Sergey Glazyev ອະດີດລັດຖະມົນຕີຣັດເຊຍໄດ້ໃຫ້ສໍາພາດກັບ TV BRICS ວ່າ ສະກຸນເງິນ BRICS ແມ່ນເກືອບຈະສຳເລັດແລ້ວ ແຕ່ຍັງຕ້ອງການການສະໜັບສະໜູນຈາກຜູ້ນຳທັງໝົດຂອງສະມາຊິກໃນກຸ່ມປະເທດ BRICS.
“ພວກເຮົາພຽງແຕ່ຕ້ອງການເຫດຜົນທາງດ້ານການເມືອງເທົ່ານັ້ນ ເພາະໃນດ້ານວິຊາການ ສະກຸນເງິນນີ້ແມ່ນເກືອບທີ່ຈະພ້ອມໃຊ້ງານແລ້ວ, ຊອບແວ ແລະ ເຄື່ອງມືຕ່າງໆກໍໄດ້ຖືກສ້າງຂຶ້ນເປັນທີ່ຮຽບຮ້ອຍ.
ໃນການເປີດຕົວສະກຸນເງິນນີ້ ພວກເຮົາຕ້ອງໄດ້ຮັບການຍິນຍອມທາງດ້ານການເມືອງຈາກສະມາຊິກໃນກຸ່ມປະເທດ BRICS, ໃນນັ້ນມີ 3 ປະເທດທີ່ໄດ້ໃຫ້ການສະໜັບສະໜູນແລ້ວ ແລະ ພວກເຮົາລໍຖ້າຄຳຕອບຈາກຈີນ ແລະ ອິນເດຍຢູ່”
Sergey Glazyev ຍັງກ່າວອີກວ່າປະເທດຣັດເຊຍຍັງໄດ້ໂນ້ມນ້າວບັນດາປະເທດທີ່ເປັນສະມາຊິກໃນກຸ່ມ BRICS ໃຫ້ເປີດໄຟຂຽວສຳລັບສະກຸນເງິນດັ່ງກ່າວໃນປີໜ້າ.
“ແລະເພື່ອທີ່ຈະເປີດຕົວສະກຸນເງິນດັ່ງກ່າວ. ໃນຖານະທີ່ປະເທດຣັດເຊຍໄດ້ຮັບເລືອກໃຫ້ເປັນປະທານໃນປີໜ້າ ອາດຈະໄດ້ຈັດກອງປະຊຸມລະຫວ່າງປະເທດເພື່ອລົງນາມໃນຂໍ້ຕົກລົງກ່ຽວກັບການຮັບຮອງເອົາເງິນສະກຸນດັ່ງກ່າວມາເປັນສະກຸນເງິນສາກົນ”
ໂດຍລວມແລ້ວ, ກຸ່ມປະເທດ BRICS ໄດ້ສະໜັບສະໜູນສະກຸນເງິນດັ່ງກ່າວໃນລະດັບທີ່ແຕກຕ່າງກັນອອກໄປ, ໂດຍມີຜູ້ນໍາໃນຣັດເຊຍ ແລະ ບຣາຊິວໄດ້ຢຶດໝັ້ນຢູ່ເບື້ອງຫຼັງແນວຄວາມຄິດນີ້, ໃນສ່ວນຂອງອາຟຣິກາໃຕ້ເປັນປະເທດທີ່ມີແນວຄິດອະນຸລັກນິຍົມຫຼາຍທີ່ສຸດ ໂດຍໄດ້ສະແດງອອກເຖິງຄວາມຕ້ອງການສໍາລັບແນວທາງໃນການລະມັດລະວັງ ແລະໃນຂະນະດຽວກັນນັ້ນກໍຍັງໄດ້ເນັ້ນໜັກເຖິງຄວາມສໍາຄັນຂອງເງິນໂດລາສະຫະລັດ.
ອີງຕາມຂໍ້ມູນຂອງ Sergey Glazyev ທີ່ໄດ້ໃຫ້ສໍາພາດໂດຍລະບຸວ່າ ສະກຸນເງິນໃໝ່ນີ້ຈະໄດ້ຮັບການສະໜັບສະໜູນຈາກເງິນທຶນສອງແຫຼ່ງ, ເຊິ່ງຈະມີການເສື່ອມລາຄາໜ້ອຍແລະ ມີຄວາມດຶງດູດທີ່ຈະໃຊ້ຫຼາຍກວ່າເງິນໂດລາສະຫະລັດ.
“ສະກຸນເງິນໃໝ່ນີ້ບໍ່ໄດ້ຮັບການສະໜັບສະໜູນພຽງແຕ່ແຫຼ່ງເງິນຂອງບັນດາປະເທດສະມາຊິກເທົ່ານັ້ນ ແຕ່ມັນຍັງຂຶ້ນກັບສິນຄ້າອີກດ້ວຍ, ເຊິ່ງໃນຮູບແບບນີ້ໄດ້ສະແດງໃຫ້ເຫັນວ່າສະກຸນເງິນນີ້ຈະມີຄວາມໝັ້ນຄົງ ແລະ ມີຄວາມດຶງດູດຫຼາຍກວ່າເງິນໂດລາ, ປອນ ແລະ ຢູໂຣ”
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
