Suki teenoi ຮ້ານສຸກີ້ບຸບເຟ່ຊື່ດັງຂອງປະເທດໄທ ມີແຜນຈະຂະຫຍາຍສາຂາເພີ່ມອີກ 60 ສາຂາພາຍໃນປະເທດ ພ້ອມແນມຫາໂອກາດບຸກຕະຫຼາດນອກປະເທດ ຂະຫຍາຍສາຂາມາເປີດໃນປະເທດອ້ອມຂ້າງຢ່າງ ກຳປູເຈຍ ແລະ ສປປ ລາວ.
ທ່ານອະດິສັກ ສຸຂຸມວິທະຍາ ຫົວໜ້າກຳມະການບໍລິຫານ ບໍລິສັດ ເຈມາດ ກຣຸບ ໂຮນດິ້ງ ຈຳກັດຜູ້ດຽວ ຫຼື JMART ຜູ້ຮ່ວມທຶນໃນຮ້ານອາຫານ BNN ຈຳກັດ ຫຼື “ສຸກີ້ຕີ໋ນ້ອຍ” ເປີດເຜີຍວ່າ: ບໍລິສັດຍັງຢູ່ໃນຂັ້ນຕອນການຂະຫຍາຍສາຂາຕື່ມອີກໃນຕ່າງປະເທດ. ໂດຍການໂອ້ລົມກັບພັນທະມິດໃນກຳປູເຈຍເພື່ອສຶກສາຄວາມເປັນໄປໄດ້, ການຕະຫຼາດ, ສະຖານທີ່ ແລະ ຮູບແບບທຸລະກິດ. ຄາດວ່າຈະມີຄວາມຊັດເຈນພາຍໃນປີ 2024 ໃນຂະນະທີ່ກໍາລັງສຶກສາຂະຫຍາຍສາຂາໄປແຂວງອຸດອນທານີ ແລະ ອຸບົນຣາຊະທານີ ເພື່ອໂອກາດທີ່ຈະຂະຫຍາຍໄປສູ່ ສປປ ລາວ, ແຕ່ປັດຈຸບັນຍັງບໍ່ມີລາຍລະອຽດຫຼາຍ”.
ໂດຍ ສຸກີ້ຕີ໋ນ້ອຍ ມີແຜນຈະຂະຫຍາຍສາຂາຕື່ມອີກພາຍໃນປີນີ້ປະມານ 60 ສາຂາ, ໂດຍມີພື້ນທີ່ສາມາດຮອງຮັບການຂະຫຍາຍໄດ້ 55 ສາຂາ, ໂດຍຈະເປັນການເນັ້ນການຂະຫຍາຍສາຂາຢູ່ກຸງເທບ. ພ້ອມທັງມີແຜນຈະຂະຫຍາຍສາຂາໄປຍັງແຂວງຕ່າງໆອີກດ້ວຍ
ທ່ານອະດິສັກ ສຸຂຸມວິທະຍາ ຍັງເປີດເຜີຍອີກວ່າ: ໃນການລົງທຶນຂອງກຸ່ມບໍລິສັດ ຮ້ານອາຫານ BNN ຈຳກັດ ຫຼື “ສຸກິ້ຕີ໋ນ້ອຍ” ຢູ່ໃນລະດັບ 30% ນັ້ນເປັນການລົງທຶນທີ່ກຸ້ມຄ່າໃນໄລຍະຍາວ. ຈາກທ່າອ່ຽງການເຕີບໂຕຂອງລາຍຮັບ ແລະ ເຊື່ອໝັ້ນວ່າ ສຸກີ້ຕີ໋ນ້ອຍ ຈະເປັນເຄື່ອງຈັກສຳຄັນ ທີ່ຈະຂັບເຄື່ອນ ປະສິດທິພາບ ຂອງກຸ່ມບໍລິສັດ ເຈມາດ ໃນໄຕມາດທີ 3 ແລະ 4 ຂອງປີນີ້ ໂດຍຄາດວ່າ ຕົວເລກຍອດຂາຍ ໃນແຕ່ລະປີ ຄາດວ່າຈະມີຢ່າງໜ້ອຍ 500 ລ້ານບາດ.
ຮ້ານ ສຸກີ້ຕີ໋ນ້ອຍ ຖືເປັນອີກໜຶ່ງ ຮ້ານຈຸ່ມ ບຸບເຟ່ ທີ່ໄດ້ຮັບຄວາມນິຍົມເປັນຢ່າງສູງໃນກຸ່ມໄວໜຸ່ມໄທ ດ້ວຍອາຫານທີ່ຫຼາກຫຼາຍ ແຈ່ວທີ່ເປັນເອກະລັກ ແລະ ທີ່ສຳຄັນແມ່ນລາຄາບໍ່ແພງ. ໂດຍປັດຈຸບັນ ມີສາຂາທັງໝົດ ເຖິງ 46 ສາຂາທົ່ວປະເທດໄທ.
ທີ່ມາ:
https://www.thairath.co.th/money/investment/stocks/2717671
ຕິດຕາມຂ່າວທັງໝົດຈາກ LaoX: https://laox.la/all-posts/