ທຸກຄົນເຄີຍມີພຶດຕິກຳເຫຼົ່ານີ້ຫຼືບໍ່ ຍິ່ງນອນເດິກ ຍິ່ງເກີດອາການທ້ອງຮ້ອງ, ຫິວເຂົ້າ, ຫິວອາຫານ, ຫິວເຂົ້າໜົມຂອງຈຸກຈິກກໍຈະວົນວຽນຢູ່ໃນຫົວ ຈຳເປັນຕ້ອງລຸກຈາກບ່ອນນອນອອກມາຊອກຂອງກິນ ຫຼາຍຄົນອາດຮູ້ຢູ່ແລ້ວວ່າພຶດຕິກຳເຫຼົ່ານີ້ກໍ່ໃຫ້ເກີດໂຣກຕຸ້ຍ, ແຕ່ບໍ່ພຽງເທົ່ານີ້ມັນຍັງເປັນສັນຍານເຕືອນອັນຕະລາຍສ່ຽງເປັນໂຣກ Night Eating Syndrome ອີກດ້ວຍ.
Night Eating Syndrome ແມ່ນ ໂຣກການກິນອາຫານໃນຕອນເດິກ ເປັນອາການປ່ວຍທາງຈິດປະເພດໜຶ່ງທີ່ສົ່ງຜົນໃຫ້ພຶດຕິກໍາການກິນອາຫານຜິດປົກກະຕິ. ໃນຕອນເຊົ້າ ຫຼື ໃນລະຫວ່າງມື້ ຈະບໍ່ຮູ້ສຶກຢາກອາຫານຫຼາຍ, ແຕ່ວ່າມັກຈະຫິວ ແລະ ມີຄວາມຮູ້ສຶກຢາກກິນອາຫານໃນຕອນກາງຄືນ, ເຖິງແມ່ນວ່າຈະນອນຫຼັບຢູ່ກໍຕາມ ພໍເມື່ອຮອດເວລາ ຮ່າງກາຍຈະຕື່ນ ແລະ ອອກໄປເປີດຕູ້ເຢັນເພື່ອຫາຂອງກິນ ບໍ່ວ່າຈະເປັນອາຫານຈານໃຫຍ່ ຫຼື ອາຫານວ່າງນ້ອຍໆ ຈົນກາຍເປັນຄວາມລຶ້ງເຄີຍ.
Albert Stunkard, ນັກຈິດຕະສາດຊາວອາເມຣິກາ ໄດ້ຄົ້ນພົບໂຣກດັ່ງກ່າວ ໃນປີ 1955 ເນື່ອງຈາກຄົນເຈັບຂອງລາວມີນ້ຳໜັກຕົວຫຼາຍ, ກິນອາຫານຫຼາຍກວ່າປົກກະຕິ ແລະ ມັກຫິວໃນຕອນກາງຄືນ, ຈົນກາຍເປັນສາເຫດທີ່ເຮັດໃຫ້ລາວກາຍເປັນຄົນຮ່າງກາຍຕຸ້ຍຂຶ້ນ. ທ່ານໝໍຈຶ່ງຕັ້ງຊື່ໂຣກນີ້ວ່າ Night Eating Syndrome.
ນອກຈາກນັ້ນ, ວາລະສານ American Medical Association ຍັງເປີດເຜີຍການສຶກສານີ້ວ່າ: ຄົນທີ່ມີພຶດຕິກຳມັກກິນອາຫານຕອນເດິກຈະຮູ້ສຶກຫິວ ແລະ ຢາກກິນອາຫານຫຼັງ 18 ໂມງແລງ ເປັນຕົ້ນໄປ, ເຊິ່ງຈາກການທົດລອງພົບວ່າ ກຸ່ມຄົນເຫຼົ່ານີ້ສາມາດກິນອາຫານໄດ້ເຖິງ 3 ເທົ່າ ຂອງປະລິມານອາຫານທີ່ກິນມາໃນໝົດມື້.
ອີງຕາມຫຼັກຖານທາງການແພດກ່າວວ່າ: ອາການດັ່ງກ່າວຖືໄດ້ວ່າເປັນໂຣກທາງຈິດ ເນື່ອງຈາກຕິດການກິນອາຫານຕອນເດິກເປັນປະຈຳ, ເຮັດທຸກມື້ຈົນກາຍເປັນນິດໄສ. ນອກຈາກນັ້ນ, ສາເຫດຂອງການກິນອາຫານຕອນເດິກຍັງເກີດມາຈາກຄວາມຜິດປົກກະຕິຂອງຮໍໂມນລະດັບ melatonin (ຄົນທີ່ເປັນໂຣກນອນບໍ່ຫຼັບ) ແລະ ຄວາມຕຶງຄຽດທີ່ນຳໄປສູ່ການກິນເພື່ອບັນເທົາຄວາມຄຽດ ເຊິ່ງວ່າໄວໜຸ່ມທີ່ຢູ່ໃນໄວຮຽນ ຫຼື ເຮັດວຽກມີຄວາມສ່ຽງເປັນໂຣກນີ້ຫຼາຍ.
ແນວໃດກໍຕາມ, ນິດໄສການກິນອາຫານຕອນເດິກ ບໍ່ໄດ້ໝາຍຄວາມວ່າຈະເປັນໂຣກ Night Eating Syndrome ສະເໝີໄປ!! ສະນັ້ນ, ລອງມາສັງເກດເບິ່ງນຳກັນວ່າ ທ່ານມີພຶດຕິກຳເຫຼົ່ານີ້ເປັນສ່ວນຫຼາຍບໍ່?
1.ບໍ່ເກີດອາການຫິວຫຼາຍໃນຕອນເຊົ້າ ແລະ ບໍ່ຢາກກິນອາຫານໃນລະຫວ່າງມື້
2.ຕອນແລງກິນຫຼາຍ ແລະ ເຕັມທີ່ກິນອາຫານໝົດທຸກຢ່າງ
3.ຖ້າບໍ່ກິນຕອນເດິກຈະນອນບໍ່ຫຼັບ ແລະ ຄິດສະເໝີວ່າ ການກິນອາຫານຕອນເດິກຈະເຮັດໃຫ້ນອນຫຼັບດີ.
4.ມັກຕື່ນຕອນກາງຄືນ ແລະ ຕ້ອງລຸກຂຶ້ນເປີດຕູ້ເຢັນຫາຂອງກິນປະມານ 3-4 ຄັ້ງ/ຄືນ
5.ລະເມີລຸກຂຶ້ນມາກິນເຂົ້າໂດຍບໍ່ຮູ້ຕົວ (ລອງຖາມຄົນໃນເຮືອນເບິ່ງເດີ)
6.ຄິດວ່າການຫິວໃນຕອນກາງຄືນ ແລະ ໄດ້ກິນອາຫານເປັນວິທີໜຶ່ງທີ່ຈະຊ່ວຍລົດຜ່ອນຄວາມຕຶງຄຽດ
ຖ້າຫາກທ່ານບໍ່ໄດ້ມີພຶດຕິກຳເຫຼົ່ານີ້ ກໍໝາຍຄວາມວ່າ ທ່ານບໍ່ໄດ້ເປັນໂຣກ Night Eating Syndrome. ໃນທາງກົງກັນຂ້າມ, ຖ້າພຶດຕິກຳເຫຼົ່ານີ້ຫາກແມ່ນທ່ານ ກໍຄວາມຕື່ນຕົວແລ້ວວ່າ ທ່ານກຳລັງເປັນໂຣກຫິວຕອນເດິກນີ້ຢູ່.
ແຕ່ທຸກທ່ານບໍ່ຕ້ອງວິຕົກກັງວົນຫຼາຍເກີນໄປ ເພາະມື້ນີ້, ພວກເຮົາໄດ້ນຳເອົາ 5 ວິທີປັບປ່ຽນພຶດຕິກຳຫິວຕອນເດິກມາຝາກທຸກຄົນ.
1). ການປ່ຽນແປງພຶດຕິກຳການກິນອາຫານ: ຄວນຈັດສັນເວລາການອາຫານໃຫ້ກົງກັບໂມງເຊັ່ນ: ເວລາ 7-9 ໂມງເຊົ້າແມ່ນ ກິນອາຫານເຊົ້າ, ເວລາ 11-13 ໂມງແມ່ນກິນອາຫານທ່ຽງ ແລະ ເວລາ 18-20 ໂມງ ກິນອາຫານແລງ, ພ້ອມຍັງຕ້ອງ ກິນອາຫານໃຫ້ຄົບ 5 ໝວດ ໃນປະລິມານທີ່ເໝາະສົມເພື່ອໃຫ້ຮ່າງກາຍຈັດສັນພະລັງງານໃຫ້ດີຂຶ້ນໃນແຕ່ລະໄລຍະ ແລະ ປ້ອງກັນບໍ່ໃຫ້ເກີດຄວາມຫິວ.
2). ລົດຜ່ອນຄວາມຮູ້ສຶກຫິວໂດຍການເຮັດສິ່ງອື່ນໆ ເຊັ່ນ: ການອ່ານ, ຟັງເພງ, ເບິ່ງຮູບເງົາ ແລະ ນັ່ງສະມາທິ, ເຊິ່ງກິດຈະກຳດັ່ງກ່າວຈະຊ່ວຍບັນເທົາຄວາມຕຶງຄຽດໄດ້.
3). ດື່ມນ້ຳກ່ອນແທນການກິນອາຫານ ໝາຍຄວາມວ່າ ເມື່ອເກີດອາການຫິວ ເຮົາສາມາດດື່ມນໍ້າກ່ອນ ຖ້າຫາກຄວາມຫິວຫາຍໄປນັ້ນກໍສະແດງວ່າ ບາງເທື່ອໃນເວລານັ້ນໆ ຮ່າງກາຍພຽງແຕ່ຫິວນ້ຳ
4). ພັກຜ່ອນໃຫ້ພຽງພໍເພື່ອຮັກສາການເຮັດວຽກຂອງຮ່າງກາຍໃຫ້ເປັນປົກກະຕິ ແລະ ລົດຜ່ອນຄວາມສ່ຽງຂອງພາວະລະດັບນໍ້າຕານໃນເລືອດຕໍ່າ ທີ່ສົ່ງຜົນໃຫ້ເກີດຄວາມຫິວ.
5). ສຳລັບຄົນທີ່ມີຄວາມຜິດປົກກະຕິຂອງຮໍໂມນ: ຄວນໄປພົບແພດໝໍເພື່ອຮັບການປຶກສາ, ປິ່ນປົວໄດ້ຖືກວິທີ ແລະ ທັນເວລາ.
6). ຄວນຫຼີກເວັ້ນອາຫານ ແລະ ເຄື່ອງດື່ມທີ່ມີນ້ຳຕານສູງ, ອາຫານຈືນ ແລະ ອາຫານສຳເລັດຮູບ. ເນື່ອງຈາກວ່າອາຫານເຫຼົ່ານີ້ແມ່ນມີໄຂມັນ ແລະ ພະລັງງານສູງ ເຮັດໃຫ້ອາຫານຍ່ອຍຍາກ ມັນອາດຈະສົ່ງຜົນກະທົບຕໍ່ນ້ຳໜັກຮ່າງກາຍ.
ຖ້າຫາກທ່ານ ປ່ອຍໃຫ້ອາການກິນຕອນເດິກຊໍາເຮື້ອເປັນເວລາດົນ ມັນອາດຈະນໍາໄປສູ່ການເກີດພະຍາດຮ້າຍແຮງໃນອະນາຄົດ. ສະນັ້ນ, ພະຍາຍາມບໍ່ກິນອາຫານຕອນເດິກ, ປັບປ່ຽນພຶດຕິກຳການກິນຢ່າງເໝາະສົມ, ກິນອາຫານໃຫ້ຄົບ 5 ໝູ່, ອອກກຳລັງກາຍເປັນປະຈຳ ແລະ ພັກຜ່ອນໃຫ້ພຽງພໍເພື່ອສຸຂະອະນາໄມທີ່ແຂງແຮງສົມບູນ.
ອ້າງອີງ:
ຕິດຕາມຂ່າວທັງໝົດຈາກ LaoX: https://laox.la/all-posts/
