ລາຄາຄໍາໄດ້ເພີ່ມຂຶ້ນສູງກວ່າ $2,000 ຕໍ່ອອນ ຫຼື ປະມານ 1,8 ບາດ ອີກເທື່ອໜຶ່ງ ທ່າມກາງຄວາມກັງວົນກ່ຽວກັບຄວາມຂັດແຍ້ງຢູ່ໃນຕາເວັນອອກກາງ ຮາມາສ- ອິດສະຣາເອວ ເຮັດໃຫ້ຄວາມຕ້ອງການໃນຊັບສິນທີ່ປອດໄພເຊັ່ນ: ຄໍາ ນັ້ນເພີ່ມຂຶ້ນ.
ນັບຕັ້ງແຕ່ກຸ່ມຮາມາສໂຈມຕີອິດສະຣາແອນໃນວັນທີ 7 ຕຸລາ, ລາຄາຄຳໄດ້ເພີ່ມຂຶ້ນປະມານ 9%, ໂດຍຫຼ້າສຸດຂຶ້ນມາຢູ່ທີ່ 2.006,35 ໂດລາຕໍ່ອອນ ເຊິ່ງເປັນສະຖິຕິສູງສຸດໃນຫຼາຍເດືອນ ແລະ ເຂົ້າໃກ້ກັບລະດັບສູງສຸດຕະຫຼອດການທີ່ 2.075.47 ໂດລາຕໍ່ອອນໃນປີ 2020.
ທ່ານ Bart Melek, ຜູ້ອໍານວຍການ ແລະ ຫົວຫນ້າຍຸດທະສາດລາຄາສິນຄ້າຂອງທະນາຄານ TD ກ່າວວ່າ: “ການເລີ່ມຕົ້ນການເຄື່ອນໄຫວທາງພາກພື້ນຂອງອິດສະຣາເອວຢູ່ເຂດ Gaza ເຮັດໃຫ້ເກີດຄວາມສ່ຽງທີ່ຄວາມຂັດແຍ້ງຈະຂະຫຍາຍສູງຂຶ້ນ. ນີ້ເຮັດໃຫ້ຄວາມຕ້ອງການຄໍາເພີ່ມຂຶ້ນ, ເຊິ່ງຖືວ່າເປັນຊັບສິນທີ່ປອດໄພ”
ຜູ້ຊ່ຽວຊານກ່າວວ່າ ການຂຶ້ນລາຄາຄຳຮອບນີ້ບໍ່ແມ່ນສະຖານະການທີ່ປົກກະຕິ ເນື່ອງຈາກວ່າລາຄາຄໍາໂດຍທົ່ວໄປແລ້ວຈະເຄື່ອນໄຫວ ສວນທາງກັບຜົນຕອບແທນຂອງພັນທະບັດ. ແຕ່ໃນເດືອນນີ້ ຜົນຕອບແທນພັນທະບັດຂອງສະຫະລັດ ໄລຍະ 10 ປີແມ່ນຢູ່ໃນລະດັບທີ່ສູງທີ່ສຸດໃນຮອບ 16 ປີ, ແຕ່ລາຄາຄໍາຍັງສືບຕໍ່ເພີ່ມຂຶ້ນ.
ສະຖານະການນີ້ສະທ້ອນໃຫ້ເຫັນວ່ານັກລົງທຶນກໍາລັງໃຫ້ນໍ້າໜັກຄວາມສ່ຽງທີ່ສະຖານະການຂັດແຍ້ງລະຫວ່າງອິດສະຣາເອວ ແລະ ຮາມາສ ຈະເພີ່ມຂຶ້ນ ແລະ ສົ່ງຜົນກະທົບຕໍ່ການສະໜອງນ້ໍາມັນຂອງໂລກ. ເຊິ່ງໃນກໍລະນີທີ່ລາຄານ້ໍາມັນເພີ່ມຂຶ້ນ, ມັນຈະນໍາໄປສູ່ການເລັ່ງຂອງອັດຕາເງິນເຟີ້ ທີ່ຈະກົດດັນຕໍ່ທະນາຄານກາງທົ່ວໂລກຕ້ອງດູແລເສດຖະກິດ ໂດຍຜ່ານນະໂຍບາຍການເງິນ.
ສ່ວນລາຄາຄຳໃນ ສປປ ລາວ ອີງຕາມ ແອັບ Easy Gold ໃນວັນທີ 27 ຕຸລາ ຄຳຮູບປະພັນແມ່ນຕົກຢູ່ທີ່ 23.329.000 ກີບຕໍ່ 1 ບາດ ແລະ ຄຳແທ່ງ ແມ່ນມີລາຄາຢູ່ທີ່ 23.270.000 ກີບ ຕໍ່ 1 ບາດ.
https://www.facebook.com/photo.php?fbid=1083547072925974&set=pb.100038120746471.-2207520000&type=3
ຕິດຕາມຂ່າວທັງໝົດຈາກ LaoX: https://laox.la/all-posts/