Tesla ບຸກຕະຫຼາດພະລັງງານແສງຕາເວັນຈີນ! ສ້າງໂຮງງານ “Megapack” ແຫ່ງທໍາອິດ ມຸ່ງເນັ້ນໄປທີ່ການຜະລິດແບັດເຕີຣີເກັບຮັກສາພະລັງງານຂະໜາດໃຫຍ່

29/05/2024

Tesla, ບໍລິສັດຜະລິດລົດໄຟຟ້າຊັ້ນນໍາຈາກສະຫະລັດ ປະກາດສ້າງຕັ້ງໂຮງງານ “Megapack” ແຫ່ງທໍາອິດໃນປະເທດຈີນ, ຕັ້ງຢູ່ໃນເຂດທົດລອງການຄ້າເສລີ Lingang ນະຄອນຊ່ຽງໄຮ້. ໂດຍມີຈຸດປະສົງໃນການສຸມໃສ່ການຜະລິດແບັດເຕີຣີ ເກັບຮັກສາພະລັງງານຂະໜາດໃຫຍ່, ເພື່ອສະໜັບສະໜູນການເຕີບໂຕຂອງຕະຫຼາດພະລັງງານແສງຕາເວັນຂອງຈີນ

ການລົງທຶນນີ້ສະທ້ອນໃຫ້ເຫັນເຖິງຄວາມມຸ່ງໝັ້ນຂອງ Tesla ໃນຕະຫຼາດຈີນ, ເຊິ່ງເປັນຕະຫຼາດລົດໄຟຟ້າທີ່ໃຫຍ່ທີ່ສຸດອັນດັບສອງຂອງໂລກ. ໃນປັດຈຸບັນ Tesla ປະກອບລົດໄຟຟ້າຢູ່ໃນໂຮງງານຍັກໃຫຍ່ (Gigafactory) ໃນຊ່ຽງໄຮ້ ແລະໂຮງງານ “Megapack” ແຫ່ງໃໝ່ນີ້ຖືເປັນໂຮງງານແຫ່ງທີ 2 ຂອງ Tesla ໃນເມືອງດັ່ງກ່າວ.

“ໂຮງງານແຫ່ງໃໝ່ນີ້ແມ່ນບາດກ້າວທີ່ສໍາຄັນສໍາລັບທັງຊ່ຽງໄຮ້ ແລະ Tesla. ໃນສະພາບແວດລ້ອມທີ່ເປີດກວ້າງຂຶ້ນຫຼາຍກວ່າເກົ່ານີ້ ພວກເຮົາສາມາດສ້າງລົດໄຟຟ້າ ‘Tesla Speed’ ເວີຊັນໃໝ່ຢູ່ໂຮງງານ ແລະ ສົ່ງມອບແບັດເຕີຣີເກັບຮັກສາພະລັງງານຂະໜາດໃຫຍ່ທີ່ຜະລິດໃນປະເທດຈີນໄປສູ່ຕະຫຼາດໂລກ.” Tao Lin ຮອງປະທານຂອງ Tesla ກ່າວ.

ໂຮງງານ “MegaPak” ຄາດວ່າຈະເລີ່ມການຜະລິດໃນໄຕມາດທີ 1 ປີ 2025 ດ້ວຍກຳລັງການຜະລິດເບື້ອງຕົ້ນ 10,000 ໜ່ວຍຕໍ່ປີ, ແຕ່ລະແຫ່ງສາມາດເກັບພະລັງງານໄດ້ຫຼາຍກວ່າ 3,9 ເມກາວັດ-ຊົ່ວໂມງ. ເຊິ່ງພຽງພໍສຳລັບການຈ່າຍໄຟຟ້າໃຫ້ກັບບ້ານເຮືອນປະມານ 3,600 ເຮືອນໃນເວລາໜຶ່ງຊົ່ວໂມງ.

Tesla ເຫັນເຖິງທ່າແຮງໃນຕະຫຼາດການເກັບຮັກສາພະລັງງານຂອງຈີນ ໂດຍສະເພາະແມ່ນໃນຂະນະທີ່ປະເທດພະຍາຍາມໄປສູ່ເປົ້າໝາຍໃນການປ່ອຍອາຍພິດຄາບອນໃຫ້ເປັນສູນ.

ນອກຈາກນີ້, ການລົງທຶນຂອງ Tesla ໃນໂຮງງານ “Megapack” ຍັງສະທ້ອນໃຫ້ເຫັນຄວາມເຖິງເຊື່ອໝັ້ນຂອງບໍລິສັດຕໍ່ເສດຖະກິດຂອງຈີນ. Tesla ໄດ້ສ້າງໂຮງງານ Gigafactory ໃນຊ່ຽງໄຮ້ໃນປີ 2019. ໂດຍໂຮງງານດັ່ງກ່າວສາມາດຜະລິດລົດໄຟຟ້າໄດ້ 947,000 ຄັນໃນປີ 2023, ເພີ່ມຂຶ້ນ 33% ຈາກປີກ່ອນ, Gigafactory ກາຍເປັນສູນສົ່ງອອກຫຼັກໆສຳລັບລົດໄຟຟ້າຂອງ Tesla , ຫຼາຍກວ່າເຄິ່ງໜຶ່ງຂອງລົດໄຟຟ້າ 1.8 ລ້ານຄັນທີ່ສົ່ງອອກໄປທົ່ວໂລກໃນປີ 2023 ແມ່ນຖືກຜະລິດຈາກໂຮງງານດັ່ງກ່າວ.

ການກໍ່ຕັ້ງໂຮງງານຜະລິດ “megapack” ເກີດຂຶ້ນພຽງ 2- 3 ອາທິດຫຼັງຈາກ CEO Elon Musk ຂອງ Tesla ໄດ້ເດີນທາງໄປຢ້ຽມຢາມປະເທດຈີນ. ໂດຍ Elon Musk ກ່າວວ່າ Tesla ຍິນດີທີ່ຈະຂະຫຍາຍການຮ່ວມມືກັບຈີນເພື່ອທີ່ທັງສອງຝ່າຍຈະໄດ້ຮັບປະໂຫຍດ

ການເຕີບໂຕທາງເສດຖະກິດຂອງຈີນເຕີບໂຕຂຶ້ນໄວກວ່າທີ່ຄາດໄວ້ໃນໄຕມາດທຳອິດທີ່ 5,3% ດຶງດູດນັກລົງທຶນຕ່າງປະເທດໃຫ້ມາລົງທຶນຢູ່ໃນປະເທດ. ຈໍານວນບໍລິສັດຕ່າງປະເທດທີ່ໄດ້ສ້າງຕັ້ງຂຶ້ນໃໝ່ໃນປະເທດຈີນເພີ່ມຂຶ້ນ 12,000 ໃນໄຕມາດທໍາອິດ, ເຊິ່ງເພີ່ມຂຶ້ນ 20.7% ຈາກປີກ່ອນໜ້ານີ້.

Tesla ຂະຫຍາຍທຸລະກິດການເກັບຮັກສາພະລັງງານໃນປະເທດຈີນ ສະແດງໃຫ້ເຫັນຄວາມມຸ່ງໝັ້ນນຂອງບໍລິສັດທີ່ຈະເປັນຜູ້ມີບົດບາດສໍາຄັນໃນຕະຫຼາດພະລັງງານສະອາດທີ່ເຕີບໂຕໄວຂອງປະເທດ.

ທີ່ມາ:

facebook

english.news.cn

ຕິດຕາມຂ່າວທັງໝົດຈາກ LaoX: https://laox.la/all-posts/