ສະຫະລັດໄດ້ສ້າງຄວາມປະຫຼາດໃຈໃນອຸດສາຫະກໍາເຕັກໂນໂລຊີ ໂດຍການຍົກເລີກໃບອະນຸຍາດສົ່ງອອກຊິບໃຫ້ກັບ Huawei ຍັກໃຫຍ່ໂທລະຄົມຂອງຈີນ. ໃນແຫຼ່ງຂ່າວພາຍໃນຍັງເປີດເຜີຍອີກວ່າ ບໍລິສັດໃນສະຫະລັດຄື Intel ແລະ Qualcomm ໄດ້ຍົກເລີກໃບອະນຸຍາດຂອງພວກເຂົາໃນການສົ່ງອອກຊິບທີ່ໃຊ້ໃນແລັບທັອບ ແລະ ສະມາດໂຟນໃຫ້ກັບ Huawei, ເຊິ່ງນີ້ສົ່ງຜົນກະທົບຕໍ່ຕ່ອງໂສ້ການສະໜອງຂອງບໍລິສັດຈີນຢ່າງໃຫຍ່ຫຼວງ.
ການຕັດສິນໃຈດັ່ງກ່າວມີຂຶ້ນທ່າມກາງຄວາມເຄັ່ງຕຶງລະຫວ່າງສະຫະລັດກັບຈີນເພີ່ມຂຶ້ນ, ໂດຍສະເພາະໃນດ້ານເຕັກໂນໂລຊີທີ່ສະຫະລັດມີຄວາມກັງວົນວ່າ ເຕັກໂນໂລຊີທີ່ຂາຍໃຫ້ Huawei ອາດຈະຖືກນໍາໃຊ້ເພື່ອຈຸດປະສົງທາງທະຫານຂອງລັດຖະບານສະຫະລັດ. ທັງນີ້, ພາຍໃຕ້ປະທານາທິບໍດີ Biden ຕ້ອງປະເຊີນກັບຄວາມກົດດັນຈາກສະມາຊິກສະພາຜູ້ແທນສາທາລະນະລັດ ໃຫ້ດຳເນີນການຢ່າງເຂັ້ມງວດໃນການຈຳກັດການສົ່ງອອກໃຫ້ຜູ້ຜະລິດອຸປະກອນໂທລະຄົມໃຫ້ແກ່ປະເທດຈີນ.
“ພວກເຮົາກໍາລັງຍົກເລີກໃບອະນຸຍາດບາງສ່ວນສໍາລັບການສົ່ງອອກໄປຫາ Huawei” ສະຫະລັດກ່າວໃນຖະແຫຼງການ ແຕ່ປະຕິເສດທີ່ຈະເປີດເຜີຍລາຍລະອຽດເພີ່ມເຕີມກ່ຽວກັບໃບອະນຸຍາດທີ່ຖືກຍົກເລີກ.
ການເຄື່ອນໄຫວນີ້ຄາດວ່າຈະສົ່ງຜົນກະທົບຕໍ່ທັງສອງຝ່າຍຄື:
- Huawei: ບໍລິສັດຈີນຍັງຄົງເພິ່ງພາຊິບຈາກ Intel ສໍາລັບແລັບທັອບຮຸ່ນ flagship , ການສູນເສຍແຫຼ່ງຊິບທີ່ສໍາຄັນສາມາດສົ່ງຜົນກະທົບຕໍ່ຄວາມສາມາດໃນການຜະລິດ ແລະ ການແຂ່ງຂັນຂອງພວກເຮົາ. ໃນຂະນະດຽວກັນ, Huawei ກໍກໍາລັງພັດທະນາຊິບຂອງຕົນເອງ. ແຕ່ພວກເຂົາຍັງປະເຊີນກັບຂໍ້ຈໍາກັດດ້ານເຕັກໂນໂລຊີ ແລະ ການຂາດແຄນຊິ້ນສ່ວນ.
- ບໍລິສັດໃນສະຫະລັດ: Intel ກໍາລັງປະເຊີນກັບຄວາມຕ້ອງການທີ່ຫຼຸດລົງສໍາລັບຊິບສູນຂໍ້ມູນ ແລະ PCs ທີ່ຫຼຸດລົງ. ການສູນເສຍ Huawei ທີ່ເປັນລູກຄ້າລາຍໃຫຍ່ ຈະມີຜົນກະທົບຕໍ່ລາຍໄດ້.
ອະນາຄົດຂອງຄວາມສຳພັນລະຫວ່າງສະຫະລັດ ແລະ ຈີນໃນດ້ານເຕັກໂນໂລຊີ ຍັງຄົງບໍ່ເປັນທີ່ຊັດເຈນເທື່ອ. ການຕັດສິນໃຈໃນຄັ້ງນີ້ອາດຈະສ້າງຄວາມເຄັ່ງຕຶງເພິ່ມຂຶ້ນຕື່ມ. ລັດຖະບານ 2 ປະເທດຕ້ອງຊອກຫາວິທີແກ້ໄຂຮ່ວມກັນເພື່ອຫຼີກເວັ້ນຜົນກະທົບທາງລົບຕໍ່ລະບົບຕ່ອງໂສ້ການສະໜອງເຕັກໂນໂລຊີໃນທົ່ວໂລກ.
ການຕັດສິນໃຈດັ່ງກ່າວສະແດງໃຫ້ເຫັນຄວາມຊັບຊ້ອນຂອງການພົວພັນລະຫວ່າງສະຫະລັດ ແລະ ຈີນ, ຕ່າງຝ່າຍຕ່າງມີການເດີມພັນທີ່ສູງ ທັງໃນດ້ານຄວາມໝັ້ນຄົງແຫ່ງຊາດ, ເສດຖະກິດ ແລະ ເຕັກໂນໂລຊີ. ສາຍຕາຈາກທົ່ວໂລກກຳລັງຕິດຕາມເບິ່ງວ່າ ຜົນກະທົບໃນໄລຍະຍາວຂອງການຕັດສິນໃຈໃນຄັງນີ້ຈະໄປໃນທິດທາງໃດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
