ທ່ານເຄີຍຮູ້ສຶກຢາກກິນ ຫຼື ກິນຫຍັງທີ່ບໍ່ເເມ່ນອາຫານບໍ່? ໃນຕອນທີ່ຍັງນ້ອຍ ຫຼາຍໆຄົນອາດມີປະສົບການ ຫຼື ອາດຈະເຫັນໝູ່ກິນສິ່ງຂອງທີ່ບໍ່ໜ້າຈະກິນໄດ້ເຊັ່ນ: ຢາງລຶບ, ຢາຖູເເຂ້ວ, ເຈ້ຍ ເເລະ ອື່ນໆ ເຊິ່ງສ່ວນໃຫຍ່ອາດຈະພຽງເເຕ່ຢາກຮູ້ຢາກລອງເທົ່ານັ້ນ ເເຕ່ພໍໄດ້ຊິມຣົດຊາດ ເເລະ ຮັບຮູ້ເຖິງຜົນເສຍເເລ້ວກໍຈະຢຸດໃນທັນທີ.
ແຕ່ Pica ນັ້ນຕ່າງອອກໄປ, Pica ຫຼື ໂຣກທີ່ມັກກິນຂອງເເປກທີ່ບໍ່ເເມ່ນອາຫານນັ້ນ ຈັດຢູ່ໃນກຸ່ມອາການທາງຈິດ ເຊິ່ງອະທິບາຍເຖິງພຶດຕິກຳທີ່ຄົນໆໜຶ່ງຮູ້ສຶກຢາກກິນ “ສິ່ງຂອງທີ່ບໍ່ແມ່ນອາຫານ” ໂດຍບໍ່ສາມາດຄວບຄຸມຕົນເອງໄດ້.
ໂຣກ Pica ນັ້ນເກີດຂຶ້ນໄດ້ໃນທຸກເພດທຸກໄວ, ເເຕ່ຈະພົບເຫັນຫຼາຍໃນເດັກນ້ອຍ ເເລະ ມັກຈະພົບເຫັນຄວາມຜິດປົກກະຕິທາງສະຕິປັນຍາຮ່ວມນຳ. ຜູ້ທີ່ເປັນ Pica ມັກຈະຢາກກິນຂອງເເປກໆທີ່ບໍ່ເເມ່ນອາຫານເຊັ່ນ: ນ້ຳກ້ອນ, ເປືອກໄຂ່, ສໍຂາວ, ຖ່ານ, ຂີ້ເທົ່າ, ຂີ້ຕົມ, ດິນ, ຫີນ, ທຽນ, ເສັ້ນຜົມ, ເເຟັບ, ເຈ້ຍ, ອາຫານສັດ, ສີທີ່ລອກອອກຕາມຝາ ເເລະ ອື່ນໆ. ຜູ້ປ່ວຍທຸກໆຄົນທີ່ເປັນໂຣກ Pica ຈະມີຄວາມຢາກກິນຂອງເເປກໆທີ່ແຕກຕ່າງກັນ.
ໃນປັດຈຸບັນ, ເເພດ ແລະ ນັກວິທະຍາສາດຍັງບໍ່ສາມາດກໍານົດສາເຫດທີ່ແນ່ນອນຂອງໂຣກນີ້ໄດ້, ແຕ່ຂໍ້ມູນເບື້ອງຕົ້ນຊີ້ໃຫ້ເຫັນວ່າປັດໄຈຕໍ່ໄປນີ້ແມ່ນເອື້ອອໍານວຍໃຫ້ແກ່ການເກີດຄວາມຢາກອາຫານທີ່ແປກປະຫຼາດນີ້ໄດ້ຄື:
- ພາວະສຸຂະພາບເຊັ່ນ: ການຂາດສານອາຫານ ເເລະ ເເຮ່ທາດ, ຜູ້ປ່ວຍໂຣກເລືອດຈາງຊະນິດດຽວ (Sickle cell anemia), ຜູ້ປ່ວຍ Autistic ຫຼື ກຸ່ມອາການ Autism Syndrome.
- ມີບັນຫາດ້ານສຸຂະພາບຈິດ
- ວັດທະນະທຳໃນການກິນຂອງເເປກ, ສະພາບເເວດລ້ອມທີ່ຂາດແຄນຈົນເຮັດໃຫ້ການກິນຂອງທີ່ບໍ່ເເມ່ນອາຫານນັ້ນເປັນເລື່ອງປົກກະຕິ ເເລະ ການປ່ອຍປະລະເລີຍໃນການລ້ຽງດູເດັກທີ່ບໍ່ທັນຮູ້ຫຍັງ
ຜົນກະທົບຈາກການກິນຂອງທີ່ບໍ່ເເມ່ນອາຫານເຂົ້າໄປນັ້ນອາດຈະສົ່ງຜົນເສຍຕໍ່ຮ່າງກາຍ ເເລະ ຖ້າກິນມັນຫຼາຍເກີນໄປກໍອາດຈະກໍໃຫ້ເກີດໂຣກທີ່ເປັນອັນຕະລາຍເຊັ່ນ:
- ຖອກທ້ອງ, ປວດຮາກ, ລຳໄສ້ມີການອຸດຕັນ, ມີການຕິດເຊື້ອໃນລຳໄສ້ ເເລະ ທໍ່ສົ່ງອາຫານ
- ເລືອດຈາງຈາກການມີເລືອດອອກໃນທໍ່ສົ່ງອາຫານ
- ວິນຫົວ, ອ່ອນເພຍ, ເປັນຕະຄິວຈາກພາວະຂາດສານອາຫານ ເເລະ ເເຮ່ທາດ
- ເປັນໂຣກກ່ຽວກັບຊ່ອງປາກ, ເເຂ້ວເເຕກ ເເລະ ຫັກ
- ເປັນໂຣກຫົວໃຈ
- ສານພິດຈາກສານຕະກົ່ວ ແລະ ສານອື່ນໆສາມາດເຮັດໃຫ້ພິການ ແລະ ເສຍຊີວິດໄດ້.
ນອກຈາກນີ້, ພຶດຕິກຳການກິນອາຫານທີ່ຜິດປົກກະຕິມັກຈະເຮັດໃຫ້ຄົນປ່ວຍມີຄວາມຮູ້ສຶກຜິດ ແລະ ມີຄວາມລະອາຍຕໍ່ຕົນເອງ ເພາະບໍ່ສາມາດຫ້າມໃຈຕົນເອງຈາກການກິນສິ່ງເຫຼົ່ານັ້ນໄດ້ ເຊິ່ງອາດນໍາໄປສູ່ບັນຫາທາງຈິດໃຈ
ຫາກທ່ານກຳລັງປະສົບກັບຄວາມຢາກກິນອາຫານທີ່ບໍ່ແມ່ນອາຫານ ຫຼື ແມ່ນແຕ່ກິນເຂົ້າໄປເເລ້ວກໍຕາມ, ຄວນໄປພົບແພດເພື່ອກວດຫາສາເຫດ ແລະ ວາງແຜນການປິ່ນປົວໂດຍສະເພາະ, ໂຣກ Pica ສາມາດປິ່ນປົວ ເເລະ ບັນເທົາໄດ້.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
