ຫວຽດນາມ, ກະຊວງການເງິນ ໄດ້ສະເໜີຫຼຸດອັດຕາພາສີລາຍຮັບວິສາຫະກິດທີ່ມີລາຍຮັບບໍ່ເກີນ 50 ຕື້ດົ່ງ, ແຕ່ 15-17%. ຈາກປັດຈຸບັນ 20%. ເພື່ອໜູນຊ່ວຍວິສາຫະກິດຂະໜາດນ້ອຍ ແລະ ຈຸນລະວິສາຫະກິດ ໃນການສະສົມທຶນ ແລະ ພັດທະນາທຸລະກິດຂອງພວກເຂົາ.
ອີງຕາມການລາຍງານຂອງ ໜັງສືພີມຫວຽດນາມ, ການຕັດພາສີດັ່ງກ່າວ ແມ່ນຢູ່ໃນຮ່າງກົດໝາຍວ່າດ້ວຍ ອາກອນລາຍຮັບວິສາຫະກິດ (ສະບັບປັບປຸງ) ທີ່ຄາດວ່າຈະສະເໜີໃຫ້ສະພາແຫ່ງຊາດ ພິຈາລະນາຄັ້ງທຳອິດໃນເດືອນຕຸລາ 2024 ແລະ ຮັບຮອງເອົາໃນເດືອນພຶດສະພາ 2025.
ໂດຍໜຶ່ງໃນຈຸດປະສົງສໍາຄັນຂອງຕັດອັດຕາພາສີຄັ້ງນີ້ ແມ່ນເພື່ອສ້າງລະບອບພາສີທີ່ເອື້ອອໍານວຍຫຼາຍທີ່ສຸດ ສໍາລັບວິສາຫະກິດຂະໜາດນ້ອຍ ແລະ ຈຸນລະວິສາຫະກິດ
ຕາມຮ່າງກົດໝາຍດັ່ງກ່າວ, ອັດຕາພາສີ 15% ແມ່ນສະເໜີໃຫ້ບັນດາວິສາຫະກິດທີ່ມີລາຍຮັບບໍ່ເກີນ 3 ຕື້ດົ່ງ, ອັດຕາພາສີ 17% ແມ່ນສະເໜີໃຫ້ບັນດາວິສາຫະກິດທີ່ມີລາຍຮັບສູງກວ່າ 3 ຕື້ດົ່ງ ແລະ ຕ່ຳກວ່າ 50 ຕື້ດົ່ງ.
ປັດຈຸບັນ ໃນຈຳນວນ 900,000 ແຫ່ງທີ່ດຳເນີນທຸລະກິດ, ຈຸນລະວິສາຫະກິດ ແລະ ວິສາຫະກິດຂະໜາດນ້ອຍກວມເກືອບ 94% ຂອງຈຳນວນທັງໝົດ ແລະ ໄດ້ຮັບການກຳນົດນະໂຍບາຍບຸລິມະສິດເພື່ອຊ່ວຍພັດທະນາການຜະລິດ ແລະ ລາຍຮັບໃນໄລຍະຍາວ.
ເຊິ່ງໃນໄລຍະໂລກລະບາດໂຄວິດ-19, ເຂົາເຈົ້າຍັງໄດ້ຮັບຜົນປະໂຫຍດຈາກຫຼາຍໂຄງການໜູນຊ່ວຍຂອງລັດຖະບານຫວຽດນາມ.
