ໃນໂອກາດທີ່ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ລົງຢ້ຽມຢາມ ແລະ ຕິດຕາມໂຄງການກໍ່ສ້າງສາຍສົ່ງແຮງສູງ 155 ກິໂລໂວນ ແລະ ກໍ່ສ້າງສະຖານີ ເພື່ອສະໜອງໄຟຟ້າໃຫ້ໂຮງງານຜະລິດຊິລິຄອນຂອງບໍລິລິສັດ ລາວຊິລິຄອນ ຈໍາກັດ ໃນວັນທີ 13 ກຸມພາ 2023 ທີ່ຜ່ານມາ. ທ່ານ ຊິນ ອິນທະວົງ ຜູ້ອຳນວຍການລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າ ໄດ້ລາຍງານໃຫ້ຮູ້ວ່າ: ບໍລິລິສັດ ລາວຊິລິຄອນ ຈໍາກັດ ໄດ້ຮັບການສ້າງຕັ້ງຂຶ້ນໃນປີ 2006, ໄດ້ສ້າງຕັັ້ງໂຮງງານປຸງແຕ່ງຊິລິຄອນ ເພື່ອການສົ່ງອອກ ຢູ່ເຂດອຸດສາຫະກໍາຫຼັກ 21 ນະຄອນຫຼວງວຽງຈັນ, ໃນເນື້ອທີ່ 6 ເຮັກຕາ, ມີອາຄານຜະລິດ 2 ຫຼັງ, ມີເຕົາຫຼອມທັງໝົດ 3 ເຕົາ, ເປັນໂຮງງານແຫ່ງທໍາອິດ ແລະ ແຫ່ງດຽວໃນ ສປປ ລາວ, ເປັນໂຮງງານຂະໜາດກາງ, ມີກໍາລັງການຜະລິດ 12.000 ໂຕນ/ປີ, ມີພະນັກງານກໍາມະກອນທັງໝົດ 385 ຄົນ.
ການດໍາເນີນກິດຈະການໃນໄລຍະຜ່ານມາ ເຫັນວ່າມີປະສິດທິຜົນ ສາມາດປະຕິບັດພັນທະອາກອນໃຫ້ລັດ ເປັນປົກກະຕິ ແລະ ທ່າແຮງທາງດ້ານວັດຖຸດິບພາຍໃນທີ່ມີຄວາມອຸດົມສົມບູນໃນຂອບເຂດທົ່ວປະເທດ. ດັ່ງນັັ້ນ, ບໍລິສັດ ຈຶ່ງໄດ້ຕັດສິນໃຈຂະຫຍາຍໂຮງງານປຸງແຕ່ງຊິລິຄອນແຫ່ງທີ 2 ຕື່ມອີກຢູ່ເຂດບ້ານ ທ່າບົກ, ເມືອງ ທ່າພະບາດ , ແຂວງ ບໍລິຄໍາໄຊ ໃນເນຶ້ອທີ່ 16 ເຮັກຕາ, ໂຮງງານທີ່ຈະສ້າງຂຶ້ນໃໝ່ນີ້ ເປັນໂຮງງານຂະໜາດໃຫຍ່ ແລະ ທັນສະໄໝກວ່າເກົ່າ, ໂດຍມີແຜນຈະສ້າງທັງໝົດ 6 ເຕົາຫຼອມ, ມີກໍາລັງການຜະລິດ 54 ພັນໂຕນ/ປີ, ນໍາໃຊ້ພະລັງງານ ໄຟຟ້າທັງໝົດ 84MW, ມູນຄ່າການລົງທຶນທັງໝົດປະມານ: 51 ລ້ານໂດລາສະຫະລັດ, ນໍາໃຊ້ແຮງງານປະມານ 300-500 ຄົນ, ຄາດວ່າໂຮງງານແຫ່ງທີ 2 ນີ້ຈະກໍ່ສ້າງສໍາເລັດໃນປີ 2024.
ທ່ານ ກ່າວຕື່ມວ່າ: ຂະບວນການຜະລິດຊິລິຄອນຈະປະກອບດ້ວຍ: ວັດຖຸດິບພາຍໃນປະກອບມີ: 1) ພະລັງງານໄຟຟ້າ 2) ແຮ່ຄວາສ ແລະ 3) ຖ່ານໄມ້ . ສໍາລັບວັດຖຸດິບນໍາເຂົ້າປະກອບມີ: 1) ຂວັ້ນໄຟຟ້າ Electrode 2) ຖ່ານກາກກັ່ນຈາກນ້ຳມັນ ແລະ 3) ຖ່ານກາກກັ່ນຈາກຖ່ານຫີນ. ຫຼັກການພື້ນຖານຂອງການຜະລິດຊິລິຄອນໂລຫະແມ່ນ ໃຊ້ແຮ່ກວາສ (SiO2) ມາປະຕິກິລິຍາຄາບອນ (C) ເພື່ອໃຫ້ກາກບອນອັອກຊີເຈນ (O2) ທີ່ມີຢູ່່ໃນແຮ່ກວາສ (SiO2) ອອກ ແລະ ກໍຈະໄດ້ຮັບຊີລິຄອນເກດ ໂລຫະດັ່ງສະແດງລຸ່ມນີ້: SiO2 +C = Si + CO2 (ຫີນແຮ່ ກວາສ + ຖ່ານ = ຊິລິຄອນໂລຫະ + ແກ໊ສ CO2) ໃນເຕົາຫຼອມຊິລິຄອນພາຍໃນອຸນຫະພູມ 1800 °c ທີ່ໄດ້ຈາກພະລັງງານໄຟຟ້າແລ່ນຜ່ານຂວັ້ນໄຟຟ້າອີເລັກໂທຣດ, ວັດຖຸດິບ (ແຮ່ກວາສ ແລະ ຖ່ານໃນອັດຕາສ່ວນທີ່ເໝາະສົມ) ທີ່ຖືກປ້ອນເຂົ້າເຕົາຫຼອມແລ້ວເກີດ ປະຕິກິລິຍາຂຶ້ນໂດຍຖ່ານຄາບອນຈະດູດເອົາອັອກຊີເຈນທີ່ຢູ່ໃນແຮ່ກວາສແລ້ວກາຍເປັນແກ໊ສ CO2, ແລ້ວປ່ອຍສູ່ບັນຍາກາດ, ສ່ວນຊິລິຄອນ (Si) ຈະຖືກປອ່ຍລົງເບົ້າຫຼອມກ້າມເປັນແຜ່ນຊີຄອນໂລຫະທີ່ມີຄຸນະພາບ 99,00% ເພື່ອສົ່ງອອກ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
