ເມື່ອມາຮອດບຸນປີໃໝ່ລາວແລ້ວ ຫຼາຍຄົນກໍໃຊ້ວິທີໃນການຫຼິ້ນບຸນປີໃໝ່ ທີ່ແຕກຕ່າງກັນອອກໄປ ບາງຄົນກໍຫຼິ້ນກັບໝູ່ຄູ່ຢູ່ໃນເຮືອນຂອງໃຜລາວ, ບາງຄົນກໍໄປສົງພະຕາມວັດທີ່ຢູ່ໃກ້ ແລະ ບາງຄອບຄົວກໍອາດຈະຕ້ອງໄດ້ເດີນທາງໄກ ເພື່ອໄປຢ້ຽມຢາມພໍ່ແມ່ ແລະ ບາງຄົນກໍພາຄອບຄົວໄປທ່ຽວພັກຜ່ອນໃນມື້ປີໃໝ່.
ໃນໄລຍະບຸນປີໃໝ່ ອຸບັດຕິເຫດຕາມທ້ອງຖະໜົນແຕ່ລະປີນັ້ນ ເກີດຂຶ້ນເປັນຈຳນວນຫຼາຍພໍສົມຄວນ ເຊິ່ງແຕ່ລະປີກໍອາດຈະມີຜູ້ບາດເຈັບ ຫຼື ເສຍຊີວິດ ຈາກການເກີດອຸບັດຕິເຫດຕ່າງໆ ໂດຍສະເພາະການເມົາແລ້ວຂັບ ຫຼື ຂັບລົດໄວເກີນກຳນົດ ໂດຍບໍ່ໃສ່ໝວກກັນກະທົບ.
ສະນັ້ນແລ້ວ ເຮົາຈຶ່ງມີວິທີທີ່ຢາກຈະແນະນຳໃຫ້ທຸກຄົນໄດ້ຮູ້ນຳກັນວ່າ ເຮົາຄວນປະຕິບັດ ແລະ ເອົາໃຈໃສ່ຈາກກົດໝາຍທີ່ໄດ້ວາງໄວ້ເຊັ່ນ:
- ກວດເຊັກສະພາບລົດໃຫ້ຮຽບຮ້ອຍກ່ອນອອກເດີນທາງທຸກຄັ້ງ.
- ວາງແຜນການເດີນທາງ ແລະ ສຶກສາເສັ້ນທາງໃຫ້ດີວ່າລົດຫຼາຍ ຫຼື ບໍ່ ສະພາບທາງເປັນແນວໃດ ແລະ ຕ້ອງໃຊ້ເວລາເທົ່າໃດໃນການເດີນທາງຈະໄດ້ເຜື່ອເວລາໄວ້.
- ກຽມຕົວເອງໃຫ້ມີສະພາບຮ່າງກາຍ ທີ່ພ້ອມຕໍ່ການເດີນທາງ ດ້ວຍການນອນຫຼັບພັກຜ່ອນໃຫ້ພຽງພໍ ງົດເຄື່ອງດື່ມແອວກໍຮໍທຸກຊະນິດ ແລະ ຫ້າມຮັບປະທານຢາທີ່ເຮັດໃຫ້ຢາກນອນເຊັ່ນ: ຢາລົດນ້ຳມູກ, ຢາພູມແພ້, ຢາແກ້ໄອ ສຳລັບຄົນທີ່ມີໂຣກປະຈຳໂຕ ຄວນກຽມຢາໄປໃຫ້ຄົບ.
- ຫາຂໍ້ມູນເບີໂທລະສັບສຸກເສີນກຽມໄວ້ ຫາກເກີດຫຍັງຂຶ້ນຈະໄດ້ມີຄົນມາຊ່ວຍເຫຼືອທັນ.
- ໃສ່ເຂັມຂັດນິລະໄພທຸກຄັ້ງທີ່ຂັບລົດ.
- ຫາກຂັບຂີ່ລົດຈັກ ຕ້ອງໃສ່ໝວກກັນກະທົບທຸກຄັ້ງ.
- ເຄົາລົບກົດຈະລາຈອນຢ່າງເຄັ່ງຄັດ ບໍ່ຂັບຂີ່ກວນຄົນອື່ນ.
- ຂັບລົດດ້ວຍຄວາມໄວທີ່ເໝາະສົມ ແລະ ຄວນເປີດໄຟໜ້າລົດ ເພື່ອໃຫ້ສັງເກດໄດ້ງ່າຍ.
- ຫາກຂັບລົດແລ້ວຮູ້ສຶກຢາກນອນ, ເມື່ອຍ, ຕ້ອງຟ້າວຫາບ່ອນຈອດລົດ ເພື່ອຫຼັບ ຫຼື ເຂົ້າຫ້ອງນ້ຳລ້າງໜ້າ ຢ່າຝືນຕົວເອງ.
- ບໍ່ຄວນຫຼິ້ນໂທລະສັບ ຫາກເປັນໄປໄດ້ຄວນປິດອິນເຕີເນັດລະຫວ່າງຂັບລົດ ເພາະສຽງຂໍ້ຄວາມ ຫຼື ການແຈ້ງເຕືອນຕ່າງໆ ຈາກໂທລະສັບຈະດຶງດູດຄວາມສົນໃຈ ຈົນຂາດສະມາທິໃນການຂັບຂີ່.
ພຽງເທົ່ານີ້ກໍຈະຊ່ວຍລົດຄວາມສ່ຽງໃນການເກີດອຸບັດຕິເຫດໄດ້ແລ້ວ ທຸກຄອບຄົວກໍຈະເດີນທາງກັບບ້ານຢ່າງປອດໄພ ແລະ ເປັນປີໃໝ່ລາວທີ່ມີແຕ່ຄວາມສຸກ ປາສະຈາກການເກີດອຸບັດຕິເຫດ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
