Donald Trump ອະດີດປະທານາທິບໍດີຂອງສະຫະລັດອາເມຣິກາ ບໍ່ຍອມຮັບຜິດຂໍໍ້ກ່າວຫາ ຫຼັງຈາກຖືກເຊີນຕົວໃຫ້ຂຶ້ນສານໃນໄມອາມີ ລັດຟໍລິດາ ກໍລະນີທີ່ຈັດເກັບເອກະສານລັບທາງການຢ່າງບໍ່ເໝາະສົມ ໂດຍທາງ Trump ໄດ້ຈັດເກັບເອກະສານລັບທາງການຂອງສະຫະລັດອາເມຣິກາ ເອົາໄວ້ຫຼາຍຮ້ອຍສະບັບ.
ໃນວັນທີ 13 ມິຖຸນາ 2023 ຕາມເວລາທ້ອງຖິ່ນ ອະດີດປະທານາທິບໍດີ Donald Trump ໄດ້ປາກົດຕົວຕໍ່ ທ່ານ Jonathan Goodman ຜູ້ພິພາກສາຂອງລັດຖະບານກາງສະຫະລັດອາເມຣິກາ ທີ່ໄມອາມີ ລັດ ຟໍລີດາ ພ້ອມກັບທະນາຍຄວາມ ຫຼັງຈາກທີ່ທາງລູກຂຸນໃຫຍ່ຂອງອາເມຣິກາໄດ້ຢືນຢັນການຟ້ອງຮ້ອງຄະດີອາຍາທັງໝົດ 37 ກະທົງ.
ສຳນວນການຟ້ອງຮ້ອງມີຄວາມຍາວເຖyງ 49 ໜ້າ ໂດຍທາງອະດີດປະທານາທິບໍດີ Donald Trump ໄດ້ຖືກກ່າວຫາວ່າຈົງໃຈຢຶດເອກະສານລັບ ແລະ ເຊື່ອງເອກະສານຂອງລັດຖະບານຂອງສະຫະລັດອາເມຣິກາ ລວມໄປຮອດການຂັດຂວາງຂະບວນການຍຸຕິທຳ ແລະ ໃຫ້ການບິດເບືອນຕໍ່ເຈົ້າໜ້າທີ່ສືບສວນທາງການຂອງສະຫະລັດອາເມຣິກາ ເຊິ່ງຂໍ້ມູນສ່ວນໃຫຍ່ຂ້ອງກ່ຽວກັບຄວາມໝັ້ນຄົງ ບໍ່ວ່າຈະເປັນຂໍ້ມູນທີ່ກ່ຽວກັບອາວຸດນິວເຄຼຍ ແຜນໂຕ້ກັບ ລວມໄປຮອດຄວາມບອບບາງຂອງສະຫະລັດອາເມຣິກາ ແລະ ຊາດພັນທະມິດ ເຊິ່ງຫາກມີການເຜີຍແຜ່ອອກໄປ ອາດຈະສົ່ງຜົນກະທົບອັນໃຫຍ່ຫຼວງຕໍ່ຄວາມໝັ້ນຄົງຂອງປະເທດມະຫາອຳນາດ.
ຢ່າງໃດກໍຕາມ ໃນລະຫວ່າງການພິຈາລະນາຄະດີປະມານ 47 ນາທີ ອະດີດປະທານາທິບໍດີ Donald Trump ບໍ່ຍອມຮັບຜິດຕໍ່ຂໍ້ກ່າວຫາທັງໝົດທີ່ຖືກຍື່ນຟ້ອງກ່ອນທີ່ຈະໄດ້ຮັບອະນຸຍາດໃຫ້ອອກຈາກສານໄດ້ໂດຍບໍ່ມີເງື່ອນໄຂ ຫຼື ຂໍ້ຈຳກັດໃນການເດີນທາງ ແຕ່ວ່າຜູ້ພິພາກສາບໍ່ອະນຸຍາດໃຫ້ເວົ້າກັບພະຍານໃນຄະດີ.
ໂດຍທາງ ອະດີດປະທານາທິບໍດີ Donald Trump ທີ່ຖືກຟ້ອງມາຫຼາຍຄະດີ ແຕ່ຄະດີນີ້ຖືວ່າເປັນຄະດີທີ່ຟ້ອງໂດຍກະຊວງຍຸຕິທຳ ເຊິ່ງເປັນໜ່ວຍງານຂອງລັດຖະບານ ແຕ່ Donald Trump ເບິ່ງວ່າເປັນການໂຈມຕີທາງການເມືອງເນື່ອງຈາກຫຼັງຈາກທີ່ປະກາດວ່າຈະສະໝັກຊິງເອົາຕຳແໜ່ງແຄນດີເດດປະທານາທິບໍດີສະຫະລັດອາເມຣິກາໃນພັກ Republican ເຊິ່ງມີຫຼາຍສຳນັກຊີ້ວ່າ Donald Trump ຍັງມີຄະແນນນິຍົມນຳໜ້າຜູ້ສະໝັກຄົນອື່ນໃນພັກນັ້ນເອງ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
