ່ງອົດທົນ ແລະ ບໍ່ເຄີຍຍອມແພ້.
ການເອົາຊະນະຄວາມຢາກຫວານຕ້ອງໃຊ້ຄວາມອົດທົນ ແລະລະບຽບວິໄນ. ສະນັ້ນ, ພະຍາຍາມປະຕິບັດຕາມຄໍາແນະນໍາທີ່ກ່າວມາຂ້າງເທິງນີ້ເປັນປະຈໍາ ແນ່ນອນວ່າຈະຊ່ວຍໃຫ້ທ່ານຄວບຄຸມພຶດຕິກຳການກິນຂອງຫວານໄດ້ຢ່າງເໝາະສົມ.
ແຫຼ່ງທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
