ລັດຖະບານອິນໂດເນເຊຍ ກຽມອອກໂຄງການ Golden VISA ເພື່ອດຶງດູດນັກລົງທຶນຊາວຕ່າງຊາດທັງປະເພດບຸກຄົນທຳມະດາ ແລະ ນິຕິບຸກຄົນ ທີ່ສາມາດຢູ່ໄດ້ເຖິງ 5-10 ປີ ເພື່ອດຶງດູດນັກລົງທຶນ ເຊິ່ງເປັນໜຶ່ງຂອງຄວາມພະຍາຍາມໃນການກະຕຸ້ນເສດຖະກິດຂອງປະເທດ.
Silmy Karim ຫົວໜ້າກົມກວດຄົນເຂົ້າເມືອງຂອງອິນໂດເນເຊຍເປີດເຜີຍວ່າ Golden VISA ຈະອະນຸຍາດໃຫ້ຜູ້ຖືສາມາດອາໄສຢູ່ໃນອິນໂດເນເຊຍເປັນໄລຍະເວລາ 5-10 ປີ ໂດຍບໍ່ຈຳເປັນຕ້ອງຍື່ນຂໍອະນຸຍາດທີ່ຢູ່ອາໄສແບບຊົ່ວຄາວອີກຕໍ່ໄປ.
ສຳລັບນັກລົງທຶນປະເພດບຸກຄົນທຳມະດາທີ່ຕ້ອງການຂໍຮັບ ວີຊ່າ ປະເພດຢູ່ 5 ປີ ຈະຕ້ອງມີການຕັ້ງບໍລິສັດໃນອິນໂດເນເຊຍ ດ້ວຍວົງເງິນລົງທຶນບໍ່ຕໍ່າກວ່າ 2,5 ລ້ານໂດລາ ແລະ ສຳລັບແບບ 10 ປີ ຕ້ອງມີການລົງທຶນຢູ່ບໍ່ຕໍ່ກວ່າ 5 ລ້ານໂດລາ ຈຶ່ງຈະສາມາດຂໍ ວີຊ່າປະເພດນີ້ໄດ້.
ຂະນະທີ່ນັກລົງທຶນປະເພດນິຕິບຸກຄົນ ຕ້ອງລົງທຶນ 25 ລ້ານໂດລາ ໂດຍຜູ້ອຳນວຍການ ແລະ ຄະນະກຳມະການຈະໄດ້ຮັບວີຊ່າແບບ 5 ປີ ສ່ວນນິຕິບຸກຄົນໃດຢາກໄດ້ວີຊ່າ ແບບ 10 ປີ ຕ້ອງລົງທຶນເພີ່ມອີກ 2 ເທົ່າ ຫຼື ເທົ່າກັບ 50 ລ້ານໂດລາ ຈຶ່ງຈະສາມາດຮັບວີຊ່າແບບ 10 ປີ ໄດ້.
ໂດຍສຳລັບ Golden VISA ກໍເຄີຍເກີດຂຶ້ນໃນຫຼາຍໆປະເທດ ເຊັ່ນ ສະຫະລັດ ອາເມຣິກາ, ໄອແລນ, ນິວຊີແລນ ແລະ ສະເປນ ເຊິ່ງມີລັກສະນະ ແລະ ຈຸດປະສົງຄ້າຍໆກັນກໍຄື ເພື່ອດຶງດູດເມັດເງິນການລົງທຶນ ແລະ ບັນດາຜູ້ປະກອບການໃຫ້ເຂົ້າມາລົງທຶນ ແລະ ອາໄສຢູ່ໃນປະເທດຂອງຕົນເອງ ເພື່ອກະຕຸ້ນເສດຖະກິດໃນປະເທດ.
ຕິດຕາມຂ່າວທັງໝົດຈາກ LaoX: https://laox.la/all-posts/
