ລັດຖະບານ ຕີລາຄາສ້າງຮາກຖານການເມືອງ, ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງທົ່ວປະເທດ

ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງທົ່ວປະເທດ 2016-2021 ແລະ ທິດທາງຮອດປີ 2025 ຈັດຂື້ນຕອນເຊົ້າ ວັນທີ 14 ກັນຍາ 2022, ທີ່ຫ້ອງວ່າການສູນກາງພັກ ໂດຍເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ, ເລຂາທິການໃຫ່ຍຄະນະບໍລິຫານງານສູນກາງພັກ ປະທານປະເທດ ມີທ່ານ ບຸນທອງ ຈິດມະນີ, ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ພ້ອມດ້ວຍຄະນະຜູ້ແທນຈາກສູນກາງ ແລະທ້ອງຖິ່ນເຂົ້າຮ່ວມ.

ໃນໂອກາດກ່າວໄຂກອງປະຊຸມຢ່າງເປັນທາງການ ທ່ານ ບຸນທອງ ຈິດມະນີ ຍົກໃຫ້ເຫັນວ່າ: ພັກຍາມໃດກໍຖືຮາກຖານເປັນກຳລັງແຮງ, ເປັນບ່ອນຕັດສິນທຸກໄຊຊະນະ ຫຼືຄວາມລົ້ມເຫຼວຂອງທຸກການຈັດຕັ້ງປະຕິບັດວຽກງານປົກປັກຮັກສາ ແລະສ້າງສາພັດທະນາປະເທດຊາດ, ຍ້ອນແນວນັ້ນວຽກງານກໍ່ສ້າງຮາກຖານ ແລະປັບປຸງຮາກຖານການເມືອງ ຈຶ່ງແມ່ນວຽກງານຍຸດທະສາດທີ່ບໍ່ປ່ຽນແປງ ທັງສະເພາະໜ້າ ແລະຍາວນານຂອງພັກເຮົາ, ໃນເງື່ອນໄຂໃໝ່ຂອງການປະຕິວັດ ພັກ-ລັດຍິ່ງຕ້ອງໄດ້ເອົາໃຈໃສ່ການກໍ່ສ້າງຮາກຖານການເມືອງ ຕິດພັນໂດຍກົງກັບການພັດທະນາ ໂດຍສະເພາະການພັດທະນາຊົນນະບົດຮອບດ້ານ ແລະແກ້ໄຂຄວາມທຸກຍາກຂອງປະຊາຊົນ ຕິດພັນກັບການຈັດຕັ້ງປະຕິບັດວຽກງານ 3 ສ້າງ ຕາມ 4 ເນື້ອໃນ 4 ຄາດໝາຍ ແນໃສ່ເຮັດໃຫ້ລະບົບການເມືອງຢູ່ຮາກຖານມີຄວາມເຂັ້ມແຂງ, ເປັນເຈົ້າການນໍາພາແກ້ໄຂຄວາມທຸກຍາກ,ຄວາມຫຼ້າຫຼັງຄວາມບໍ່ສະເໝີພາບ ແລະຄວາມບໍ່ຍຸຕິທໍາໃນສັງຄົມ ເພື່ອເປັນປັດໄຈພື້ນຖານທີ່ຮັບປະກັນສະຖຽນລະພາບທາງດ້ານການເມືອງ ແລະຄວາມສະຫງົບເປັນລະບຽບຮຽບຮ້ອຍໃນສັງຄົມ ກໍຄືຄວາມໝັ້ນຄົງຂອງລະບອບປະຊາທິປະໄຕປະຊາຊົນຕາມທິດສັງຄົມນິຍົມ, ສະນັ້ນກອງປະຊຸມຄັ້ງນີ້ຈຶ່ງມີຄວາມໝາຍສໍາຄັນຫຼາຍ ໂດຍສະເພາະການຕີລາຄາຄືນບັນດາໝາກຜົນວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງ ໃນໄລຍະຜ່ານມາ ເພື່ອຍົກໃຫ້ເຫັນດ້ານອ່ອນ ແລະຂໍ້ຄົງຄ້າງທີ່ຕ້ອງສືບຕໍ່ປັບປຸງແກ້ໄຂໃຫ້ດີຂື້ນໃນຕໍ່ໜ້າ ແນໃສ່ຍົກສູງຄຸນະພາບການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃນໄລຍະໃໝ່ໃຫ້ມີຄວາມເຂັ້ມແຂງ ແລະ ໜັກແໜ້ນ, ເພີ່ມທະວີບົດບາດການນໍາຮອບດ້ານຂອງຄະນະພັກ ຕິດພັນກັບການເສີມຂະຫຍາຍຄວາມເປັນເຈົ້າການ ແລະ ຍົກສູງຄວາມຮັບຜິດຊອບໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົົມຢູ່ທ້ອງຖິ່ນຮາກຖານໃຫ້ສູງຂຶ້ນ.

ກອງປະຊຸມຄັ້ງນີ້ຜູ້ເຂົ້າຮ່ວມຍັງໄດ້ຮັບຟັງຜົນສໍາເລັດການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະວຽກງານ 3 ສ້າງ ຂອງບັນດາຂະແໜງການຢູ່ຂັ້ນສູນກາງ, ແຂວງ ແລະທ້ອງຖິ່ນ ພາຍໃຕ້ຫົວຂໍ້ຕ່າງໆ ເປັນຕົ້ນຂົງເຂດວຽກງານປ້ອງກັນປະເທດ, ຂົງເຂດປ້ອງກັນຄວາມສະຫງົບ, ການປຸກລະດົມທົ່ວສັງຄົມປະກອບສ່ວນເຂົ້າໃນການແກ້ໄຂຄວາມທຸກຍາກຕິດພັນກັບການພັດທະນາ, ການຈັດສັນພູມລໍາເນົາ ແລະ ອື່ນໆ.

ຂໍ້ມູນຈາກ: https://cutt.ly/HCMM5zH

ຕິດຕາມຂ່າວທັງໝົດຈາກ LaoX: https://laox.la/all-posts/