ນັບແຕ່ປີ 2016 ເປັນຕົ້ນມາ, ຈີນມີແນວໂນ້ມເພີ່ມຂຶ້ນການນຳເຂົ້າໝາກໄມ້ຈາກຕ່າງປະເທດ ເນື່ອງຈາກຄວາມຕ້ອງການໝາກໄມ້ເຂດຮ້ອນໃນປະເທດເພີ່ມຂຶ້ນ. ອີງຕາມຂໍ້ມູນຫຼ້າສຸດຂອງປີ 2023 , ການນຳເຂົ້າໝາກໄມ້ຂອງຈີນມີມູນຄ່າຫຼາຍກວ່າ 16,85 ຕື້ໂດລາສະຫະລັດ, ເຊິ່ງເພີ່ມຂຶ້ນ 15% ຈາກປີ 2022. ສຳລັບໝາກໄມ້ທີ່ຈີນນຳເຂົ້າເປັນສ່ວນໃຫຍ່ແມ່ນໝາກຖົ່ວລຽນສົດ (40%), ໝາກເຜັດ (16%), ໝາກຖົ່ວລຽນແຊ່ແຂງ (6%) , ໝາກກ້ວຍ (6%) ໝາກມັງຄຸດ (4%) ແລະ ໝາກພ້າວ (4%).
ໂດຍແຫຼ່ງນຳເຂົ້າໝາກໄມ້ສ່ວນໃຫຍ່ແມ່ນຈະເປັນປະເທດໃນອາຊຽນໄດ້ແກ່: ໄທ, ຫວຽດນາມ, ຟິລິບປິນ, ມາເລເຊຍ ແລະ ອິນໂດເນເຊຍ. ເຊິ່ງປະເທດເຫຼົ່ານີ້ມີບົດບາດສຳຄັນໃນການຄ້າໝາກໄມ້ອາຊຽນຢູ່ໃນຕະຫຼາດຈີນ. ໃນປີທີ່ຜ່ານມາ, ປະເທດອາຊຽນໄດ້ມີການແຂ່ງຂັນກັນເພີ່ມຂຶ້ນ ເພື່ອຍາດເອົາສ່ວນແບ່ງໃນຕະຫຼາດ ຍົກຕົວຢ່າງ ໝາກຖົ່ວລຽນສົດທີ່ຈີນໄດ້ຮັບອະນຸຍາດນໍາເຂົ້າຈາກໄທ, ຫວຽດນາມ ແລະ ຟິລິບປິນ. ເຊິ່ງໃນອະນາຄົດ, ການແຂ່ງຂັນສໍາລັບສ່ວນແບ່ງຕະຫຼາດຈະເພີ່ມຂຶ້ນຫຼາຍກວ່າເກົ່າ ຖ້າຫາກມາເລເຊຍສາມາດໄດ້ຮັບການອະນຸຍາດໃນການສົ່ງອອກໝາກຖົ່ວລຽນສົດໄດ້ໃນປີນີ້.
ຕະຫຼາດໝາກໄມ້ຂອງຈີນມີຂະໜາດໃຫຍ່ ແລະ ມີການຂະຫຍາຍຕົວຢ່າງຕໍ່ເນື່ອງ, ໃນປີ 2023, ມູນຄ່າການຄ້າໝາກໄມ້ທັງໝົດຂອງຈີນບັນລຸ 1,330 ຕື້ຢວນ, ກວມເອົາ 20% ຂອງມູນຄ່າການຄ້າໝາກໄມ້ຂອງໂລກ.
ທິດທາງໃນການເຕີບໂຕຂອງຕະຫຼາດໝາກໄມ້ຈີນ
ຕະຫຼາດໝາກໄມ້ຈີນມີແນວໂນ້ມໃນການເຕີບໂຕທີ່ສົດໃສ ແລະ ຄາດວ່າມູນຄ່າຕະຫຼາດຈະບັນລຸ 1,800 ຕື້ຢວນ ໃນປີ 2027. ປັດໄຈທີ່ສະໜັບສະໜູນການເຕີບໂຕໄດ້ແກ່:
- ການຂະຫຍາຍຕົວຂອງຊົນຊັ້ນກາງ: ຊົນຊັ້ນກາງຂອງຈີນມີຂະໜາດໃຫຍ່ ແລະ ມີລາຍໄດ້ສູງຂຶ້ນ. ສົ່ງຜົນໃຫ້ມີຄວາມຕ້ອງການຜະລິດຕະພັນທີ່ມີຄຸນະພາບສູງ.
- ການປ່ຽນແປງພຶດຕິກຳຂອງຜູ້ບໍລິໂພກ: ຜູ້ບໍລິໂພກຈີນມີຄວາມໃສ່ໃຈໃນການຮັກສາສຸຂະພາບຫຼາຍຂຶ້ນ. ເລືອກຊື້ໝາກໄມ້ສົດ, ປອດໄພ ແລະ ມີສານອາຫານ.
- ການພັດທະນາພື້ນຖານໂຄງສ້າງ: ການພັດທະນາໂຄງສ້າງພື້ນຖານດ້ານການຂົນສົ່ງ ຊ່ວຍໃຫ້ການຂົນສົ່ງໝາກໄມ້ສະດວກ ແລະ ໄວ.
ໂອກາດສຳລັບອາຊຽນ
ຈີນແມ່ນຕະຫຼາດໝາກໄມ້ທີ່ມີທ່າແຮງສູງຂອງອາຊຽນ. ອາຊຽນມີສະພາບອາກາດທີ່ເໝາະສົມກັບການປູກໝາກໄມ້ເຂດຮ້ອນຕ່າງໆເຊັ່ນ: ໝາກຖົ່ວລຽນ, ໝາກມັງຄຸດ, ໝາກມ່ວງ, ໝາກນັດ, ໝາກກ້ວຍ ແລະ ອື່ນໆ ເຊິ່ງເປັນທີ່ຕ້ອງການຂອງຜູ້ບໍລິໂພກຂອງຈີນ.
ສິ່ງທ້າທາຍທີ່ຕ້ອງປະເຊີນ
ແນວໃດກໍດີ, ອາຊຽນຈະຕ້ອງປະເຊີນໜ້າກັບສິ່ງທ້າທາຍຫຼາຍຢ່າງໃນການສົ່ງອອກໝາກໄມ້ໄປຈີນ ເຊິ່ງໄດ້ແກ່:
- ຂໍ້ກໍານົດດ້ານກົດລະບຽບ: ຈີນມີລະບຽບທີ່ເຄັ່ງຄັດກ່ຽວກັບຄວາມປອດໄພຂອງອາຫານ ແລະ ການກັກກັນໂຣກໃນພືດ-ສັດ. ຜູ້ຜະລິດ ແລະ ຜູ້ສົ່ງອອກໃນອາຊຽນຕ້ອງປະຕິບັດຕາມຢ່າງເຂັ້ມງວດ.
- ການແຂ່ງຂັນ: ອາຊຽນປະເຊີນກັບການແຂ່ງຂັນຈາກປະເທດສົ່ງອອກໝາກໄມ້ອື່ນໆ ເຊັ່ນ: ຊີລີ, ອອສເຕຣເລຍ ແລະ ນິວຊີແລນ.
- ພື້ນຖານໂຄງສ້າງ: ພື້ນຖານໂຄງສ້າງດ້ານການຂົນສົ່ງໃນບາງປະເທດອາຊຽນຍັງບໍ່ທັນພັດທະນາ ສົ່ງຜົນກະທົບຕໍ່ປະສິດທິພາບໃນການຂົນສົ່ງ
ແນວທາງໃນການພັດທະນາເພື່ອສົ່ງເສີມໝາກໄມ້ໄປຈີນ
- ພັດທະນາຄຸນະພາບ ແລະ ມາດຕະຖານການຜະລິດ: ສຸມໃສ່ການຜະລິດໝາກໄມ້ໃຫ້ມີຄຸນະພາບ, ປອດໄພ, ໄດ້ມາດຕະຖານສາກົນ.
- ພັດທະນາພື້ນຖານໂຄງສ້າງ: ພັດທະນາລະບົບການຂົນສົ່ງໃຫ້ມີປະສິດທິພາບ, ສະດວກ ແລະ ວ່ອງໄວ.
- ສ້າງແບຣນໃຫ້ກັບຜະລິດຕະພັນ: ພັດທະນາແບຣນໃຫ້ກັບຜະລິດຕະພັນໝາກໄມ້ອາຊຽນເພື່ອໃຫ້ກາຍເປັນທີ່ຮູ້ຈັກດີໃນຕະຫຼາດຈີນ.
- ສົ່ງເສີມການຮ່ວມມື: ການຮ່ວມມືກັບຈີນພັດທະນາຕະຫຼາດໝາກໄມ້. ຮ່ວມກັນລົງທຶນໃນພື້ນຖານໂຄງສ້າງ ແລະ ການແລກປ່ຽນຂໍ້ມູນຂ່າວສານເຊັ່ນ:
ສູນການຄ້າໝາກໄມ້ຈີນ – ອາຊຽນ: ຕັ້ງຢູ່ເຂດກວາງຊີ. ເປັນສູນການຄ້າການນຳເຂົ້າ ແລະ ສົ່ງອອກໝາກໄມ້ຜ່ານທາງບົກແບບຄົບວົງຈອນ.
ດ່ານຫຼົງປັງ (ຈີນ) ແລະ ດ່ານຈ່າຫຼິນ (ຫວຽດນາມ): ຍົກລະດັບສາກົນ. ຮອງຮັບການນຳໃຊ້ລົດທີ່ບໍ່ມີຄົນຂັບ ແລະ ການຂົນສົ່ງສິນຄ້າຕະຫຼອດ 24 ຊົ່ວໂມງ.
ສະຫຼຸບ, ຕະຫຼາດໝາກໄມ້ຈີນມີໂອກາດທີ່ຈະເຕີບໂຕສູງ ແລະ ອາຊຽນມີທ່າແຮງໃນການສົ່ງອອກໝາກໄມ້ໄປຈີນ. ແຕ່ຍັງຕ້ອງປະເຊີນກັບສິ່ງທ້າທາຍຫຼາຍຢ່າງ ຈຶ່ງຕ້ອງພັດທະນາຄຸນນະພາບ, ມາດຕະຖານ ແລະ ພື້ນຖານໂຄງສ້າງ. ຊຸກຍູ້ການຮ່ວມມືກັບຈີນ ຊຸກຍູ້ການຄ້າໝາກໄມ້ລະຫວ່າງກັນແລະກັນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/