ໃນວັນທີ 27 ມີນາທີ່ຜ່ານມາ, ສຳນັກຂ່າວຂອງປະເທດຫວຽດນາມໄດ້ລາຍງານວ່າ VinFast ຜູ້ຜະລິດລົດໄຟຟ້າຫວຽດນາມ ໄດ້ປະກາດເຊັນສັນຍາຮ່ວມມືກັບຜູ້ຈຳໜ່າຍ 15 ແຫ່ງຢູ່ໄທ. ເພື່ອຂະຫຍາຍທຸລະກິດໃນອາຊີຕາເວັນອອກສຽງໃຕ້ ແລະ ຕອບສະໜອງຄວາມຕ້ອງການລົດ EV ທີ່ເພີ່ມຂຶ້ນໃນພາກພື້ນ.
VinFast ກ່າວວ່າ ການລົງນາມຂໍ້ຕົກລົງໃນການຮ່ວມມືດັ່ງກ່າວໄດ້ມີຂຶ້ນຢູ່ທີ່ງານ Bangkok International Motor Show ຄັ້ງທີ 45 ທີ່ຈັດຂຶ້ນໃນອາທິດທີ່ຜ່ານມາ. ໂດຍ VinFast ແລະ ຕົວແທນຈໍາໜ່າຍຂອງຕົນຈະເຮັດວຽກຮ່ວມກັນຢ່າງເຕັມທີ່ເພື່ອເປີດຫ້ອງວາງສະແດງ 22 ແຫ່ງ, ໂດຍເນັ້ນໃສ່ຖະໜົນສາຍຫຼັກໃນບາງກອກ ແລະ ບໍລິເວນອ້ອມແອ້ມ, ຈາກນັ້ນຂະຫຍາຍໄປໃນຕົວເມືອງໃຫຍ່ເຊັ່ນ: ຊຽງໃໝ່, ຂອນແກ່ນ, ອຸບົນຣາຊະທານີ, ອາຍຸດທະຍາ ແລະ ຊົນບູລີ.
ຖືໄດ້ວ່າເປັນຈຸດສໍາຄັນສໍາລັບຍຸດທະສາດສຳລັບການເຕີບໂຕຂອງ VinFast ໃນຕະຫຼາດໄທ. ທີ່ມີອັດຕາການນໍາໃຊ້ລົດ EV ສູງ ແລະ ມີສະຖານີສາກໄຟເປັນພື້ນຖານໂຄງສ້າງທີ່ຊ່ວຍໃຫ້ບໍລິສັດສາມາດນໍາສະເໜີລົດໄຟຟ້າທີ່ຫຼາກຫຼາຍສໍາລັບຊີວິດໃນຕົວເມືອງ.
Vu Dang Yen Hang ຫົວໜ້າບໍລິຫານຂອງບໍລິສັດ VinFast Auto (ປະເທດໄທ) ກ່າວວ່າ
“ການຂະຫຍາຍເຄືອຂ່າຍຕົວແທນຈຳໜ່າຍໄດ້ຕອກຢ້ຳຈຸດຍືນ ແລະ ຄວາມສາມາດໃນການຢຶດໝັ້ນທີ່ໝັ້ນຄົງຂອງ VinFast ໃນປະເທດໄທ. ໂດຍເນັ້ນໜັກເຖິງຄວາມສາມາດເຕີບໂຕ ແລະ ພັດທະນາລະບົບຄົມມະນາຄົມຂົນສົ່ງແບບຍືນຍົງ ເພື່ອຮັບປະກັນຄວາມກ້າວໜ້າຢ່າງບໍ່ຢຸດຢັ້ງ.
ບໍລິສັດຕັ້ງເປົ້າທີ່ຈະເລີ່ມການຂາຍລົດໄຟຟ້າຮຸ່ນ VF e34 (SUV-BUV), VF 5 (Cross City Car), VF 6 (Crossover SUV) ແລະ VF. 7 (crossover SUV) ແລະ scooter ໄຟຟ້າໃນສອງເດືອນຂ້າງໜ້າ ຫຼື ໄຕມາດທີສາມ, ໂດຍຈະມີການເປີດເຜີຍລາຍລະອຽດໃນການປະກາດຄັ້ງຕໍ່ໄປ”.
ເຖິງແມ່ນວ່າຕະຫຼາດລົດ EV ຂອງໄທຈະມີຂະໜາດນ້ອຍ ແຕ່ກໍສາມາດເຕີບໂຕໄດ້ຢ່າງໄວວາຈາກການສະໜັບສະໜຸນຕ່າງໆຈາກລັດຖະບານ. ໂດຍປະເທດໄທໄດ້ຕັ້ງເປົ້າໝາຍທີ່ຈະປ່ຽນແປງ 30% ຂອງການຜະລິດລົດ ປະຈໍາປີຂອງຕົນເປັນລົດ EVs ໃນປີ 2030, ເຊິ່ງການເຄື່ອນໄຫວໃນຄັ້ງນີ້ຈະຊ່ວຍຊຸກຍູ້ການແຂ່ງຂັນໃນບັນດາຜູ້ຜະລິດ EV, ໂດຍນັກລົງທຶນບາງລາຍແນມເຫັນວ່າປະເທດໄທ ແມ່ນສູນກາງການຜະລິດລົດຂອງພາກພື້ນນີ້່ ເປັນຮາກຖານການຜະລິດທີ່ມີສັກກະຍາພາບ.
ໃນປີ 2023, ຊາວໄທໄດ້ຊື້ EV ທີ່ໃຊ້ແບັດເຕີຣີ 73,500 ຄັນ, ກວມເອົາ 9% ຂອງຍອດຂາຍລົດພາຍໃນປະເທດ ແລະ ຄາດວ່າຈະເພີ່ມຂຶ້ນສອງເທົ່າໃນທ້າຍປີ 2024, ອີງຕາມການຄາດການຂອງສະຫະພັນອຸດສາຫະກໍາແຫ່ງປະເທດໄທ.
VinFast ຕັ້ງເປົ້າໝາຍທີ່ຈະຂະຫຍາຍທຸລະກິດຂອງຕົນອອກໄປຢ່າງໜ້ອຍ 50 ປະເທດພາຍໃນປີ 2024. ນອກເໜືອໄປຈາກຕະຫຼາດທີ່ໄດ້ຈັກຕັ້ງຂຶ້ນແລ້ວເຊັ່ນ: ສະຫະລັດ, ແຄນາດາ ແລະ ຢູໂຣບ, VinFast ກໍາລັງມຸ່ງເປົ້າໝາຍໃສ່ຕະຫຼາດໃນອາຊີໃກ້ຄຽງເຊັ່ນ: ອິນເດຍ, ອິນໂດເນເຊຍ, ໄທ ແລະ ຟິລິບປິນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/