ໃນວັນອັງຄານທີ່ຜ່ານມາ, ຈີນໄດ້ປະກາດອອກພັນທະບັດລັດຖະບານມູນຄ່າ 1 ພັນຕື້ຢວນ (137 ຕື້ໂດລາ) ໃນໄຕມາດທີ 4 ຂອງປີນີ້, ເພື່ອສະໜັບສະໜູນເສດຖະກິດທີ່ຊົບເຊົາຈາກການລະບາດຂອງ Covid-19 , ພັນທະບັດດັ່ງກ່າວຈະຖືກແຈກຢາຍໃຫ້ລັດຖະບານທ້ອງຖິ່ນເພື່ອປ້ອງກັນ ແລະ ສ້ອມແປງພື້ນທີ່ທີ່ໄດ້ຮັບໄພພິບັດຈາກນ້ຳຖ້ວມຄັ້ງໃຫຍ່ ແລະ ປັບປຸງໂຄງສ້າງພື້ນຖານຂອງປະເທດ. ໂດຍເສດຖະກິດໃນຈີນໄດ້ມີການຂະຫຍາຍຕົວທີ່ດີໃນໄຕມາດທີ 3 ແຕ່ກໍຍັງຕໍ່າກວ່າເປົ້າໝາຍທີ່ວາງໄວຢູ່ , ດ້ວຍເຫດນີ້ຈຶ່ງນຳໄປສູ່ການຮຽກຮ້ອງໃຫ້ມີມາດຕະການຊຸກຍູ້ເສດຖະກິດເພີ່ມຂຶ້ນຕື່ມອີກ. ການເຄື່ອນໄຫວດັ່ງກ່າວແມ່ນບາດກ້າວທີ່ສຳຄັນໃນການກະຕຸ້ນການເຕີບໂຕດ້ານເສດຖະກິດ ແລະ ຊ່ວຍຮັກສາປະລິມານແຮງຊຸກຍູ້ໃນການຟື້ນຕົວຫຼັງຈາກໄຕມາດທີ 4.
ການອອກພັນທະບັດເພີ່ມເຕີມຂອງຈີນຈະເພີ່ມການຂາດດຸນງົບປະມານໃນປີ 2023 ຈາກ 3% ຂຶ້ນເປັນ 3,8%, ເຊິ່ງເປັນເລື່ອງທີ່ບໍ່ຄ່ອຍໄດ້ເຫັນຫຼາຍເທົ່າໃດ ທີ່ຈີນຍອມໃຫ້ມີການຂາດດຸນດັ່ງກ່າວເພີ່ມຂຶ້ນ. ສໍາລັບເງິນທີ່ໄດ້ຈາກການອອກພັນທະບັດຈະຖືກໂອນໃຫ້ລັດຖະບານທ້ອງຖິ່ນ ເພື່ອຊ່ວຍຫຼຸດຜ່ອນພາລະງົບປະມານຂອງລັດຖະບານທ້ອງຖິ່ນ.
ເຊິ່ງທີ່ປຶກສາດ້ານນະໂຍບາຍບາງຄົນຂອງລັດຖະບານຈີນໄດ້ກ່າວວ່າ: ລັດຖະບານກາງຍັງມີພື້ນທີ່ເຫຼືອໃນການໃຊ້ຈ່າຍຫຼາຍຂຶ້ນ. ເນື່ອງຈາກອັດຕາສ່ວນຂອງໜີ້ຕໍ່ GDP ຍັງຢູ່ໃນລະດັບທີ 21%, ເຊິ່ງຕ່ຳກວ່າລະດັບໜີ້ສິນຂອງລັດຖະບານທ້ອງຖິ່ນທີ່ໃນຕອນນີ້ຢູ່ທີ່ 76%. ທັງນີ້, ເງິນເຄິ່ງໜື່ງຈະຖືກນໍາໃຊ້ເຂົ້າເພື່ອປະກອບການໃນການຊ່ວຍເຫຼືອດ້ານຕ່າງໆໃນປີນີ້ ແລະ ອີກເຄິ່ງໜຶ່ງແມ່ນກຳນົດໃຊ້ໃນຕົ້ນປີ 2024.
Zhu Zhongming ລັດຖະມົນຕີກະຊວງການເງິນຂອງຈີນກ່າວວ່າ
“ການອອກພັນທະບັດຈະຊ່ວຍເພີ່ມຄວາມຕ້ອງການພາຍໃນປະເທດ ແລະ ເພີ່ມຄວາມເຂັ້ມແຂງຂອງການຟື້ນຕົວດ້ານເສດຖະກິດຢ່າງຕໍ່ເນື່ອງ. ໃນສ່ວນຂອງລະດັບໜີ້ສິນລັດຖະບານນັ້ນແມ່ນຍັງຄົງຢູ່ໃນລະດັບທີ່ເໝາະສົມ”
ອີງຕາມຂໍ້ມູນຂອງກະຊວງການຄັງຂອງຈີນໄດ້ເປີດເຜີຍວ່າ ໃນ 3 ໄຕມາດທຳອິດຂອງປີ 2023, ຈີນໄດ້ອອກພັນທະບັດລັດຖະບານໄປແລ້ວຫຼາຍກວ່າ 7.5 ພັນຕື້ຢວນ ເຊິ່ງຖືວ່າເປັນເງິນຈຳນວນຫຼາຍເມື່ອທຽບໃສ່ໄລຍະດຽວກັນຂອງປີ 2020, ເຊິ່ງໄດ້ມີການອອກພັນທະບັດພິເສດພຽງ 1 ພັນຕື້ຢວນເພື່ອຮັບມືກັບວິກິດການທີ່ເກີດຈາກ Covid-19 , ໃນຂະນະທີ່ໃນປີ 2022 ການອອກພັນທະບັດໄດ້ມີການຫຼຸດລົງເຫຼືອພຽງ 750 ຕື້ຢວນ.
ເສດຖະກິດຂອງຈີນໃນໄຕມາດທີ 3 ໄດ້ມີການເຕີບໂຕ 4,9%, ເຊິ່ງສູງກວ່າທີ່ຄາດການໄວ້ເນື່ອງຈາກໄດ້ຮັບແຮງໜຸນຈາກຫຼາຍປັດໄຈ, ລວມທັງຂະແໜງການບໍລິໂພກ ແລະ ອຸດສາຫະກໍາ. ນີ້ເຮັດໃຫ້ຄວາມເປັນໄປໄດ້ທີ່ລັດຖະບານຈີນຈະສາມາດບັນລຸເປົ້າໝາຍ GDP ຂອງຕົນທີ່ປະມານ 5% ໃນປີ 2023.
ບັນດານັກສັງເກດການຊີ້ໃຫ້ເຫັນວ່າ ຄວາມອ່ອນແອໃນການຟື້ນຕົວທາງດ້ານເສດຖະກິດຂອງຈີນຫຼັງຈາກການລະບາດຂອງ COVID-19 ນັ້ນໄດ້ເຮັດໃຫ້ຄວາມໃຝ່ຝັນທີ່ຢາກຈະປະຕິຮູບໂຄງສ້າງເສດກິດໃນແນວທາງການບໍລິໂພກຕ້ອງຖືກຈຳກັດ. ເນື່ອງຈາກຕ້ອງໄດ້ຫັນມາເອົາໃຈໃສ່ເຖິງຄວາມຮີບດ່ວນໃນທັນທີຂອງການຮັກສາການຟື້ນຟູຫຼັງຈາກການລະບາດຂອງ COVID-19 ຢ່າງຕໍ່ເນື່ອງ, ເຮັດໃຫ້ໃນໄລຍະ 2 – 3 ເດືອນທີ່ຜ່ານມາໄດ້ມີການໂຕ້ວາທີຢ່າງດຸເດືອດໃນກຸ່ມທີ່ປຶກສາດ້ານນະໂຍບາຍຂອງລັດຖະບານ. ໂດຍໃນບາງສ່ວນກໍໄດ້ມີການສະໜັບສະໜູນການປະຕິຮູບຢ່າງຮີບດ່ວນ ເພື່ອສ້າງເຄື່ອງຈັກໃໝ່ສໍາລັບເສດຖະກິດທີ່ຫຼາຍກວ່າການລົງທຶນດ້ານອະສັງຫາລິມະສັບ ແລະ ໂຄງສ້າງ.
ຄວາມຕ້ອງການໃນໄລຍະສັ້ນເພື່ອຟື້ນຟູເສດຖະກິດເບິ່ງຄືວ່າຈະມີຄວາມສຳຄັນຫຼາຍກວ່າການປະຕິຮູບ. ດ້ວຍເຫດນີ້, ລັດຖະບານຈຶ່ງເລືອກເອົາມາດຕະການດ້ານການເງິນ ແລະ ການຄັງເປັນຫຼັກເພື່ອອັດສີດເສດຖະກິດແທນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
