ເຄີຍບໍ່ຮູ້ສຶກໃຈຮ້າຍຫຼາຍຈົນທົນບໍ່ໄດ້? ຢາກສະແດງຄວາມຮູ້ສຶກ ແຕ່ບໍ່ຮູ້ຈະສະແດງຢູ່ໃສ? ຊັ້ນເຮົາມາລອງວິທີນີ້ເບິ່ງ! ອີງຈາກການຄົ້ນຄວ້າຈາກປະເທດຍີ່ປຸ່ນຊີ້ໃຫ້ເຫັນວ່າ ການຂຽນເລື່ອງລາວທີ່ເຮັດໃຫ້ເຮົາໃຈຮ້າຍລົງໃສ່ເຈ້ຍ ແລ້ວຍ່ອງມັນຖິ້ມ ຈະຊ່ວຍຜ່ອນຄາຍຄວາມຮູ້ສຶກຂອງເຮົາໄດ້ແທ້!
ການຄົ້ນຄວ້ານີ້ໄດ້ຈັດພິມຢູ່ໃນວາລະສານ Nature, ດໍາເນີນໂດຍທີມງານຄົ້ນຄວ້າທີ່ນໍາພາໂດຍ ສາສະດາຈານ Nobuyuki Kawai ຈາກມະຫາວິທະຍາໄລ Nagoya ຍີ່ປຸ່ນ. ໂດຍທີມງານໄດ້ດຳເນີນການທົດລອງກັບນັກສຶກສາມະຫາວິທະຍາໄລ 100 ຄົນ ດ້ວຍການຂຽນບົດຂຽນກ່ຽວກັບບັນຫາສັງຄົມເຊັ່ນ: ນະໂຍບາຍຫ້າມສູບຢາໃນສະຖານທີ່ສາທາລະນະ, ຈາກນັ້ນນັກຄົ້ນຄວ້າກໍໄດ້ສົ່ງບົດຄວາມເຫຼົ່ານີ້ໄປໃຫ້ນັກສຶກສາປະລິນຍາເອກເພື່ອປະເມີນໃນການໃຫ້ຄະແນນ.
ຜົນໄດ້ຮັບຈາກການປະເມີນຜົນແມ່ນໂຫດຮ້າຍຫຼາຍ. ບົດຄວາມຂອງນັກຮຽນທັງໝົດໄດ້ຮັບຄະແນນຕໍ່າ ແລະ ເຕັມໄປດ້ວຍຄຳວິພາກວິຈານທີ່ຮຸນແຮງເຊັ່ນ “ມັນບໍ່ໜ້າເຊື່ອວ່າຄົນທີ່ມີການສຶກສາຈະຄິດແບບນີ້”.
ຫຼັງຈາກນັ້ນ, ນັກຄົ້ນຄວ້າໄດ້ໃຫ້ນັກຮຽນທັງໝົດຂຽນຄວາມຮູ້ສຶກຂອງເຂົາເຈົ້າກ່ຽວກັບຜົນການປະເມີນຜົນ. ໂດຍຈະແບ່ງອອກເປັນສອງກຸ່ມ, ກຸ່ມທໍາອິດໃຫ້ນຳເອົາເຈ້ຍທີ່ຂຽນໄປໃສ່ໄວ້ໃນກ່ອງທີ່ໂປ່ງໃສ. ສ່ວນອີກກຸ່ມໃຫ້ນຳເອົາເຈ້ຍທີ່ຂຽນໄປຍ່ອງຖິ້ມ ຫຼື ໃຊ້ເຄື່ອງທຳລາຍເຈ້ຍ.
ຜົນຂອງການທົດລອງພົບວ່າ ນັກຮຽນກຸ່ມທີ່ທຳລາຍເຈ້ຍ ຫຼື ຍ່ອງເຈ້ຍຖິ້ມ ຮູ້ສຶກຜ່ອນຄາຍຈາກການໃຈຮ້າຍ ຫຼາຍກວ່າກຸ່ມທີ່ເຈ້ຍໄປໃສ່ໃນກ່ອງ.
ເປັນຫຍັງການຍ່ອງເຈ້ຍຈຶ່ງຊ່ວຍໃຫ້ເຮົາຜ່ອນຄາຍ?
- ການທຳຍ່ອງເຈ້ຍປຽບສະເໝືອນການບີບເຄັ້ນຄວາມໃຈຮ້າຍອອກຈາກຕົວ: ນີ້ຈະຊ່ວຍໃຫ້ເຮົາໄດ້ປົດປ່ອຍຄວາມຮູ້ສຶກທາງລົບ ແລະ ຍັງຊ່ວຍໃຫ້ຈື່ຈໍາຄວາມໃຈຮ້າຍນັ້ນໄດ້ໜ້ອຍລົງ.
- ຊ່ວຍໃຫ້ສະໝອງປ່ອຍຮໍໂມນທີ່ມີຄວາມສຸກ: ການຂຽນ ແລະ ສະແດງອາລົມ ຈະກະຕຸ້ນສະໝອງໃຫ້ປ່ອຍສານ endorphins ເຊິ່ງມີຜົນເຮັດໃຫ້ຮູ້ສຶກຜ່ອນຄາຍ, ຫຼຸດຜ່ອນຄວາມຄຽດ ແລະ ມີຄວາມສຸກຫຼາຍຂຶ້ນ.
- ເປັນການເຝິກຕົວເອງໃຫ້ມີສະຕິ: ການຈົດຈໍ່ກັບການຂຽນ. ຊ່ວຍໃຫ້ເຮົາເຝິກສະມາທິ ແລະ ຄວບຄຸມອາລົມໄດ້ດີຂຶ້ນ.
- ຊ່ວຍໃຫ້ເຮົາແນມເຫັນບັນຫາຢ່າງມີເຫດຜົນ: ເມື່ອເຮົາໄດ້ລະບາຍຄວາມຮູ້ສຶກອອກມາແລ້ວ, ຈະເຮັດໃຫ້ສາມາດເບິ່ງເຫັນບັນຫາໄດ້ຢ່າງມີເຫດຜົນຫຼາຍຂຶ້ນ ແລະ ຊອກຫາວິທີແກ້ໄຂໄດ້ງ່າຍຂຶ້ນ
ການຂຽນລົງໃສ່ເຈ້ຍມີປະໂຫຍດຫຍັງແດ່?
- ຊ່ວຍຈັດການກັບອາລົມ: ເໝາະສຳລັບຜູ້ທີ່ຮັບມືກັບຄວາມຄຽດ, ຄວາມໃຈຮ້າຍ ຫຼື ອາລົມທາງລົບອື່ນໆ.
- ຫຼຸດຜ່ອນຄວາມສ່ຽງຂອງພະຍາດຕ່າງໆ: ການເກັບກົດກັບຄວາມຮູ້ສຶກໃຈຮ້າຍເປັນເວລາດົນ ອາດສົ່ງຜົນກະທົບທາງໃນລົບຕໍ່ສຸຂະພາບທາງດ້ານຮ່າງກາຍ ແລະ ຈິດໃຈຂອງເຮົາເຊັ່ນ: ຄວາມດັນເລືອດສູງ, ພະຍາດຫົວໃຈ ແລະ ໂຣກຊຶມເສົ້າ…ການຂຽນໃສ່ເຈ້ຍຈະຊ່ວຍບັນເທົາຄວາມຮູ້ສຶກ, ຫຼຸດຜ່ອນຄວາມກົດດັນ ແລະ ຫຼຸດຜ່ອນຄວາມສ່ຽງຂອງພະຍາດຕ່າງໆ.
- ສົ່ງເສີມສຸຂະພາບຈິດ: ຊ່ວຍໃຫ້ທ່ານຮູ້ສຶກຜ່ອນຄາຍ, ຫຼຸດຜ່ອນຄວາມກົດດັນ, ແລະ ມີຄວາມສຸກຫຼາຍຂຶ້ນ.
- ເພີ່ມທັກສະການຄິດວິເຄາະ: ຂຽນລົງໃສ່ເຈ້ຍຈະຊ່ວຍເຝິກສະມາທິ ປະກອບຄວາມຄິດຂອງເຈົ້າ ແລະ ເບິ່ງບັນຫາຢ່າງສົມເຫດສົມຜົນ
ເຕັກນິກການຂຽນລົງໃສ່ເຈ້ຍ
- ຊອກຫາເວລາທີ່ງຽບສະຫງົບ: ເລືອກບ່ອນງຽບໆ ປາສະຈາກສິ່ງລົບກວນ
- ຂຽນທຸກຢ່າງທີ່ຢູ່ໃນໃຈຂອງເຈົ້າ: ລະບາຍຄວາມຮູ້ສຶກຂອງເຮົາອອກມາຜ່ານການຂຽນໄດ້ຢ່າງເຕັມທີ່ ໂດຍບໍ່ຕ້ອງກັງວົນວ່າຈະຂຽນຜິດ ຫຼື ບໍ່ງາມກໍຕາມ
- ຂຽນໄປເລື້ອຍໆ: ຢ່າຢຸດຂຽນ ຈົນກວ່າເຈົ້າຮູ້ສຶກດີຂຶ້ນ
- ອ່ານ ແລະ ທົບທວນຄືນສິ່ງທີ່ຂຽນ: ເມື່ອຂຽນແລ້ວ, ພະຍາຍາມອ່ານ ແລະ ທົບທວນສິ່ງທີ່ໄດ້ຂຽນ. ແລ້ວເບິ່ງວ່າເຮົາຮູ້ສຶກແນວໃດ.
- ເກັບໄວ້ເປັນສ່ວນຕົວ: ເກັບສິ່ງທີ່ຂຽນໄວ້ເປັນສ່ວນຕົວ ບໍ່ຈໍາເປັນຕ້ອງໃຫ້ໃຜອ່ານມັນ.
ຫາກຮູ້ສຶກໃຈຮ້າຍແລ້ວບໍ່ຮູ້ຈະລົງທີ່ໃຜ ໃຫ້ທ່ານລອງລົງໃສ່ກັບເຈ້ຍເບິ່ງ ລອງໃຊ້ວິທີຂຽນລະບາຍແລ້ວຍ່ອງມັນ. ທ່ານຈະພົບວ່າມັນເປັນວິທີທີ່ແສນຈະງ່າຍດາຍ ແລະ ໄດ້ຜົນດີເກີນຄາດ, ຊ່ວຍໃຫ້ທ່ານຮູ້ສຶກຜ່ອນຄາຍ, ຫຼຸດຜ່ອນຄວາມກົດດັນ, ແລະ ກັບມາມີຄວາມສຸກຫຼາຍຂຶ້ນອີກຄັ້ງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
