ຈີນ ປະເທດທີ່ມີເສດຖະກິດໃຫຍ່ອັນດັບສອງຂອງໂລກຮອງຈາກສະຫະລັດ ໄດ້ກ້າວເຂົ້າສູ່ພາວະເງິນຝືດຫຼັງຈາກລະດັບລາຄາສິນຄ້າ ແລະການບໍລິການໂດຍທົ່ວໄປ ທັງໃນຂະແໜງການບໍລິໂພກ ແລະ ດ້ານການຜະລິດຂອງພາກທຸລະກິດໄດ້ລົດລົງເທື່ອລະກ້າວ. ກາຍເປັນຄວາມກົດດັນຕໍ່ລັດຖະບານ ໃນຖານະເປັນຜູ້ກຳນົດນະໂຍບາຍເພີ່ມການສະໜັບສະໜູນດ້ານການເງິນ ເຖິງແມ່ນວ່າມີສັນຍານວ່າການລົດລົງຂອງລາຄານີ້ແມ່ນຊົ່ວຄາວ ແຕ່ອາດເຮັດໃຫ້ຈີນໃຊ້ມາດຕະການກະຕຸ້ນຢ່າງເຕັມທີ່ໄດ້.
ໂດຍສຳນັກງານສະຖິຕິແຫ່ງຊາດ ຈີນເປີດເຜີຍວ່າ ດັດຊະນີລາຄາຜູ້ບໍລິໂພກລົດລົງ 0,3% ໃນເດືອນ ກໍລະກົດທີ່ຜ່ານມາ ເຊິ່ງຖືເປັນການລົດລົງຄັ້ງທຳອິດນັບຕັ້ງແຕ່ເດືອນ ກຸມພາ ປີ 2022 ຂະນະທີ່ດັດຊະນີລາຄາຂອງຜູ້ຜະລິດປັບຕົວລົງຕິດຕໍ່ກັນເປັນເດືອນທີ 10 ໂດຍຫົດຕົວລົງ 4,4%.
ລາຍງານລະບຸວ່າ ຄວາມຕ້ອງການຂອງຜູ້ບໍລິໂພກໃນຈີນຊ້າລົງບວກກັບການລົດລົງຂອງອະສັງຫາລິມະຊັບ ລວມທັງການລົດລົງຢ່າງຫຼວງຫຼາຍຂອງການສົ່ງອອກ ເຊິ່ງມັນເປັນກຳລັງການຊຸກຍູ້ໃຫ້ບັນດາຜູ້ຜະລິດຈີນລົດລາຄາເພື່ອກຳຈັດສິນຄ້າທີ່ຍັງຄົງຄ້າງຢູ່.
ໂດຍບັນດານັກເສດຖະສາດເບິ່ງວ່າພາວະເງິນຟືດໃນຈີນເປັນສັນຍານເຕືອນກ່ຽວກັບການເຕີບໃຫຍ່ຂອງເສດຖະກິດ ຈີນ ເນື່ອງຈາກວ່າການສະໜອງຜະລິດຕະພັນຍັງເກີນຄວາມຕ້ອງການ. ແລະ ໃນຂະນະທີ່ຜູ້ກຳນົດນະໂຍບາຍ ໄດ້ໃຫ້ສົ່ງສັນຍານວ່າພວກເຂົາຈະບໍ່ກະຕຸ້ນເສດຖະກິດຫຼາຍເທົ່າກັບໄລຍະເສດຖະກິດຂາລົງ ຄືທີ່ຜ່ານໆມາ.
ທ່ານ Robin Xing ຫົວໜ້ານັກເສດຖະສາດຂອງຈີນ ຂອງບໍລິສັດ Morgan Stanley ກ່າວວ່າ “ຈີນກຳລັງປະເຊີນກັບສະພາວະເງິນຝືດຢ່າງແນ່ນອນ ແລະ ຜູ້ວາງນະໂຍບາຍຂອງຈີນ ຈຳເປັນຕ້ອງເລັ່ງການໃຊ້ຈ່າຍຂອງລັດຖະບານທັງໝົດ ເພີ່ມໜີ້ສິນພາກລັດ ແລະ ດຳເນີນການຜ່ອນຜັນດ້ານການເງິນ ເພື່ອທໍາລາຍກັບດັກເງິນຝືດນີ້”
ໂດຍມາດຕະການ ການກະຕຸ້ນເສດຖະກິດຂະໜາດໃຫຍ່ ແມ່ນເຫດຜົນທີ່ນັກເສດຖະສາດທົ່ວໂລກປັບລົດການຄາດການ ເຖິງການເຕີບໂຕຂອງ GDP ຈີນໃນປີນີ້ໃຫ້ໃກ້ຄຽງກັບເປົ້າໝາຍຢ່າງເປັນທາງການຂອງຈີນທີ່ປະມານ 5% ໂດຍບາງຄົນເຫັນວ່າເປົ້າໝາຍດັ່ງກ່າວມີຄວາມສ່ຽງ ເນື່ອງຈາກການສົ່ງອອກລົດລົງໄວກວ່າທີ່ຄາດການໄວ້ ແລະ ຕະຫຼາດທີ່ຢູ່ອາໄສທີ່ອ່ອນແອລົງ.
ຕິດຕາມຂ່າວທັງໝົດຈາກ LaoX: https://laox.la/all-posts/
