ໃນປັດຈຸບັນ, ບໍ່ສາມາດປະຕິເສດໄດ້ເລີຍວ່າແປ້ງນົວ ແມ່ນຖືກນໍາໃຊ້ປຸງແຕ່ງຢ່າງກວ້າງຂວາງໃນຄົວເຮືອນ ແລະ ຮ້ານອາຫານເກືອບທຸກເມນູອາຫານ. ເພາະວ່າແປ້ງນົວ ຊ່ວຍເພີ່ມຣົດຊາດຂອງອາຫານໃຫ້ແຊບຂຶ້ນ. ແຕ່ທຸກທ່ານເຄີຍສົງໄສບໍ? ເປັນຫຍັງເຮົາຈຶ່ງຮູ້ສຶກຫິວນໍ້າ ເມື່ອເຮົາກິນອາຫານທີ່ມີສ່ວນປະສົມຂອງແປ້ງນົວ. ມື້ນີ້, LaoX ມີຄຳຕອບມາໃຫ້ທຸກຄົນໄດ້ຄາຍຄວາມສົງໄສໄປພ້ອມກັນ.
ແປ້ງນົວ ແມ່ນເຄື່ອງປຸງທີ່ມີທາດແປ້ງມັນຕົ້ນ ແລະ ກາກນໍ້າຕານເປັນສ່ວນປະກອບສໍາຄັນ. ໂດຍຜ່ານຂະບວນການໝັກດ້ວຍຈຸລິນຊີ Corynebacterium glutamicum ຫຼື Brevibacterium lactofermentum ແລະ ຂະບວນການຕ່າງໆ ຈົນກວ່າມັນກາຍເປັນຜະລິດຕະພັນສໍາລັບການປຸງຣົດຊາດໃນອາຫານ. ຄວາມຈິງທີ່ວ່າແປ້ງນົວ ເຮັດໃຫ້ອາຫານແຊບຫຼາຍ ເພາະແປ້ງນົວຊ່ວຍໃຫ້ໄຂມັນໃນອາຫານລະລາຍໄດ້ດີຂຶ້ນ ມັນມີຣົດຊາດຄ້າຍຄືກັນກັບນ້ຳຕົ້ມຊີ້ນ ເຊິ່ງຈະຊ່ວຍກະຕຸ້ນເສັ້ນປະສາດໃນລີ້ນ ແລະ ຄໍ. ເມື່ອເປັນແນວນັ້ນ, ລີ້ນຈຶ່ງສາມາດຮັບຣົດຊາດອາຫານໄດ້ໄວ ແລະ ດົນຂຶ້ນ. ດັ່ງນັ້ນແລ້ວ, ຜູ້ບໍລິໂພກຈະຮູ້ສຶກວ່າອາຫານຣົດຊາດກົມກ່ອມ ແລະ ແຊບກວ່າປົກກະຕິນັ້ນເອງ.
•ສາເຫດທີ່ເຮັດໃຫ້ຫິວນໍ້າເມື່ອຮັບປະທານອາຫານທີ່ປະກອບດ້ວຍແປ້ງນົວ
ກິນອາຫານທີ່ມີຣົດຊາດເຂັ້ມຂຸ້ນຫຼາຍ ມັນຈະເຮັດໃຫ້ທ່ານຮູ້ສຶກແຫ້ງຄໍ ແລະ ຫິວນ້ຳ. ໂດຍສະເພາະຖ້າມີສ່ວນປະກອບຂອງ ໂຊດຽມໃນເຄື່ອງປຸງຫຼາຍເທົ່າໃດ ເມື່ອກິນແລ້ວຍິ່ງເຮັດໃຫ້ເລືອດເຂັ້ມຂຸ້ນຂຶ້ນ. ດັ່ງນັ້ນ, ຮ່າງກາຍຈຶ່ງຕ້ອງການນ້ຳຫຼາຍກວ່າປົກກະຕິ ເພື່ອສ້າງຄວາມສົມດຸນການເຮັດວຽກຂອງລະບົບອະໄວຍະວະຕ່າງໆກັບຄືນສູ່ສະພາບປົກກະຕິ ສົ່ງຜົນໃຫ້ຜູ້ບໍລິໂພກຮູ້ສຶກຫິວນໍ້າຫຼາຍຂຶ້ນນັ້ນເອງ.
ແນວທາງການປ້ອງກັນປະຕິກິລິຍາທາງລົບຂອງແປ້ງນົວ
- ຫຼີກເວັ້ນອາຫານສຳເລັດຮູບ ຫຼື ອາຫານທີ່ປຸງແຕ່ງກິ່ນຣົດຊາດຫຼາຍເກີນໄປ
- ແຕ່ງອາຫານກິນເອງ ເພື່ອກຳນົດປະລິມານແປ້ງນົວໄດ້ຕາມຄວາມເໝາະສົມ
- ເລືອກກິນອາຫານທີ່ຍັງບໍ່ໄດ້ຮັບການປຸງແຕ່ງມາກ່ອນ
- ເລືອກຜະລິດຕະພັນອາຫານທີ່ບໍ່ມີແປ້ງນົວ ຫຼື ມີໜ້ອຍທີ່ສຸດ ໂດຍເບິ່ງໄດ້ຈາກຖົງຜະລິດຕະພັນ
- ຖ້າມີອາການຜິດປົກກະຕິເກີດຂຶ້ນເຊັ່ນ: ເຈັບຫົວ, ເຫື່ອອອກ, ຫົວໃຈເຕັ້ນໄວ, ຜິວໜັງແດງ, ຫຼື ຮ້ອນໃບໜ້າ ແລະ ຄໍ ຫຼັງຈາກກິນອາຫານ, ທ່ານຄວນໄປຫາທ່ານໝໍທັນທີ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/
