ດັ່ງທີ່ເຮົາເຫັນຂ່າວທີ່ຜ່ານມາເລື່ອງການຕັດໄມ້ທຳລາຍປ່າອາເມຊອນຢ່າງໜັກໜ່ວງ ໂດຍທີ່ລັດຖະບານບຣາຊິວເອງກໍບໍ່ໄດ້ໃສ່ໃຈບັນຫາດັ່ງກ່າວປານໃດ, ໃນທີ່ສຸດບັນດາຜູ່ນຳຊົນເຜົ່າຕ່າງໆທີ່ອາໄສຢູ່ບໍລິເວນໃກ້ກັບປ່າອາເມຊອນ ກຽມຕົວຟ້ອງຮ້ອງປະທານາທິບໍດີ Jair Bolsonaro ຂໍ້ຫາອາຊະຍາກຳຕໍ່ມະນຸດໂລກດ້ານສິ່ງແວດລ້ອມ ຈາກການຕັດໄມ້ທຳລາຍປ່າອາເມຊອນ, ເຊິ່ງເປັນການກໍ່ໃຫ້ເກີດອັນຕະລາຍໂດຍກົງຕໍ່ມະນຸດໂລກ.
ບັນດາຜູ່ນຳຊົນເຜົ່າ ແລະ ກຸ່ມສິດທິມະນຸດ ກຳລັງຮຽກຮ້ອງສານອາຍາລະຫວ່າງປະເທດ International Criminal Court (ICC) ໃຫ້ກວດສອບປະທານາທິບໍດີບຣາຊິວໃນເລື່ອງການອອກມາດຕະການດ້ານສິ່ງແວດລ້ອມ ແລະ ການລະເມີດສິດທິຊົນພື້ນເມືອງ ເຊິ່ງພວກເຂົາບອກວ່າເປັນການທຳລາຍທຳມະຊາດ ແລະ ວິ່ງແວດລ້ອມ.
ສັນຍາລະຫວ່າງປະເທດ ICC ສ່ວນໃຫຍ່ແລ້ວຈະເຮັດວຽກດ້ານການຂ້າລ້າງເຜົ່າພັນ ແລະ ອາຊະຍາກຳດ້ານສົງຄາມ. ຢ່າງໃດກໍຕາມ ຫຼັງຈາກຖືກວິຈານ ຈຶ່ງເຮັດໃຫ້ໃນປີ 2016 ICC ຕັດສິນໃຈທີ່ຈະປະເມີນຄວາມເສຍຫາຍໃນກໍລະນີກວ້າງຂຶ້ນ ທີ່ລວມເຖິງອາຊະຍາກຳໃນດ້ານສິ່ງແວດລ້ອມ ຫຼື ວັດທະນະທຳເຊັ່ນກັນ.
William Bourdon ທະນາຍຄວາມຕົວແທນຜູ່ນຳຊົນເຜົ່າ ຜູ່ທີ່ຢື່ນຄຳຮ້ອງໃຫ້ມີການກວດສອບປະທານາທິບໍດີບອກວ່າ: ຄະດີນີ້ຈະເຮັດໃຫ້ Jair Bolsonaro ຖືກພິຈາລະນາຂຶ້ນສານໃນດ້ານການທຳລາຍສິ່ງແວດລ້ອມ.
ນັກວິທະຍາສາດເຕືອນວ່າ: ການກັບມາຂອງ Jair Bolsonaro ອາດຈະນຳພາປ່າອາເມຊອນໄປສູ່ຈຸດທີ່ປ່ຽນ ແລະ ບໍ່ສາມາດກັບມາເປັນຄືເກົ່າໄດ້ອີກ.
Sonia Guajajara ຜູ່ນຳຂອງສະມາຄົມກຸ່ມຊົນເຜົ່າໃນບຣາຊິວບອກວ່າ “ສິ່ງທີ່ປະທານາທິບໍດີເຮັດນັ້ນ ບໍ່ພຽງແຕ່ເປັນອັນຕະລາຍຕໍ່ຄົນພື້ນເມືອງ ແຕ່ຍັງສ້າງບັນຫາໃຫ້ຄົນທັງໂລກ ເພາະວ່າສິ່ງນີ້ມັນກະທົບຕໍ່ໂລກ”
