ເມື່ອບໍ່ດົນມານີ້ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ສຳພາດທົບທວນຄືນ ແລະ ຕີລາຄາຕໍ່ຄວາມສຳພັນ ລາວ-ຈີນ ຕໍ່ສື່ມວນຊົນ ຈາກຈີນ CGTN ພ້ອມຢືນຢັນວ່າ ຄຳເວົ້າທີ່ວ່າ “ສປປ ລາວ ຈະຕິດກັບດັກໜີ້ສິນ ຈາກໂຄງການທາງລົດໄຟລາວ-ຈີນ” ນັ້ນ ບໍ່ເປັນຄວາມຈິງ.
ໂດຍໃນການໃຫ້ສຳພາດ ທ່ານນາຍົກລັດຖະມົນຕີ ໄດ້ຮຽກຮ້ອງໃຫ້ແລກປ່ຽນຄວາມເຂົ້າໃຈໃນອະນາຄົດກ່ຽວກັບການພັດທະນາຂອງທັງສອງປະເທດ, ພ້ອມກັບສະພາບໜີ້ສິນພາຍນອກຂອງລາວກັບຈີນ.
ທ່ານ ສອນໄຊ ກ່າວວ່າ: “ລາວ ແລະ ຈີນໄດ້ຮັກສາການພົວພັນຮ່ວມມືທີ່ເປັນມູນເຊື້ອອັນສະໜິດສະໜົມ. ປີ 2017, ສອງປະເທດໄດ້ເຫັນດີຮ່ວມກັນສ້າງປະຊາຄົມທີ່ມີຍຸດທະສາດເພື່ອອະນາຄົດຮ່ວມກັນຂອງຈີນ ແລະ ລາວ”
“ໂດຍສະເພາະແມ່ນທາງລົດໄຟລາວ-ຈີນໄດ້ສ້າງຄວາມສຸກໃຫ້ແກ່ປະຊາຊົນລາວ,ພ້ອມທັງເປັນໂຄງການຮ່ວມມືລັກສະນະຂີດໝາຍທີ່ຈີນ ກັບ ປະເທດອາຊຽນເພີ່ມທະວີການເຊື່ອມຈອດກັນພາຍໃຕ້ຂອບຂໍ້ລິເລິ່ມ ໜຶ່ງແລວໜຶ່ງເສັ້ນທາງ. ໃນອະນາຄົດ ຈະມີຄົນຫຼາຍກວ່າເກົ່າໄປທ່ຽວຢູ່ລາວໂດຍຜ່ານທາງລົດໄຟລາວ-ຈີນ, ນີ້ຈະເພີ່ມທະວີການແລກປ່ຽນດ້ານວັດທະນະທຳ ແລະ ການຮ່ວມມືດ້ານເສດຖະກິດການຄ້າລະຫວ່າງຈີນ ກັບ ປະເທດອາຊຽນຕື່ມອີກ”
ນອກຈາກນີ້ ທ່ານ ນາຍົກລັດຖະມົນຕີ ຍັງໄດ້ຊີ້ແຈງເຖິງ ສະພາບການໜີ້ສິນ ທີ່ລາວຕິດໜີ້ຈີນ ໂດຍຮຽກຮ້ອງໃຫ້ ສື່ມວນຊົນ ບໍ່ໃຫ້ບິດເບືອນ ສະຖານະການ ທີ່ບໍ່ຖືກຕ້ອງ.
ໂດຍທ່ານ ນາຍົກກ່າວວ່າ “ໃນຂະນະທີ່ ບາງປະເທດ ແລະ ສື່ມວນຊົນ ອ້າງວ່າ ລາວຕົກຢູ່ໃນ ກັບດັກໜີ້ສິນຈາກຈີນ ແຕ່ກໍຄວນສັງເກດວ່າ ລາວບໍ່ໄດ້ຖືໜີ້ຈາກປະເທດຈີນເທົ່ານັ້ນແຕ່ຍັງມາຈາກສະຖາບັນການເງິນສາກົນອື່ນໆ ເຊິ່ງໜີ້ສິນເຫຼົ່ານີ້ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ ແລະ ສັງຄົມຂອງລາວ, ເຊິ່ງນັ້ນເປັນເຫດຜົນທີ່ພວກເຮົາໄດ້ກູ້ຢືມເຂົາເຈົ້າ.”
ອີງຕາມຂໍ້ມູນຂອງ CEIC, ໜີ້ສິນຕ່າງປະເທດຂອງ ສປປ ລາວ ເພີ່ມຂຶ້ນຈາກ 2,9 ຕື້ໂດລາສະຫະລັດ ໃນປີ 2011 ເປັນ 10,2 ຕື້ໂດລາສະຫະລັດ ໃນປີ 2022, ເຊິ່ງໃນນັ້ນ ໂຄງການທາງລົດໄຟ ລາວ-ຈີນ ກວມເອົາມູນຄ່າເຖິງ 6 ຕື້ໂດລາສະຫະລັດ.
ນອກຈາກນີ້ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ກໍເຄີຍຊີ້ແຈງປະເດັນດັ່ງກ່າວ ກັບ ສຳນັກຂ່າວ Nikkei ວ່າ: “ປະເທດລາວມີໜີ້ສິນຕ່າງປະເທດຫຼາຍ ໂດຍສະເພາະກັບຈີນ, ແຕ່ຈຳນວນເງິນດັ່ງກ່າວຍັງຢູ່ໃນລະດັບທີ່ ປະເທດລາວສາມາດຄຸ້ມຄອງໄດ້ ແລະ ຍັງບໍ່ຫຼາຍເທົ່າທີ່ປະເທດອື່ນກຳລັງປະສົບຢູ່”
ແຕ່ຢ່າງໃດກໍຕາມ ຄຳເຫັນດັ່ງກ່າວ ກໍເບິ່ງຄືຈະສວນທາງກັນກັບ ບົດລາຍງານຂອງ World Bank ແລະ IMF ທີ່ຊີ້ໃຫ້ເຫັນວ່າ ສປປ ລາວ ມີຄວາມສ່ຽງສູງທີ່ຈະເກີດບັນຫາໜີ້ສິນ.
https://news.cgtn.com/news/2023-09-17/VHJhbnNjcmlwdDc0Njc2/index.html
ຕິດຕາມຂ່າວທັງໝົດຈາກ LaoX: https://laox.la/all-posts/